Category Archives: Palawan

Tagalog news: ‘Oplan Toksu’ inilunsad sa Puerto Princesa

PUERTO PRINCESA, Palawan, Enero 22 (PIA) — Naglunsad kamakailan ng ‘Oplan Tok-Tok, Suko’ (Oplan Toksu) ang Puerto Princesa City Police Office (PPCPO).

Kasunod ito ng pagtaas ng bilang ng hindi naisisilbing warrant of arrest sa mga indibiduwal na pinaghahanap ng batas.

Nakasaad sa konsepto ng operasyon ang pagkatok sa bahay ng mga wanted person, kakausapin ang pamilya o ang mismong indibiduwal na aarestuhin na sumuko na lamang sa mga awtoridad.

Layon ng stratehiyang ito ng lokal na pulisya na mapadali ang paghuli sa mga may nakabinbing warrant of arrest sa pamamagitan ng pakikipag-ugnayan sa komunidad, barangay at sa pamilya ng mga nagtatagong nasangkot sa krimen upang mapadali ang pagtukoy sa kinaroroonan ng mga ito.

Tutulong na rin sa operasyon maging ang iba pang tauhan ng PPCPO na hindi pa nabibigyan ng area of assignment.

“Kung dati ay iyong warrant officer lang natin ang nanghuhuli ng mga wanted o nagsi-serve ng warrant of arrest, ngayon, may binuo na tayong team, na kabilang ang mga tauhan natin mula sa iba’t ibang unit makikipag-usap sa komunidad,” tinuran ni Police Superintendent Ronnie Bacuel, deputy director for operations ng PPCPO at tumatayong commander ng Oplan Toksu.

“Pati iyong ating mga available personnel, pina-pa-utilize na ng ating direktor para puntahan iyong bahay ng mga may warrant, kasi baka iyong iba, magpa-piyansa na o nakapag-piyansa na,” ani pa ng opisyal.

Sa kasalukuyan, umaabot sa 301 ang bilang ng mga wanted person na naninirahan sa mga nasasakupang barangay ng lungsod na pasok sa jurisdiction ng Police Station 1 (Mendoza PNP), habang 181 naman sa Police Station 2 (dating Irawan PNP). (LBD/PIAMIMAROPA-Palawan)

Advertisements

Tagalog news: Mga SUC sa Mimaropa, sinanay sa pamamahala ng teknolohiya at commercialization

PUERTO PRINCESA, Palawan, Enero 18 (PIA) — Sumailalim sa tatlong-araw na pagsasanay sa teknolohiya at commercialization ang mga kinatawan mula anim na unibersidad at kolehiyo ng Mindoro, Marinduque, Romblon at Palawan (Mimaropa) kamakailan na isinagawa sa lungsod ng Puerto Princesa.

Ito ay sa bunsod ng pakikipagkasundo ng Department of Science and Technology (DOST) – Mimaropa sa Hanyang University ng Seoul, South Korea.

“Ang bottom line nito, matuto tayo na mag-commercialize ng ating mga outputs, para makatulong sa socio economic development, sa pamamagitan ng mga bagong hanapbuhay, bagong business, na mapapakinabangan din sa mga opisina at iba pang organisasyon”, ani Dr. Ma. Josefina Abilay, regional director ng DOST-Mimaropa sa Philippine Information Agency (PIA).

Anim na mga eksperto mula sa Hanyang University ang nagsilbing mga tagapagturo sa mga partisipante na kinatawan ng Mindoro State College, Marinduque State College , Romblon State University, Occidental Mindoro State University, Palawan State University at Western Philippines University.

“Ibinabahagi nila (resource persons) ang kanilang kaalaman, kung paano nila ginagawa ang kanilang mga teknolohiya at commercialization”, dagdag pa ni Direktor Abilay.

Hangad din ng DOST na mapaangat ng husto ang kaalaman ng mga mananaliksik sa rehiyon upang magamit ng gobyerno at mapakinabangan ng lipunan ang mabubuong resulta ng mga ito.

Samantala, ani Abilay, ikalawang beses nang nangasiwa ang DOST ng parehong pagsasanay, kung saan sa naunang pagkakataon ay naging kabahagi ng kagawaran ang mga lokal na tagapagturo.

Bukod sa training workshop, nakapaloob din sa pakikipag-kasundo ng DOST ang pakikipag-palitan ng mga estudyante, guro at maaari ring bumuo ng kurikulum base sa pamamahala ng teknolohiya. (LBD/PIAMIMAROPA-Palawan)

Tagalog news: ‘Bring Home a Friend’ program ng DOT inilunsad sa Puerto Princesa

PUERTO PRINCESA, Palawan, Enero 16 (PIA) — Naglunsad ang Department of Tourism (DOT)-Mimaropa ng programang ‘Bring Home a Friend’ noong kamakailan sa lungsod ng Puerto Princesa.

Ang ‘Bring Home a Friend’ ay isang programa kung saan inaanyayahan ng mga kababayan ang kaniyang mga dayuhang kaibigan o kamag-anak na magbakasyon sa Pilipinas.

“Ang hakbang na ito ay naghahangad na dumami ang ating mga bisitang dayuhan sa ating bayan na magpapaangat lalo ng turismo”, ani Danilo Intong, regional director ng DOT-Mimaropa.

Ayon sa DOT, tatakbo ang programa mula Oktubre 15 – Abril 15 at inaasahang maipagpapatuloy pa sa mga susunod na taon.

Samantala, inilatag ng DOT ang proseso upang makasali sa programa. Dito, kinakailangan muna ng isang sponsor na Filipino na magpa-rehistro ng kaniyang detalye sa http://www.bringhomeafriend.online at pagkatapos ay pupunuan nito ang imbitasyon na siyang ipadadala sa dayuhang kaibigan.

Upang may katibayan sa naging biyahe ng inimbitahang dayuhan, kinakailangan niyang i-upload sa website ang kaniyang boarding pass, pagkatapos ng kaniyang naging biyahe saan mang bahagi ng bansa.

Ang bilang ng entries ay naka-depende sa pinanggalingan ng inimbitahang dayuhan. Maaring magkaroon ng isang entry ang mga bisitang nanggaling sa Asya, habang dalawang entries naman ang nagmula sa Australia at Oceania.

Tatlong entries ang maaaring makuha ng mga turistang nanggaling sa Middle East, Europe at America.

Gaganapin ang raffle sa April 2018, kung saan ang mga Filipino sponsors ay maaaring manalo ng Megaworld condominium unit, isang brand-new Toyota Via, o halagang Php200,000 gift certificate mula sa Duty Free Philippines.

Posible ring manalo ng tiket na roundtrip sa international at domestic at tour packages sa Palawan Cebu o Davao ang inimbitahang dayuhan.

Kaugnay nito, positibo si Puerto Princesa City Mayor Lucilo Bayron na may malaking bentahe ang programa ng DOT para sa lungsod lalo pa’t ang turismo ang pangunahing industriya dito.

“Makakadagdag po ng malaki sa turismo ng Puerto Princesa ang programang ito, if we bring home our friends here, tataas ang ating tourist arrivals” pahayag ni Mayor Bayron.

Ani Bayron, sa kasalukuyan, limang porsiyento lang ang itinataas ng tourist arrival sa lungsod, subalit kung makakapagdala ang mga mamamayan ng grupo na binubuo halimbawa ng sampung turista, doble ang i-aangat nito. (LBD/PIAMIMAROPA-Palawan)

Tagalog news: BRP Tarlac dumating na sa Puerto Princesa

PUERTO PRINCESA, Palawan, Enero 15 (PIA) — Sa pamamagitan ng isang seremonya na pinangasiwaan ng Naval Forces West (NavForWest), sinalubong ng puwersa ng Western Command (WesCom) at mga opisyal ng pamahalaang lungsod ng Puerto Princesa ang mga opisyal at tauhan ng landing dock vessel (LD601) na BRP-Tarlac na dumating noong Enero 10 sa lungsod.

Ito ang kauna-unahang port call bilang bahagi ng logistic run mission ng barko ng Philippine Navy (PN) para sa kasalukuyang taon.

Lulan ng BRP-Tarlac ang logistical supplies para sa 3rd Marine Brigade na naka-base sa norte at sur ng Palawan, maging ang mga suplay para sa operasyon ng Naval Special Operations Unit-4.

“Ibababa natin dito ang mga tangke at iba pang kagamitan para sa mga marines, para sa pag-augment ng security sa Palawan,” ani Cmdr. Lito Lagadia ng PN, commanding officer ng BRP-Tarlac.

“Ang mg kargamentong ito ay kailangan para sa pagtupad sa tungkulin ng ating mga personnel na nagsusulong ng kapayapaan sa ating lalawigan,”dagdag pa ng opisyal.

Bahagi rin ng misyon ng barko ang pagdadala ng mga relief goods para sa mga mamamayan ng lalawigan mula sa ‘Support Your Navy Foundation, Inc. (SYNFI) at Headquarters ng Philippine Marine Corps.

Binuksan naman sa publiko noong Enero 11 ang barko ng gobyerno upang maipakita sa mga mamamayan ng lungsod ang kakayahan nito bilang isang landing dock platform ng bansa.

“The reason why we are gathered here, is to showcase the beauty and capabilities of one of the assets of the Philippine Navy (Kaya tayo nandito at nagtitipon ay para ipamalas ang ganda at mga kapasidad ng isa sa mga pagaari ng Philippine Navy),” tinuran ni deputy commander Dorvin Legazpi ng WesCom.

Ang BRP Tarlac ay isa sa dalawang barkong landing dock ng PN na kinomisyon noong June 2016.

May kakayanan ang mga landing dock na ito maging ang BRP Davao del Sur (LD602) ay nagsisilbi ring floating command at control center lalo na sa mga kinakailangang sitwasyon, ginagamit sa pagsasagawa ng Humanitarian Assistance and Disaster Response (HADR) at ilan pang mga kailangang gawain at misyon ng militar. (LBD/PIAMIMAROPA-Palawan)

Tagalog news: BFAR-Palawan, nangangalap ng benepisyaryo para sa Fisheries Scholarship Program

PUERTO PRINCESA, Palawan, Enero 14 (PIA) — Magbibigay ang Bureau of Fisheries and Aquatic Resources (BFAR)-Mimaropa ng mga pagsusulit upang makakalap ng mga maaring benepisyaryo ng Fisheries Scholarship Program (FSP) sa lalawigan ng Palawan.

Ang FSP ay may dalawang bahagi partikular na ang Fisheries Industry Leaders (FIL), na kinabibilangan ng mga estudyanteng pasok sa top 10 sa kanilang klase; at Fisherfolk Children Educational Grant (FCEG) na para naman sa mga anak ng karaniwang mangingisda.

Inilaan ang programa para sa mga magtatapos pa lamang o nagtapos na ng sekondarya na interesadong kumuha ng apat na taong kursong Bachelor of Science in Fisheries.

Sa buong rehiyon, tatlo ang maaring mapagkalooban ng programa ng FIL, habang 20 naman ang tatanggapin sa FCEG.

Samantala, suportado ng FSP ang libreng matrikula at iba pang bayarin na kinakailangan sa curriculum. Buwanan ding tatanggap ang benepisyaryo ng halagang Php4,000 at book allowance na Php2,000.

Kung ang benepisyaryo ay nasa estado na ng pagtatapos sa kolehiyo, magkakaloob din ang programa ng halagang Php7,000 bilang suporta sa thesis nito at Php1,500 para sa graduation.

Kasalukuyang nangangalap ng aplikante para sa nasabing programa ang BFAR para sa ika-22 competitive examination sa buong bansa na isasagawa sa darating na Pebrero 24.

Magtatapos naman ang pagtanggap ng aplikasyon bago sumapit ang Enero 30 na isusumite sa mga opisina ng BFAR. (LBD/PIAMIMAROPA-Palawan)

Tagalog news: Magbaracarma Road sa Aborlan sisimulan na

PUERTO PRINCESA, Palawan, Enero 11 (PIA) — Sisimulan na ang pagko-konkreto ng Magbabadil, Baraki, Cabigaan at Mabini o Magbaracarma Road sa Bayan ng Aborlan matapos ang isinagawang groundbreaking ceremony nito kamakalawa.

Ang walong kilometrong kalsada ay magkokonekta sa apat na barangay ng Aborlan, Palawan na kinabibilangan ng mga barangay ng Magbabadil, Baraki, Cabigaan at Mabini patungo sa national highway.

Mahigit sa P116 milyon ang pondong inilaan ng Department of Interior and Local Government (DILG) sa proyektong ito sa ilalim ng Conditional Matching Grant for Provinces o CMGP dahil sa pagkamit ng lalawigan ng Palawan ng “Seal of Good Housekeeping.”

Inaasahang matatapos ang proyekto sa loob ng 250 araw matapos isagawa ang groundbreaking nito.

Magiging mas madali na para sa mga residente ng mga nabanggit na barangay ang pagbiyahe ng kanilang mga produkto agrikultura at iba kapag natapos na ang pagsasaayos at pakokonkreto ng kalsada patungo sa kabayanan.

Pinangunahan ni Gov. Jose Ch. Alvarez ang groundbreaking ceremony kasama ang mga opisyales ng apat na barangay na benepisyaryo ng proyekto at si Municipal Local Government Operation Officer (MLGOO) Leny P. Escaro.

Dumalo rin dito sina 3rd District Congressman Gil P. Acosta, 3rd District Board Member Albert G. Rama, at Aborlan Mayor Jaime M. Ortega.

Pinangunahan naman ni Rev. Fr. Joseph Cacacha ang pagbabasba ng proyekto. (OCJ/PIA-MIMAROPA, Palawan)