Category Archives: Palawan

Tagalog news: Provincial Rice Summit, idinaos sa Palawan

LUNGSOD NG PUERTO PRINCESA, Palawan, Okt 18 (PIA) — Pinangunahan ng Pamahalaang Panlalawigan ng Palawan ang pagsasagawa ng dalawang araw na rice summit kamakailan na naglalayong matugunan ang usaping kinakaharap ng mga magsasaka ng palay sa lalawigan.

Layon din ng summit na mabigyan ng update ang lahat ng magsasaka at iba pang kinauukulang ahensya at mga stakeholders sa kasalukuyang estado ng lalawigan pagdating sa sapat na suplay ng bigas.

Bilang bahagi ng programa, tinalakay ng mga kinauukulang ahensya ng pamahalaang nasyunal ang patungkol sa produksyon, teknolohiya, pagpapautang at pagbibigay puhunan, marketing, pagsasaliksik sa mga uri ng palay na angkop sa isang lugar at maging ang usapin sa irigasyon, pasilidad sa pagpapatuyo ng palay, at post harvest management.

Kaugnay nito, ayon sa Office of Provincial Agriculturist (OPA), sa kasalukuyan ay may 133 porsiyentong ‘rice sufficiency’ ang lalawigan na hangad pang mapataas pa sa susunod na taon.

Dito, ikinasa ang isang workshop na nilahukan ng mga magsasaka at nagbebenta, manggagawa at iba pang negosyanteng may kinalaman sa produksyon ng palay at industriya ng pagsasaka.

Hangad din ng summit na makabuo ng panlimang taong malawakang produksyon ng palay at planong pangkaunlaran.

Samantala, kabilang sa mga naglatag ng mga mahahalagang impormasyon kaugnay sa talakayan sa nasabing pagtitipon ang mga kinatawan mula sa National Irrigation Authority (NIA), Agricultural Credit Policy Council (ACPC), National Food Authority (NFA), Bureau of Plant Industry – National Seed Quality Control Services Division (PCIC), Philippine Research Institute (PhilRice), at Bureau of Soils and Water Management (BSWM). (LBD/PIAMIMAROPA-Palawan)

Advertisements

Tagalog news: ‘Palaw’an Highlanders Verbal Arts’, inilunsad

PUERTO PRINCESA, Palawan, Oktubre 13 (PIA) — Inilunsad kamakailan sa kapitolyo ng lalawigan ang isang aklat na may titulong “Palaw’an Highlanders Verbal Arts” o “Les Arts De La Parole Des Montagnards Palaw’an” sa wikang pranses.

Ang nasabing aklat isinulat ni Dr. Nicole Revel, isang pranses at Emeritus Professor of Linguistics sa Paris Descartes University. Isa rin syang Research Director sa Centre National de Researche Scientifique (CNRS), at miyembro ng CNRS Research Group “Languages, Music, Societies”.

Inilalarawan ng aklat ni Dr. Revel ang mayamang kultura ng mga katutubo na sumasaklaw sa pang-araw araw na pamumuhay, wika, at iba pang mga tradisyon na hindi pamilyar sa karaniwang mamamayan. Naglalaman din ito ng video footages na kuha sa mismong komunidad ng mga Pala’wan sa iba’t ibang mga bayan sa katimugang bahagi ng lalawigan.

Inilunsad ang naturang aklat sa Victoriano J. Rodriguez Multi-purpose Hall na dinaluhan ng mga pangunahing personalidad mula sa akademya at pamahalaang panlalawigan ng Palawan.

Mainit naman ang pagtanggap ng mga Palaweño kay Revel at ipinahayag na ang kanyang aklat ay isang mabuting paraan upang maipakilala ang kultura ng katutubong Pala’wan sa publiko.

Bilang pagkilala sa natatanging kontribusyoin ng banyagang manunulat ay ginawaran ng Governor’s Citation Award si Revel para sa kaniyang pagsisikap na maisulat ang mayamang kultura ng mga katutubo sa Palawan. Pinangunahan ni Ceasar Sammy Magbanua, Chief-of-Staff ng tanggapan ng gobernador ang pagbibigay ng pagkilala dito.

Sa mensahe ni Dr. Revel, kaniyang binigyang diin dito na ang layunin ng kaniyang aklat ay ang maipaalam sa mga taong nakatira sa siyudad kung ano ang mga tinatagong yaman sa mga kabundukan ng Palawan.

Ang bawat kopya ng Palaw’an Highlanders Verbal Arts ay nagkakahalaga ng €49 o may katumbas na Php 2,937. Pitong kopya ng nasabing aklat ang binili ng pamahalaang panlalawigan ng Palawan at ipinamahagi sa iba’t ibang institusyon sa lalawigan tulad ng National Museum-Quezon Branch, Palawan State University (PSU), Palawan Museum, Palawan Heritage Center, at iba pang mga institusyong may kinalaman sa kultura ng lalawigan ng Palawan. (OCJ/PIA-MIMAROPA, Palawan)

DTI-Palawan: Sundin ang ‘No Shortchanging Act

PUERTO PRINCESA, Palawan, Okt 12 (PIA) — Muling ipinaalala ng Department of Trade and Industry (DTI)-Palawan sa lahat ng mga nagmamay-ari ng mga establisyemento sa lungsod at lalawigan na dapat sundin at tumalima sa Republic Act 10909 o mas kilala bilang ‘No Shorchanging Act.’

Ang pagpaalala ay inihayag ni DTI-Palawan Provincial Director Rosenda G. Fortunado sa isinagawang press conference kamakailan kaugnay ng pag-obserba ng Consumers Consciousness and Welfare Month ngayong buwan.

Ayon kay Fortunado mahigpit na ipinagbabawal sa batas ang pagbibigay ng kulang o ang hindi pagsusukli kahit na ito ay maliit na halaga lamang; ang pagsusukli ng iba sa kasalukuyang salapi o currency na umiikot sa bansa; ang paghingi ng permiso sa mamimili na hindi na ibibigay ang sukli dahil sa walang barya o anumang kadalihalan at lalong ipinagbabawal ang pagbibigay ng kendi ng mga tinder o kahera ng mga tindahan, supermarket o grocery kapalit ng kulang na barya.

Sakop aniya ng naturang batas ang lahat ng mga rehistradong establisyemento at maging ang mga hindi rehistradong negosyo tulad ng mga maliliit na tindahan o tiangge at inaatasan din ang mga ito na magkabit ng pabatid na nagsasaad ng ‘Please demand for your exact change.’

Dagdag pa ni Fortunado na sa inilabas na Implementing Rules and Regulations (IRR) ng DTI na nilagdaan ni Sec. Ramon M. Lopez noong nakaraang taon ay sakop din ng naturang batas ang mga operator, drayber, konduktor ng mga public utility vehicle, mga driver ng pedicab, tricycles at e-trikes.

Dahil sa pagpapatupad ng naturang batas, inihayag ni Fortunado na wala nang dumudulog sa kanilang tanggapan ng reklamo hinggil sa kulang na sukli o kaya ay sukli na kendi ng mga establisyemento sa lungsod ng Puerto Princesa na dati nang inirereklamo noong mga nakalipas na taon dahil sa isyung ito.

Nanawagan din si Fortunado sa lahat ng mamimili na kapag may ganitong insidente ay bukas ang kanilang tanggapan upang tanggapin ang mga reklamo hinggil sa batas na ito. (OCJ/PIA-MIMAROPA, Palawan)

Tagalog news: Pagtatayo ng pasilidad ng pangisda sa isla ng Kalayaan sinisimulan na

LUNGSOD NG PUERTO PRINCESA, Palawan, Okt 10 (PIA) — Ibinuhos ngayon ng pamahalaang nasyunal sa pamamagitan ng Bureau of Fisheries and Aquatic Resources (BFAR) sa Isla ng Kalayaan sa West Philippine Sea (WPS) ang pagpapatayo ng mga pasilidad bilang suporta sa industriya ng pangisda sa lugar.

Sa press conference na naganap kamakailan, sinabi ni Assistant Regional Director Roberto Abrera ng Bureau of Fisheries and Aquatic Resources (BFAR) – Mimaropa na nagpapatuloy ngayon ang konstruksyon ng community fish landing center sa isla na nagkakahalaga ng Php 3 milyon.

Ang nasabing pasilidad ang siyang pagkakalagakan ng mga huling isda ng mga mamamalagi sa Isla ng Pag-asa.

Bukod dito magpapatayo rin ang ahensya ng ice plant na pinondohan ng Php10.5 milyon. “Nai-download na sa LGU ang pera, hinihintay na lamang natin ang design ng proyekto na manggagaling sa BFAR tapos i-implement na natin ‘yan,” pahayag ni Mayor Roberto del Mundo ng Kalayaan.

“Ang hangad natin dito ay dumami ang mangingisda sa WPS, maari silang dumayo doon at iwanan na muna ang mga traditional fishing ground dahil na-overfished na, sa Kalayaan, sagana sa isda,” dagdag pa ni Abrera.

Nauna nang namahagi kamakailan ang BFAR ng 25 bangkang de motor na may kumpletong kagamitan sa mga mangingisdang lumipat sa WPS mula sa lungsod ng Puerto Princesa, maliban pa sa iba pa nilang pangangailangan na ipinagkaloob din ng ahensya.

Samantala, upang maitala ang resulta ng mga programa at proyekto ng gobyerno sa industriya ng pangisda na sa bayan ng Kalayaan, magtatalaga ang lokal na pamahalaan ng fisheries monitoring officer. (LBD/PIAMIMAROPA-Palawan)

Tagalog news: Lugar na dapat iwasan sa Tubbataha, itinalaga ng Phl Coast Guard

LUNGSOD NG PUERTO PRINCESA, Palawan, Okt 10 (PIA) — Kasabay ng pagkakatalaga ng International Maritime Organization (IMO) sa Tubbataha Reefs Natural Park (TRNP) bilang ‘Particularly Sensitive Sea Area (PSSA)’ ay itinalaga rin ng Philippine Coast Guard (PCG) ang ‘Area to be avoided’ o lugar na dapat iwasan sa Tubbataha.

Sa inilabas na ‘Notice to Mariners Number ‎‎189-2017’ na nilagdaan ni PCG Lieutenant Commander Eugenio A. Federico, Acting Deputy Chief of Coast Guard Staff for Maritime Safety Services, CG-8 noong Setyembre 18 ay sinasabi dito na lahat ng klase ng mga sasakyang pandagat na nasa 150 gross tonnage pataas ay dapat na iwasan ang Tubbataha Reefs Natural Park sa lawak na 4,470 square kilometer alinsunod sa mga sumusunod na coordinates: 1) 09º 17’.75 N, 119º 47’.79 E; 2) 09º 04’.73 N, 120º 12’.76 E; 3) 08º 49’.63 N, 120º 13’.99 E; 4) 08º 29’.63 N, 119º 53’.16 E; 5) 08º 36’.15 N, 119º 35’.46 E; 6) 09º 11’.06 N, 119º 36’.67 E.

Sa press conference kamakailan sa Headquarters ng PCG-Palawan District, ay nilinaw ni Commodore Joselito A. Dela Cruz na ang pagtatalaga ng ‘Area to be avoided’ sa Tubbataha ay hindi nangangahulugan ng pagbabawal sa mga nabanggit na sasakyang pandagat na dumaan sa karagatang nasasakupan ng TRNP kundi mayroon lamang lugar na dapat iwasan.

Inaabisuhan din ng PCG ang lahat ng mga naglalayag na sasakyang pandagat na gumawa ng mga kaukulang pag-iingat kapag dumadaan sa lugar ng TRNP upang maiwasan ang pagkasira ng mga korales at yamang dagat sa lugar.

Ang hakbang na ito ng PCG ay upang hindi na muling mangyari pa ang kahalintulad na insidente ng pagkakasadsad sa bahura ng US Navy Minesweeper noong 2013 at ng barkong pangisda ng mga tsino na nagdulot ng malaking pangkasira ng yamang dagat at mga korales sa Tubbataha. (OCJ/PIAR4B/Palawan)

Tagalog news: Binaril na punong brgy sa El Nido pinarangalan ng DENR

LUNGSOD NG PUERTO PRINCESA, Palawan, Oktubre 6 (PIA) — Ginawaran ng parangal na ‘Bayani ng Kalikasan’ ni Environment Secretary Roy Cimatu ng Department ang namayapang punong barangay ng Villa Libertad, bayan ng El Nido, Palawan na si Ruben Arzaga.

Ito ay matapos na personal na bisitahin ng kalihim ang labi ni Arzaga kamakailan sa nasabing barangay at iniabot ang karangalan.

“Saludo ako kay Kapitan Ruben, isinakripisyo niya ang kanyang buhay para protektahan ang ating kapaligiran. Dahil dito, itinuturing natin siyang bayani ng kalikasan,” ani Cimatu.

Kabilang sa local environmental law enforcement team si Arzaga na napaslang matapos pag-initan ng ilang mga nasagasaan nitong ilegal na namumutol ng punongkahoy sa nasasakupang barangay.

Sa imbestigasyon ng mga awtoridad, makailang beses nang hinuli ng grupo ni Arzaga ang mga pinutol na kahoy ng mga salarin sa tuwing nagsasagawa ng operasyon sa kabundukan ng Batbat sa nabanggit ding lugar.

Ang Bayani ng Kalikasan ay inisyatibo ni Cimatu na isang pagkilala na ibinibigay sa mga tauhan ng kagawaran na namamatay o nasugatan dahil sa pag ganap sa kanilang tungkulin upang protektahan ang kalikasan.

Bukod sa pagkilala, pagkakalooban din ng DENR ng scholarship sa kolehiyo ang anak ni Arzaga.

Samantala, nahuli na kamakailan ng El Nido Municipal Police ang mga suspek sa pamamaslang sa punong barangay na pawang mga residente sa lugar.

Agad ding naisampa ng mga awtoridad sa opisina ng Provincial Prosecutor ang mga kasong murder at attempted murder laban sa mga salarin. (LBD/PIAMIMAROPA-Palawan)

Tagalog news: Mga kagamitang pangsaka, ipinamahagi sa Puerto Princesa

LUNGSOD NG PUERTO PRINCESA, Palawan, Oktubre 6 (PIA) — Pormal na tinanggap kamakailan ng 12 samahan ng mga magsasaka sa iba’t ibang barangay ng Puerto Princesa ang mga kagamitang pangsaka na ipinagkaloob ng Department of Agriculture (DA).

Apat na asosasyon mula sa mga barangay ng Inagawan Sub, Kamuning, Manalo at Babuyan ang benepisyaryo ng tig-i-isang unit ng traktora.
Limang grupo ng mga magsasaka naman mula sa mga barangay ng Maruyugon, Luzviminda, Irawan, Sta. Cruz at Sicsican ang nabiyayaan ng tig-isang unit ng cultivator power tiller.

Tatlong unit ng trencher ang naipamahagi sa mga magsasaka ng Tagabinet, Inagawan-Kamuning Farmer’s Association at United Farmer’s Association ng Inagawan Sub.

Ang mga kagamitang pangsaka ay nagkakahalaga ng mahigit P4.7 milyon na pinondohan sa ilalim ng ‘bottom-up budgeting (BUB)’ ng Department of Agriculture (DA) katuwang ang lokal na pamahalaan.

Samantala, ang halagang ibinili ng naipagkaloob na mga kagamitang pansaka ay ikalawang bahagi na ng pondo para sa programa sa kasalukuyang taon. (LBD/PIAMIMAROPA-Palawan)