Category Archives: Palawan

Tagalog news: 2.69-B badyet ng LGU-Palawan para sa 2018 aprubado na

PUERTO PRINCESA, Palawan, Enero 30 (PIA) — Aprubado na ang 2018 badyet ng pamahalaang panlalawigan ng Palawan na nagkakahalaga ng nasa P2.69 bilyon matapos lagdaan ito ni Gob. Jose Ch. Alvarez kamakailan.

Ang badyet ng pamahalaang panlalawigan ay nakapaloob sa Provincial Ordinance No. 1893 na pinagtibay sa ika-74th regular session ng sangguniang panlalawigan.

Pinakamalaking bahagi nito ay napunta sa general public services na umabot sa P1.160 bilyon kung saan kasama dito ang magiging sweldo ng mga empleyado ng Kapitolyo at iba pang manggagawa ng pamahalaang panlalawigan.

P1.080 bilyon naman ang inilaan para sa social services at poverty alleviation na naglalayong mai-angat ang pamumuhay ng mahihirap na Palawenyo. Kasama rin dito ang pondo para sa mga proyektong pangkalusugan, imprastruktura, edukasyon at iba pa. Samantalang P4.57 milyon naman ang inilaan para sa economic services.

Dahil dito, puspusan ang ginagawang kampanya ng Tanggapan ng Ingat Yaman para sa pangongolekta ng buwis ngayong taon upang matugunan ang mga proyektong popondohan ng pamahalaang panlalawigan. (OCJ/MIMAROPA, Palawan)

Advertisements

Tagalog news: Palawan kasama sa 13 bansa na may ‘bluest water’

PUERTO PRINCESA, Palawan, Enero 30 (PIA) — Nakasama ang Palawan sa inilathala ng ‘13 Bluest Water in the World’ ng Travel+Leisure Magazine, na nakabase sa New York, USA.

Ang mga pagkilalang ito sa Palawan ng nasabing babasahin ay ikinatuwa ng hepe ng Provincial Tourism Promotions and Development Office (PTPDO) na si Maribel Buñi.

Ayon kay Buñi, isa lamang itong patunay sa likas na gandang taglay ng lalawigan ng Palawan kung kaya’t dapat natin itong protektahan.

Dagpag pa ni Buñi na ang pagkilalang ito ay mababasa sa blog ni Melissa Locker sa Travel + Leisure magazine na may pamagat na “13 Places Where You Can See the Bluest Water in the World”, kung saan inilarawan ni Locker ang Palawan bilang “jungle-filled islands surrounded by stunning teal waters teeming with fish and coral reefs and an incredible array of lagoons, coves, and secret beaches”.

Partikular din na tinukoy ni Locker sa kanyang blog ang mayamang katubigan ng El Nido, Linapacan Island at Puerto Princesa Underground River.

Napabilang din ang Palawan sa ‘The 15 Best Beach Destinations to Visit in January’ ng nasabing magazine, partikular na tinukoy dito ang El Nido, Palawan na ayon sa babasahin ay may kalmado at malinaw na dagat tuwing buwan ng Enero na akma para sa mahilig mag-snorkeling at diving.

Itinuturing naman ng Provincial Tourism Officer ang pagkakasama ng Palawan sa mga listahang ito na malaking tulong upang lalo pang makahikayat ng mas maraming turista ang Palawan.

Matatandaan na sa nakalipas na dalawang taon ay kinilala rin ng Travel + Leisure Magazine ang Palawan bilang “World’s Best Island” para sa taong 2016 at 2017. (OCJ/PIA-MIMAROPA, Palawan)

Tagalog news: Malls sa Puerto Princesa pinagtatalaga ng upuan para sa sales reps

PUERTO PRINCESA, Palawan, Enero 29 (PIA) — Mabibigyan na ng pagkakataong makaupo ang mga sales person sa mga mall at malalaking tindahan sa Puerto Princesa na mahigit walong oras na nakatayo.

Ito ay kung mapagtibay na at maipatutupad ang panukalang ordinansa na inihain ni Konsehal Modesto Rodriguez ll sa sangguniang panlungsod kamakailan na nag-aatas sa mga establisyementong pang-negosyo na magtalaga ng upuang magagamit ng kanilang mga empleyado partikular na ang mga sales representative.

Nakasaad sa ordinansa ang pagbibigay ng tatlong minuto mula sa bawat oras ng trabaho ng mga empleyado upang makaupo habang ginagampanan ang kanilang trabaho.

“Ramdam natin kung gaano kahirap para sa mga sales representative ng mga mall ang maghapong nakatayo, kaya dapat bigyan din ng sila ng pahinga,” pahayag ni konsehal Rodriguez.

Kaugnay nito, pinulong na rin ng Committee on Labor and Employment ng kapulungan na pinamumunuan ni Konsehal Nesario Awat mga tagapamahala ng mga mall sa lungsod upang konsultahin kaugnay sa nilalaman ng ordinansa.

Sa ulat ng komite ni Awat sa plenaryo, payag naman aniya ang mga managers subalit iminungkahi ng mga ito na limitahan lang ang dami ng upuang ilalagay sa lugar na pinagtatrabahuan ng partikular na mga empleyado.

Dapat din anilang tukuyin ng Department of Labor and Employment (DOLE) at City PESO ang bilang ng mga itatalagang upuan.

Ang pamunuan ng mga mall na lalabag ditto ay pagmumultahin ng P2,000 sa unang beses, P3,000 sa pangalawa, P5,000 at maaaring pagkakulong ng anim na buwan naman sa ikatlong paglabag.

Samantala, aprubado na ang panukala sa ikalawang pagbasa ng konseho at hinihintay na lamang na mapagtibay, maaprubahan ng mga kinauukulan at maisapubliko bago tuluyang maipatupad. (LBD/PIAMIMAROPA-Palawan)

Tagalog news: Pagdedeklara ng ‘Indigenous People Rights Act Day’ isinusulong sa Palawan

PUERTO PRINCESA, Palawan, Enero 29 (PIA) — Isinusulong ng Sangguniang Panlalawigan ng Palawan ang panukalang magdideklara ng Indigenous Peoples Rights Act Day o ‘IPRA Day’ sa buong lalawigan.

Ayon kay Indigenous Peoples Mandatory Representative (IPMR) Joel P. Lumis Jr., ini-akda nito ang ordinansa na magdi-deklara sa Oktubre 29 ng bawat taon bilang IPRA Day dahil ito ang petsa kung saan napagtibay ang Republic Act 8371 o IPRA Law of 1997.

Layon ng hakbang na ito ni Lumis na mabigyan ng pagkakataon ang iba’t-ibang grupo o tribo ng mga katutubo sa buong lalawigan na ipagdiwang at ipakita ang mayamang kultura at tradisyon ng bawat katutuboat maipahayag ang kanilang mga karapatan.

Ang Palawanan ay mayroong mga pangunahing grupo ng katutubo na kinabibilangan ng Agutaynen, Batak, Cagayanen, Cuyonon, Molbog, Palaw’an, Tagbanua-Calamian, Tagbanua-Central at Tagbanua-Tandulanen.

Dagdag pa ni Lumis, ang IPRA Day ay hiwalay o iba pa sa ‘Buwan ng Pambansang Pagdiriwang ng mga Katutubong Pilipino’ at ang taunang IPMR Convention na ginaganap tuwing Disyembre.

Sa kasalukuyan ang panukalang ordinansa ay tinatalakay na sa Committee on Rules and Laws ng sanggunian. (OCJ/PIA-MIMAROPA/Palawan)

Tagalog news: LGU Palawan tumanggap ng 5M para sa mga biktima ng bagyong Vinta

PUERTO PRINCESA, Palawan, Enero 26 (PIA) — Tumanggap ang pamahalaang panlalawigan ng Palawan ng tsekeng nagkakahalaga ng P5 milyon mula sa Philippine Charity Sweepstakes Office (PCSO) kamakailan.

Ang nasabing halaga ay tulong-pinansiyal ng nasabing ahensiya para sa mga biktima ng nakaraang bagyong Vinta na nanalasa sa Palawan.

Pormal na tinanggap ito ni Gob. Jose Ch. Alvarez sa Kapitolyo mula kay PCSO General Manager Alexander F. Balutan at sinaksihan ito nina Mayor Norman Ong ng bayan ng Rizal, Vice Mayor Anakdikih Astami ng Balabac, PCSO-Palawan Manager Orly Batislaong at ilang kawani mula sa pamahalaang panlalawigan.

Pinasalamatan ni Gob. Alvarez ang PCSO para sa tulong na ibinigay para sa mga apektadong munisipyo sa lalawigan na nasalanta ng nagdaang bagyong Vinta, pagtikular na ang Mangsee Island. (OCJ/PIA-MIMAROPA/Palawan)

Tagalog news: Kumbensiyon ng IBP idinaos sa Puerto Princesa

PUERTO PRINCESA, Palawan, Enero 26 (PIA) — Sama-sama para sa isang kumbensiyon ang mga miyembro at opisyal ng Integrated Bar of the Philippines (IBP) na isinagawa sa lungsod ng Puerto Princesa.

Naging sentro ng talakayan dito ang West Philippine Sea (WPS) hango sa kanilang tema na “Charting a Course Forward: Utilizing and Preserving the Gains The Victory in the West Philippine Sea.”

Ayon kay Atty. Abdiel Dan Elijah Fajardo, national president ng IBP , pinili nila ang Puerto Princesa, Palawan para sa kanilang aktibidad sapagkat ito ang pinakamalapit sa mga pinagtatalunang lugar sa WPS .

“Ang mahalaga, panatilihin natin na buhay ang ating pag-asa doon sa mga isla o sa mga bato na ayon sa ‘The Hague’ ay atin at kasama sa ating teritoryo, dapat tayo lang ang nangangasiwa”, pahayag ni Fajardo sa panayam sa kanya ng Philippine Information Agency (PIA).

Samantala, isa sa mga naging panauhing pandangal sa ika-23 kumbensiyon ng house of delegates sina Kalihim Delfin Lorenzana ng National Defense na tinalakay ang isyu ng maritime sa WPS; at Senior Associate Justice Antonio Carpio ng Korte Suprema, na binigyang daan naman ang kasaysayan ng mga kaso patungkol ng WPS.

“Nandito tayo upang maintindihan nila kung ano ang ginagawa ng gobyerno sa ating West Philippine Sea, sa ating mga pag-aari dyan,” ani Lorenzana.

Tinalakay din sa kumbensiyon ang pagpapahalaga at pangangalaga sa kalikasan lalo na sa usapin ng pangisda na maaari ring mapakinabangan ng mga mamamayang Filipino kung tatalima lamang sa mga umiiral na batas ang mga ito. (LBD/PIAMIMAROPA-Palawan)

Tagalog news: 808 bagong guro sa Palawan nanumpa

PUERTO PRINCESA, Palawan, Enero 25 (PIA) — Nanumpa na ang nasa 808 mga bagong guro sa Palawan sa isinagawang 32nd Oath Taking Ceremonies for Professional Teachers kamakailan.

Isinagawa ang panunumpa sa Puerto Princesa City Coliseum na pinangasiwaan ni Hon. Paz I. Lucido, Vice-Chairperson ng Professional Regulatory Board of Professional Teachers mula sa Professional Regulation Commission (PRC)-Lucena sa pakikipagtulungan ng Pamahalaang Panlalawigan ng Palawan.

Ang panunumpa ay para sa mga gurong pumasa sa isinagawang September 2017 Licensure Examination for Teachers (LET).

Kasama sa mga nanumpa ang tatlong natatanging Palaweño na kabilang sa Top 10 ng 2017 LET na sina Maricar Daganio Dasmariñas, 4th placer; Krisxan Keshia Mendoza, 7th placer at Jude Matthew Diokno Bernal, 10th placer na pawang mga nagsipagtapos sa Palawan State University (PSU).

Sa Palawan ay may kabuuang bilang na 229 elementary teachers ang matagumpay na nakapasa at 579 naman ang secondary teachers.

Ang bilang ng pumasa mula sa Palawan ay bahagi lamang ng 37.77 porsiyentong passing percentage na naitala sa 27 testing centers ng PRC sa bansa kung saan isinagawa ang naturang eksaminasyon noong Setyembre 2017. Ito ay katumbas ng 70,824 indibidwal na pinalad na makapasa sa buong bansa mula sa kabuuang bilang na 187,527 na kumuha ng eksaminasyon. (OCJ/PIA-MIMAROPA, Palawan)