Calapan gov’t regulates use of old passenger tricycles in the city

CALAPAN CITY, Oriental Mindoro, Jan. 18 (PIA) – The city government of Calapan is regulating the use of old passenger tricycles to ride in the city effective this month.

City Ordinance No. 9 mandates all drivers/operators of tricycles to use the newly-prescribed standard size of sidecars of their respective passenger tricycles for the convenience of the riding public.

The said ordinance is one of the changes that the city government wants for uniformity, being a business-friendly and booming city and seat of the regional government center of Mimaropa region.

It can be recalled that the city government has intensified its massive information dissemination campaign about the ordinance using radio announcement, social media, public address system and installation of tarpaulin in all strategic areas or vicinities of Calapan.

For the renewal of tricycle franchise, drivers/operators of passenger tricycles will not be able to renew their franchise unless the sidecars of their tricycles are compliant with the current ordinance.

(LTC/PIA-Mimaropa/Calapan)

Advertisements

Tagalog news: Solar Energy Systems, inilagay sa iba’t ibang bayan sa Marindque

BOAC, Marinduque, Enero 18 (PIA)–Nagtayo ng Solar Energy System (SES) sa iba’t ibang lugar sa Marinduque ang Department of Science and Technology (DOST) kaagapay ang mga lokal na pamahalaan at eskwelahan.

Sa pakikipagtulungan ng Marinduque State College (MSC) at pamahalaang bayan ng Buenavista, nakapaglagay ng SES ang DOST-Marinduque sa dalawang mababang paaralan sa nasabing bayan: Binunga Elementary School at Libas Elementary School, na siya ring nagsisilbing evacuation centers sa lugar.

Labinglimang small scale SES din naman ang itinayo sa mga tahanan na nabibilang sa Community Empowerment through Science and Technology (CEST) sa Yook, Buenavista.

Bukod pa rito ay nakapaglagay rin ng SES sa 22 barangay sa bayan ng Mogpog na nagsisilbi ring evacuation centers.

Laking pasasalamat din naman ng Department of Health-Mimaropa dahil nabigyan din ng SES ang kanilang mga Rural Health Unit (RHU) sa Brgy. Dolores, Sta. Cruz, Brgy. Bantay Boac, Brgy. Maniwaya, Sta. Cruz at Brgy. Poblacion, Buenavista.

Dahil dito, nakakapagbigay pa rin ng serbisyo ang mga RHU kahit brownout sa probinsya lalo na kapag magbibigay serbisyo sa mga manganganak ng sanggol.

Inaasahan naman na sa taong 2021 ay makapagdadagdag muli ng SES sa 15 barangay at walong eskwelahan sa lahat ng anim na bayan ng lalawigan. (PIA-MIMAROPA/Marinduque)

Tagalog news: Job Fair sa OrMin nakapagbigay ng 200 trabahaho

LUNGSOD NG CALAPAN, Oriental Mindoro, Enero 18 (PIA) – Umabot sa 200 katao ang nabigyan ng trabaho sa on the spot hiring ng mga kumpanya sa katatapos na Job Fair na ginanap sa Bulwagang Panlalawigan kamakailan lamang.

Dinagsa ang job fair ng higit kumulang sa 500 mamamayan ng lalawigan na umasang magkaroon ng trabaho. Mula sa 18 mga ahensya na nagbigay ng oportunidad sa mga job seeker, pinakamaraming bilang ng nag-apply sa Toyota Calapan kung saan may mahigit 40 aplikante ang natanggap sa trabaho.

Hired on the spot naman ang lahat ng aplikanteng nag-apply sa EMS Services Phils. Inc. na nasa halos 10 katao habang apat na tanggapan naman ang kumuha sa lahat ng aplikanteng nag-apply sa kanila.

Ilan pa sa pinakamaraming nakuhang empleyado ay ang Eastwest Placement Center Inc., NPK Medical Trading Inc., Channel International Placement Services Corp. at Phoenix (R. King’s Gas Filling Station, Inc.).

Ang nasabing programa ay naisakatuparan ng pamahalaang panlalawigan, sa pamamagitan ng Education of Employment Services Division/Office of the Governor at ng Department of Labor and Employment (DOLE)-Oriental Mindoro Provincial Office. (LTC/CPRSD)

Tagalog news: ‘New-to-the-World Products’ ng Marinduque, ipinakilala na ng DOST-PSTC

MOGPOG, Marinduque, Enero 17 (PIA)— Inilunsad ng Department of Science and Tecnology-Provincial Science and Technology Center (DOST-PSTC) Marinduque ang kanilang tinatawag na ‘New to the World Products’.

Ang mga produkto na tinutukoy ng DOST-PSTC ay ang vacuum fried dilis, malunggay crackers at coconut candy.

Ayon kay Eleazar Manaog ng DOST-PSTC, bukod sa mga pamilihan sa Marinduque ay iniaangkat na rin nila ang vacuum fried dilis sa labas ng probinsya samantalang ang malunggay crackers at coconut candies naman ay pansamantalang sa Marinduque lang muna mabibili lalo na sa mga paaralan.

Upang makagawa ng mga produktong ito, iba’t ibang kooperatiba ang katuwang ngayon ng nasabing ahensya kabilang ang Department of Trade and Industry (DTI) at Department of Labor and Employment (DOLE). Sa paggagawa ng vacuum fried dilis, kaagapay nila ang Balanacan Multi-Sectoral Credit Cooperative, Batayang Pamayanang Kristiyano naman sa paggagawa ng malunggay crackers at Mogpog Vegetarian Growers naman ang gumagawa ng coconut candy. Ang kita na naiipon mula rito ay direktang napupunta sa mga kooperatiba.

Nagsimula ang proyektong ito dahil sa pilot project ng pamahalaang bayan ng Mogpog kung saan ipinamahagi rin ng DOST- Industrial Technology Development Institute (DOST-ITDI) ang vacuum frier sa LGU. Ang pondo na ginamit dito upang mabuo ang pagsasagawa ng tatlong produktong ito ay nagmula sa Bottom-up Budgeting (BUB) funds ng bayan ng Mogpog.

Mayroon ding online marketing para sa mga nagnanais na bumili ng mga produkto ng Marinduque at ng iba pang probinsya sa rehiyon ng Mimaropa. Maaari itong bisitahin sa http://www.mimaropaventures.ph. (PIA-MIMAROPA/Marinduque)

Tagalog news: LGU Odiongan, tumanggap ng meat processing equipment mula sa DOST

ODIONGAN, Romblon, Enero 17 (PIA) — Ang pamahalaang bayan ng Odiongan ay tumanggap ng meat processing equipment mula sa Department of Science and Technology (DOST) na nagkakahalaga ng P637,680 upang magamit sa pamilihang bayan nito.

Ang pagkakaloob ng nasabing kagamitan ay ay ginanap sa DOST Romblon Provincial Office, sa pangunguna ni DOST Provincial Director Marcelina Servañez, kung saan masaya itong tinanggap ni Mayor Trina Firmalo-Fabic.

Ang meat processing equipment na ibinigay ng DOST ay kinabibilangan ng silent cutter, meat grinder, meat slicer, smoke house, digital weighing scale, SS brine injector, stainless table, sticker label para sa tocino at longganisa.

Ayon sa alkalde, balak nilang ilagay ang mga kagamitang natanggap sa kasalukuyang tinatayong QMS-Conforming Factory sa Odiongan Public Market para sa mga red meat products. Maaari aniyang rentahan ito at magagamit ng mga mamimili upang makagawa o makabuo ng nais nilang produkto mula sa karne.

Nagpapasalamat ng marami si Mayor Fabic sa DOST-Romblon sa patuloy nitong pagkakaloob ng tulong sa kaniyang bayang nasasakupan at maging sa ilan pang napagkalooban ng Grants-In-Aid Program ng naturang ahensiya ng pamahalaan.(PJF/DMM/PIA-MIMAROPA/Romblon)

Tagalog news: ‘Bring Home a Friend’ program ng DOT inilunsad sa Puerto Princesa

PUERTO PRINCESA, Palawan, Enero 16 (PIA) — Naglunsad ang Department of Tourism (DOT)-Mimaropa ng programang ‘Bring Home a Friend’ noong kamakailan sa lungsod ng Puerto Princesa.

Ang ‘Bring Home a Friend’ ay isang programa kung saan inaanyayahan ng mga kababayan ang kaniyang mga dayuhang kaibigan o kamag-anak na magbakasyon sa Pilipinas.

“Ang hakbang na ito ay naghahangad na dumami ang ating mga bisitang dayuhan sa ating bayan na magpapaangat lalo ng turismo”, ani Danilo Intong, regional director ng DOT-Mimaropa.

Ayon sa DOT, tatakbo ang programa mula Oktubre 15 – Abril 15 at inaasahang maipagpapatuloy pa sa mga susunod na taon.

Samantala, inilatag ng DOT ang proseso upang makasali sa programa. Dito, kinakailangan muna ng isang sponsor na Filipino na magpa-rehistro ng kaniyang detalye sa http://www.bringhomeafriend.online at pagkatapos ay pupunuan nito ang imbitasyon na siyang ipadadala sa dayuhang kaibigan.

Upang may katibayan sa naging biyahe ng inimbitahang dayuhan, kinakailangan niyang i-upload sa website ang kaniyang boarding pass, pagkatapos ng kaniyang naging biyahe saan mang bahagi ng bansa.

Ang bilang ng entries ay naka-depende sa pinanggalingan ng inimbitahang dayuhan. Maaring magkaroon ng isang entry ang mga bisitang nanggaling sa Asya, habang dalawang entries naman ang nagmula sa Australia at Oceania.

Tatlong entries ang maaaring makuha ng mga turistang nanggaling sa Middle East, Europe at America.

Gaganapin ang raffle sa April 2018, kung saan ang mga Filipino sponsors ay maaaring manalo ng Megaworld condominium unit, isang brand-new Toyota Via, o halagang Php200,000 gift certificate mula sa Duty Free Philippines.

Posible ring manalo ng tiket na roundtrip sa international at domestic at tour packages sa Palawan Cebu o Davao ang inimbitahang dayuhan.

Kaugnay nito, positibo si Puerto Princesa City Mayor Lucilo Bayron na may malaking bentahe ang programa ng DOT para sa lungsod lalo pa’t ang turismo ang pangunahing industriya dito.

“Makakadagdag po ng malaki sa turismo ng Puerto Princesa ang programang ito, if we bring home our friends here, tataas ang ating tourist arrivals” pahayag ni Mayor Bayron.

Ani Bayron, sa kasalukuyan, limang porsiyento lang ang itinataas ng tourist arrival sa lungsod, subalit kung makakapagdala ang mga mamamayan ng grupo na binubuo halimbawa ng sampung turista, doble ang i-aangat nito. (LBD/PIAMIMAROPA-Palawan)

Tagalog news: Kaong, ipinakilala ng DOST sa mga taga-Odiongan

ODIONGAN, Romblon, Enero 15 (PIA) — Isang pagsasanay ukol sa pagkilala, pag-aani at pagpo-proseso ng kaong o sugar palm, isang prutas na bunga ng sugar palm tree, ang isinagawa ng Department of Science and Technology Mimaropa (DOST-Mimaropa) Provincial Science and Technology Center-Romblon (PSTC-Romblon) sa bayan ng Odiongan kamakailan.

Kilala bilang “Hidiok” o “Kabo-Negro” ang kaong sa Romblon. Ito ay isang prutas na madalas sangkap sa paggawa ng “fruit salad” at halo-halo at maihahalintulad sa nata de coco maliban sa hugis nitong bilohaba at kulay na pula o berde.

Tatlong dalubhasang magsasaka sa pagpo-proseso ng kaong mula sa Lucban, Quezon ang inimbitahan ng DOST para magbahagi ng kaalaman sa ilang magsasaka sa bayan ng Odiongan, opisyal ng barangay, kawani ng Office of the Provincial Agriculturist at ilang estudyante mula sa Romblon State University.

Sa unang araw ng pagsasanay ay ginugol ng mga kalahok ang pagkilala ng bunga na puwede nang anihin.

Kasunod nito ay ang paghahanap naman ng mga kaong sa isla ng Tablas, pagluluto, pagpo-proseso at pag-iimbak ng mga ito.

Tinuruan rin ang mga partisepante kung paano gumawa ng “sweetened kaong” upang sa bandang huli o susunod na mga taon ay mapakinabangan nila ang mga puno ng kaong na hitik sa bunga sa kanilang lugar.

Sa pamamagitan ng pagsasanay, napag-alaman na bagamat mabilis mamunga at mamulaklak ang puno ng kaong ay agaran din naman itong namamatay. Ngunit hindi gaya sa ibang puno, ang kaong ay madaling patubuin sapagkat ito ay ligaw at hindi kailangan ng mga pataba o masinsinang pangangalaga.

Ayon din sa mga ekspertong magsasaka, ang isang puno ay maaring umani ng mahigit kumulang 50 kilo ng kaong na nagkakahalaga ng Php 350 bawat kilo kung kaya tinatayang aabot sa Php 15,000 ang kikitain sa kada puno.

Maliban sa pagbebenta ng bunga nito, ang mga magsasaka ay maaaring kumita sa pamamagitan ng paggawa ng walis tingting mula sa dahon nito, makagawa ng suka at pulot gamit ang bulaklak.

Pinagkukunan din ng masarap na ubod ang mga bata na puno samantalang ang matatandang puno naman ay sinasabing magandang patubuan ng mga orkidyas na halaman.(DOST-PSTC/DMM/PIA-MIMAROPA/Romblon)