Category Archives: Safety

Tagalog news: Estado ng insurhensya sa Occ Min, iniulat ng PA

SAN JOSE, Occidental Mindoro, Dis 28 (PIA) — Nagbigay ng ulat ang Philippine Army (PA) sa kalagayan ng insurhensya sa lalawigan sa isinagawang Provincial Peace and Order Council (PPOC) Meeting na idinaos kamakailan sa Sikatuna Beach Hotel, San Jose.

Ayon sa PA, tumaas ang bilang ng mga katutubong sumasali sa New People’s Army (NPA) dahil aniya sa istratehiya ng makakaliwang grupo. Ipinaliwanag ng Hukbong Katihan (PA) na ginagamit ng NPA ang mga miyembro nilang babae upang humikayat ng mga bagong kasapi. Bukod dito ay ginagamit din ng NPA ang pangakong suporta sa pamilya at isyu ng ancestral domain.

Nagbigay ng mungkahi si PPOC Chairman at Governor Mario Gene Mendiola na magkaroon ng joint outreach program ang PA, Philippine National Police (PNP) at pamalahaang panlalawigan. Aniya, malaking tulong ito upang maramdaman ng mga mamamayan na nakatira sa liblib na lugar ang tulong ng pamahalaan. Sinabi rin ni Mendiola na maaring makatulong rin ang tanggapan ng Provincial Social Welfare and Development Office (PSWDO) upang makapagsagawa ng medical mission.

“Nakakalungkot na malaman natin that the IPs has the highest number of membership (mataas na bilang na sumapi) sa kanila (NPA)” pahayag ni Reynante Luna, tagapamuno ng National Commission on Indigenous Peoples (NCIP).

Bunsod nito, nagbigay ng panukala si Luna na magkaroon ng convergence program ang NCIP at PA na kahalintulad ng IPs Summit na isinagawa ng NCIP kamakailan. Ayon kay Luna, katuwang ng kanilang ahensya ang Philippine Drug Enforcement Agency (PDEA) at Technical Education and Skills Development Authority (TESDA) na nagbigay kaalaman sa 140 youth participants na pawang mga katutubo. Aniya, epektibong paraan ang youth summit sa anti-insurgency campaign ng pamahalaan. (VND/PIA MIMAROPA/Occ Min)

Advertisements

Tagalog news: Coron, magsasagawa ng tsunami drill para sa ika-4 na NSED

LUNGSOD QUEZON, Disyembre 19 (PIA) —Kaisa ang Mimaropa sa pagdaraos na ika-apat na Nationwide Simultaneous Earthquake Drill (NSED) mamayang ika-2 ng hapon.

Ayon kay Office of Civil Defense – Mimaropa Regional Director Eugene Cabrera, ang bayan ng Coron, Palawan ang mangunguna sa paglulunsad ng regionwide simultaneous earthquake drill.
“Tsunami drill ang gagawin sa Coron,” sabi ni Director Cabrera.
Kasabay ng tsunami drill sa Coron ang mga gaganaping exercises sa Sapang Palay, San Jose Del Monte, Bulacan kung saan ang kick-off ceremony para naman sa NSED.
Napag-alaman kay Engineer Fernando Lopez, ang Municipal Disaster Risk Reduction and Management Officer ng Coron, na may 300 residente ang lalahok sa tsunami drill ang lalahok sa Sitio Maquinit, Barangay Tagumpay.
“Ang scenario po ay may malakas na earthquake (7.8 magnitude) sa Manila fault na magkaka-tsunami na aabot sa Coron sa loob ng 20 minutes,” paliwanag ni Engineer Lopez sa text.
Bukod sa duck, cover and hold at evacuation, ayon pa kay Engineer Lopez, kasama sa praktis ang paggamit ng Incident Command System at pagsasagip ng buhay sa may aplaya.
Dapat tandaan ang pag-duck, cover and hold sa sandaling magkaroon ng lindol.
Pero kung may naramdamang lindol sa mga baybayin at napansin ang mabilis na pagkati ng tubig, dapat lumikas agad sa mataas na lugar.
Ang biglaang pag-atras ng tubig dagat ay maaring bunga ng isang lindol na nangyari sa ilalim ng karagatan.
Bukod sa pagbaba ng level o pag-atras ng tubig dagat, ang pag-ugong sa karagatan ang isa pang senyales na may tsunami na mangyayari.
Ang ugong ay mula sa paparating ng mga sunod-sunod na dambuhalang alon.
Antayin ang abiso ng mga awtoridad o disaster risk reduction and management office bago magsipagbalikan sa mga tahanan.
Una rito, iginiit ni National Disaster Risk Reduction and Management Council Spokesperson Mina Marasigan nitong Huwebes na paulit-ulit ang kampanya ng pamahalaan para sa paghahanda sa isang malakas na lindol.
“Nakahalaga na mayroon tayong kaalaman at kahandaan dito. Hindi natin alam kung kailan ito mangyayari kaya inaasaahan natin ang pakikiisa ng bawat Pilipino,” ayon kay Marasigan. (Lyndon Plantilla/PIA-4B)

Tagalog news: ‘Food Safety Training’ isinagawa ng RHU-Romblon, DOST

ROMBLON, Romblon, Dis. 19 (PIA) — Ang Rural Health Unit-Romblon, sa pakikipagtulungan ng Department of Science and Technology – Romblon, ay nagsagawa ng Training on Food Safety para sa mga nagmamay-ari ng restaurant, karinderya, canteen, mga naglalako ng kakanin, mga tindera ng karne, isda, gulay at prutas.

 

Ito ay ginanap sa GSP Provincial Headquarters sa bayan ng Romblon simula Disyembre 5-7 na dinaluhan 388 katao.

 

Layunin nito na maturuan ang mga kalahok ng wastong paghawak ng pagkain upang mapanatiling sariwa, malinis at ligtas itong kainin para maiwasan ang posibleng food poisoning.  Sinanay rin ang mga ito sa tamang pakikitungo sa kanilang mga parokyano at tamang pag-aayos sa sarili.

 

Sinabi ni Dr. Merly Valen H. Mallorca, Municipal Health Officer ng RHU Romblon, na napapanahon ang ganitong pagsasanay dahil sa papalapit na kapaskuhan at kapiyestahan ng kabisera ng Romblon upang matiyak na malinis ang ibinibentang pagkain sa costumer.

 

“Nagagalak kami sa dami ng lumahok at nakitang partisipasyon ng mga manininda sa tatlong araw na pagsasanay sapagkat malaki ang maitutulong nito sa kanilang paghahanapbuhay”, pahayag ni Mallorca.

 

Ang mga nagsilbing resource speaker sa pagsasanay ay sina Olga G. Eledia, Assistant Professor II sa Romblon State University – Main campus, Mae Angelica Fabito-Famini, Science Research Specialist II ng DOST-Romblon at John Ian Ace G. Diocadez, Technical assistant II ng DOST-Romblon.

 

Tinalakay ng mga ito sa mga maninindang kalahok ang usapin tungkol sa food safety and sanitation, food storage, food handling, proper hygiene, good grooming, personality development, customer service, tourism at financial literacy o savings.

Ayon sa mga lumahok sa food safety training, malaki ang pasasalamat nila sa pamahalaang lokal ng Romblon dahil marami silang natutunang paraan sa pagtitinda ng malinis na pagkain at maging ang maayos na pakikiharap nila sa mga customer.

 

Lahat ng mga nagsipagtapos ay napagkalooban ng sertipiko ng pagsasanay (certificate of training) na magagamit nilang pruweba sa pagkuha ng business permit sa Enero 2018. (DMM/PIA-IVB/Romblon)

Tagalog news: Bayan ng Baco idineklarang drug-cleared municipality

BACO, Oriental Mindoro, Dis. 6 (PIA) – Napabilang na ang bayan ng Baco sa drug-cleared municipalities sa buong bansa matapos tanggapin at aprubahan kamakailan ng Validation of Drug-cleared Municipality Oversight Committee ang mungkahi ni Provincial Director Police Senior Supt. Christopher Birung ng Philippine National Police (PNP) na pinangalawahan naman ni Gob. Alfonso V. Umali, Jr.

 

Ayon sa ulat na ipinalabas ng Provincial Information Office, ang deklarasyon ay dumaan sa masusing balidasyon ng PNP, Philippine Drug Enforcement Agency (PDEA) at ng Department of the Interior and Local Government (DILG).

 

Kinilala bilang ikatlong bayan sa  lalawigan, sunod sa mga bayan ng Mansalay at San Teodoro na malinis na sa usapin ng droga base sa programa ng pamahalaang nasyunal.

 

Kaugnay nito, isang programa ng pagkilala  ang isinagawa sa Café de Baco kamakailan na  pinangunahan nina Gob. Umali, Mayor Reynaldo A. Marco, Vice-Mayor Brederick V. Castillo,  PD Birung, PDEA-Mimaropa OIC Ryan C. Cazeñas,  Police Senior Insp. Jemorie Z. Vergara  ng Baco at  mga kinatawan ng iba’t ibang konsernadong ahensya at opisyales ng mga barangay ng naturang bayan.

 

Sa programa, pinasalamatan ni Mayor Marco at Vice-Mayor Castillo ang lahat ng mga konsernadong  ahensya upang ganap ng maging drug-cleared municipality ang Baco.  Ipinaabot din nila ang pasasalamat at ang pakikiisa ng mga namumuno sa mga barangay dahil sa malaking sakripisyo na ginawa nila upang tuluyan ng maging malaya at mapanatili ang kanilang hanay na ligtas sa perwisyong dulot ng iligal na droga.

 

Sa open forum, nanawagan si Gob. Umali na maging mapagmatyag at magsama-sama ang lahat upang tuluyan at mapanatiling ligtas ang komunidad mula  sa problemang iligal na droga.

 

Sa pagtatapos, nilagdaan ng mga myembro ng Oversight Committee ang resolusyon  ni Gob. Umali  at  pagkatapos ito ay ipinagkaloob kay Mayor Marco  bilang patunay na ang Baco ay ganap nang  Drug-Cleared Municipality. (LTC/CPRSD/PIA-Mimaropa/Calapan)

Tagalog news: DTI Romblon, nagpaalala sa pamimili ng de-kalidad na christmas lights

ODIONGAN, Romblon, Dis. 6 (PIA) — Muling nagpaalala ang Department of Trade and Industry  (DTI) – Romblon sa mga mamimili ngayong pasko na mag-ingat o siguruhing may kalidad at ligtas ang mga bibilhin hindi lamang sa pagbili ng Christmas lights kundi sa mga appliances, electrical supplies, construction materials, sanitary wares, monobloc chairs, stools at iba pa.

 

Suriing mabuti kung mayroong markings ang mga nasabing produkto para matiyak na pumasa  ito sa Product Standards.

 

Hinihikayat din ng DTI Romblon ang mga mamimili na agad magsumbong sa kanilang tanggapan kapag may pag-abuso o paglabag silang naobserbahan sa mga pamilihan at kapag may reklamo ay maaaring bisitahin ang kanilang opisina sa Sitio Cocoville, Barangay Dapawan, Odiongan, Romblon.

 

Samantala, tinatayang aabot sa P60,000 ang halaga ng nasabat na christmas lights na walang PS markings / ICC stickers ang nasamsam ng Department of Trade and Industry (DTI) – Mimaropa  Regional Monitoring and Enforcement Team sa apat na tindahan sa bayan ng Odiongan kamakailan.

 

Ang pagkakumpiska sa mga walang marka na christmas lights ay resulta ng ginagawang inspeksiyon at monitoring ng mga tauhan ng DTI sa lalawigan ng Romblon.

 

Ayon sa DTI Mimaropa Regional Monitoring and Enforcement Team, ang naturang mga christmas lights ay kulang ng kaukulang requirements o ibinebenta sa tindahan kahit na walang Import Commodity Clearance (ICC) Stickers o Product Standards (PS) markings kung kaya ito ay malinaw na paglabag sa Department Administrative Order No. 2 series of 2007. (PJF/DMM/PIA-MIMAROPA/Romblon)

Tagalog news: Istriktong implementasyon ng batas sa pagsusuot ng helmet, iniutos ng DILG

LUNGSOD NG CALAPAN, Oriental Mindoro, Dis. 6 (PIA) – Iniutos kamakailan ng Department of the Interior and Local Government (DILG) ang istriktong implementasyon ng batas hinggil sa pagsusuot ng helmet ng mga nagmamaneho ng motorsiklo at mga angkas nito.

 

Sa isang memorandum circular na ipinalabas ng DILG kamakailan, istriktong pagpapatupad ng batas ang kinakailangang gawin na naaayon sa RA 10054 o ang pag-uutos sa lahat ng motorcycle riders na magsuot ng helmet bilang proteksyon sa pagmamaneho.

 

Inaatasan ng DILG ang mga lokal na opisyal, maging ang mga punong barangay na ipatupad ang nasabing batas sa kani-kanilang nasasakupan at isiguro ang pagsunod sa mga probisyon na nakapaloob dito.

 

Matatandaan na ang RA 10054 ay nilagdaan noong Marso 23, 2010 ni dating Pangulong Gloria Macapagal-Arroyo. Layunin ng batas na ito na isiguro ang kaligtasan ng mga operator o nagmamaneho ng motorsiklo at kanilang mga angkas sa lahat ng oras sa pamamagitan ng mandatory enforcement ng paggamit ng standard protective helmet sa pagmomotorsiklo. Ang standard protective helmet ay dapat naaayon sa specifications na itinakda ng Department of Trade and Industry (DTI).

 

Samantala, nagpalabas din ang DILG Mimaropa ng kaugnay na memorandum na nag-uutos sa mga Provincial Director, City Directors, Municipal at City Local Government Officers, at iba pang konsernadong ahensya para sa malawakang pagpapakalat ng kaalaman hinggil sa nasabing kautusan.  (LTC/CPRSD/PIA-Mimaropa/Calapan)

Tagalog news: 35 katao, sinanay upang maging Construction Safety Officers

ODIONGAN, Romblon, Oktubre 19 (PIA) — Tatlumpo’t lima katao kamakailan ang nakapagtapos sa kursong Construction Occupational Safety & Health (COSH).
Ang naturang pagsasanay ay pinangunahan ng Department of Labor and Employment (DOLE)-Romblon sa pakikipagtulungan ng Corporate Occupational Safety and Health Environment Association of the Philippines (COSHEMAP). Ito ay nilahukan ng mga civil engineer ng iba’t ibang construction firm sa lalawigan, ilang inhenyero ng Department of Public Works and Highways (DPWH) Romblon Engineering District at ilang kawani ng Bureau of Fire Protection at Local Government Units.

Layunin ng kursong ito na mabigyan ng sertipiko ang mga lumahok bilang patunay na kanilang nakakompleto ang itinakdang oras ng pagsasanay sa construction safety and health at may sapat ng kaalaman ukol sa pagpapatupad ng OSH sa industriya ng konstruksiyon at marunong mag-analisa hinggil sa risk &hazard, kayang gumawa ng tamang ebalwasyon, control & risk management.

Ang COSH ay 40-oras na pagsasanay na ipinatutupad ng DOLE-BWC bilang mandatory requirement para sa mga taong nais maging safety practitioner sa isang pagawaan o construction sites na titiyak at mangangalaga sa kaligtasan ng mga nagtatrabaho dito.(PJF/DM/PIA-MIMAROPA/Romblon)