Category Archives: Oriental Mindoro

Tagalog news: Batang Mindoreño, International Math Wizard Challenge awardee

NAUJAN, Oriental Mindoro, Agosto 16 (PIA) – Nakabilang ang isang walong taong gulang na Mindoreño sa 19 kataong delegado ng Pilipinas na nanalo ng ikalawang puwesto sa Xiamen, China na lumaban sa International Mathematics Wizard Challenge kamakailan lamang.

Si Vinz PJ Zara Rayos, anak ni Engr. Vedasto P. Rayos at Annie Zara Rayos, tubong Brgy. Tagumpay, Naujan ay silver medalist kung saan isa siya sa may 200 delegado na ipinadala ng bansang Pilipinas sa Xiamen, China.

Dagdag dito, silver awardee rin si Rayos sa nilahukan niyang Singapore and Asian Schools Math Olympiad at nakasama rin na lumahok sa “Singapore International Math Olympiad Challenge”.

Nagtamo rin si Rayos ng distinction at credit awards sa English, Math at Science, ayon sa pagkakasunud-sunod mula sa paglahok niya sa International Competitions and Assessments for Schools, isang pagsusulit mula sa University of South Wales Global Australia na ginanap sa mga piling Mathematic Trainer’s Guild Centers sa bansa.

Ayon kay Rayos,  bata pa lamang siya, hilig na talaga niya ang Math. Isang malaking oportunidad sa kanya ang mga nabanggit na pambansa at maging ang mga patimpalak sa labas ng bansa sa mga kabataan. (CPRSD/LTC/PIA-Mimaropa/Calapan)

Tagalog news: 5 bayan sa OrMin, pinarangalan sa maayos na koleksyon ng buwis

LUNGSOD NG CALAPAN, Oriental Mindoro, Agosto 11 (PIA) – Limang bayan sa lalawigan ang pinarangalan kamakailan ng pamahalaang panlalawigan dahil sa mahigit 100 porsiyentong collection efficiency ng mga ito sa real property tax (RPT) noong nakaraang 2016.

Nakuha ng Puerto Galera ang Rank 1 sa collection efficiency na 200.25 porsiyento. Sa target na P15.419 milyon, umabot sa P30.876 milyon ang kanilang total RPT collection.  Tinanggap ni  Municipal Treasurer Crisol R. Calda ang plake para sa kanila ni Mayor Rockey D. Ilagan.

Rank 2 ang Gloria na may 158.68 posiyentong collection efficiency.  Sa target na P7.230 milyon, naabot nila ang P11.472 milyon RPT collection. Tinanggap naman ni Municipal Treasurer Merlita M. Larga ang plake nila ni Mayor German D. Rodegerio.

Nakamit ng Roxas ang Rank 3 na may 126.64 porsiyentong collection efficiency. Umabot sa P12.411 milyon ang kanilang RPT collection mula sa target na P9.8 milyon. Si Municipal Treasurer Luz F. Lago ang tumanggap ng plake nila ni Mayor Violeta L. Dimapilis.

Nasa Rank 4 ang bayan ng Naujan na may 123.21 milyon collection efficiency dahil sa P21.583 milyon RPT collection mula sa target na P17.518 milyon.  Ang plake nila ni Mayor Mark N. Marcos ay tinanggap ni Municipal Treasurer Arleen B. Gutierrez.

Samantala, Rank 5 naman ang Bansud na may 120.85 porsiyento collection efficiency.  Mula sa target na P5.996 milyon, umabot sa P7.246 milyon ang kanilang RPT collection.

Ayon kay Officer-In-Charge Provincial Treasurer Astronica G. Salcedo, ito ang kauna-unahang pagkakataon na nagkaloob ng ganitong parangal ang Pamahalaang Panlalawigan.

Pinangunahan ni Gob. Alfonso V. Umali, Jr. kasama sina OIC-Office of the Provincial Administrator Dr. Romeo G. Infantado,  OIC-Provincial Treasurer Salcedo at Provincial Assessor Onisimo Naling ang paggawad ng plake ng pagkilala sa simpleng seremonya na ginanp sa Halcon Hall ng Kapitolyo.

Ayon kay Infantado, pangunahing layunin ng pagkakaloob ng ganitong pagkilala ay upang magpursigi pa ang mga munisipyo na pataasin ang kanilang koleksyon ng buwis partikular ang RPT na siyang pinagkukunan ng malaking revenue ng lalawigan.

“Congratulations for a job well done,” ang ipinaabot ni Gob. Umali sa mga municipal treasurer.  Sinabi pa ng gobernador  na hinihikayat niya ang mga pamahalaang bayan sa lalawigan na magpursigi upang makakuha rin ng Seal of Good Local Governance (SGLG) mula sa Department of the Interior and Local Government (DILG) sapagkat maraming proyekto ang kaloob ng naturang parangal.

Ayon pa sa gobernador, nakatakda ring magbigay ng katulad na award ng SGLG ang Pamahalaang Panlalawigan na planong simulan sa Founding Anniversary ng lalawigan sa darating na ika-15 ng Nobyembre.  Ang criteria na gagamitin ay mula sa SGLG at Galing Pook.  Makatatanggap din, aniya, ng cash prize ang mapipiling Most Outstanding Municipality gayundin P1 milyon sa iba pang kategorya tulad ng agriculture, tourism at financial housekeeping.  Bukod pa rito, nasa plano rin ang paghirang sa 10 outstanding barangay sa lalawigan.

Binanggit din ng gobernador ang ilang public private partnership projects na ipatutupad sa natitira pang dalawang taon ng kanyang panunungkulan.

Ilan sa mga ito ay ang Provincial Demonstration Farm sa Barangay Merit, Victoria na gagawing agri-tourism center, ang pagtatayo ng Mindoro Railway System na magkokonekta sa Oriental at Occidental Mindoro, ang pagdurugtong sa 69KV transmission line ng National Power Corporation upang masuplayan ng kuryentre ang buong isla ng Mindoro at ang paglalagay ng solar energy sa Kapitolyo at Oriental Mindoro Provincial Hospital (OMPH).

Samantala, ipinagkaloob naman nina OIC-Provincial Treasurer Salcedo at Provincial Assessor Naling kay Gob. Umali ang plake ng pagkilala na nilagdaan ni OIC-Regional Director Aida B. Abregana ng Department of Finance Mimaropa dahil sa malaking suportang ipinagkaloob ng Pamahalaang Panlalawigan sa Lungsod ng Calapan na nakakuha rin ng mahigit sa 100 porsiyentong collection efficiency sa kanilang RPT collection noong 2016.

Tumanggap din ng plake ng pagkilala mula sa nabanggit na ahensya sina OIC-Provincial Treasurer Salcedo at Provincial Assessor Naling dahil sa naabot na 113 porsiyentong collection efficiency ng lalawigan.  Mula sa total revenue target na P143.73 milyon ng lalawigan, umabot ito sa P162.28 milyon total revenue collection. (CPRSD/LTC/PIA-Mimaropa/Calapan)

Tagalog news: Nominasyon ng Gintong Kabataan Awards (GKA) sa OrMin, bukas na

LUNGSOD NG CALAPAN, Oriental Mindoro, Agosto 9 (PIA) – Bukas na sa publiko ang nominasyon para sa Gintong Kabataan Awards (GKA) na magpaparangal sa mga kabataang naging malaki ang ambag sa kanilang sektor.

Ang GKA ay may layunin na bigyang-pagpapahalaga ang mga kabataang nagkaroon ng malaking kontribusyon sa larangan ng iba’t ibang kategorya tulad ng leadership o public service, sports excellence, science at arts. Para naman sa group category, paparangalan ang Outstanding Sangguniang Kabataan na magmumula sa Barangay at Municipal levels.

Ginagawa ang naturang pagpaparangal tuwing ika-tatlong taon upang mahikayat ang mga kabataan na magpamalas nang galing sa iba’t ibang larangan at higit pang maipakita ang kanilang kakayahan at talento na magagamit nila sa hinaharap.

Ang mga nais lumahok sa naturang patimpalak ay dapat nasa edad 15-30 anyos, na suportado ng kopya ng kanilang birth certificate.

Kinakailangang tubo at laking Oriental Mindoro, may Barangay Clearance at Community Tax Certificate bilang mga patunay.

May good moral character na susuriin o titingnan sa pamamagitan ng pagmomonitor at ebalwasyon sa mga ito.

Kinakailangan ding kumpletuhin ang mga sumusunod na dokumento: application form na may 2 x 2 picture, mga nagawa o nadaluhang pagsasanay, mga natanggap na karangalan o citation, mga nasalihang outreach program, personal na pahayag na nagawa ng lalahok sa patimpalak, lagda ng lalahok sa patimpalak at ng taong nag-indorso o nag-nominate, at iba pa.

Ayon sa komite ng patimpalak, ang deadline ng pagsumite ay sa ika-25 ng Agosto 2017, hanggang 5:00 P.M.

Maaaring ipasa ang mga dokumento sa Office of the Governor, Special Concerns Division (SCD), Provincial Capitol Complex, Calapan City.

Para sa iba pang katanungan, maaaring tumawag sa mga numerong 286-7301/ 09178048570 at 09178156858 at hanapin si Supervising Administrative Officer Roberto O. Mendoza ng SCD. (CPRSD/LTC/PIA-Mimaropa/Calapan)

Tagalog news: Number games sa OrMin, ipinatitigil na ni Gob. Umali

LUNGSOD NG CALAPAN, Oriental Mindoro, Agosto 9 (PIA) – Ipinatitigil na ni Gob. Alfonso V. Umali, Jr. ang lahat ng uri ng  “number games” na nag-ooperasyon sa buong lalawigan para na rin sa pangkalahatang kaayusan at kabutihan ng nakararaming mamamayan sa Oriental Mindoro.

Ito ang nilalaman ng nilagdaan ng gobernador sa Memorandum No. 11 series of 2017 noong nakaraang Agosto 2 para sa lahat ng mga punong bayan at punong lungsod ng lalawigan na nag-uutos na ipatupad ang pagpapatigil ng lahat ng uri ng number games na nag-ooperasyon sa lalawigan kasama na ang Small Town Lottery at  Jai Alai.

Sa sulat na ipinadala ng punong lalawigan kay Philippine National Police (PNP) Provincial Director Senior Superintendent Christopher Birung, ang ipinalabas na memorandum ay bilang suporta na rin sa pagsisikap ng PNP na mapatigil at lipulin ang operasyon ng mga sugal sa bansa na kalimitang nagiging ugat ng korupsyon sa lipunan at nakaaapekto sa maayos na pamumuhay ng mga mamamayan.

Maliban sa pagdedeklara ng PNP ng  “all out war” kontra sa lahat ng uri ng iligal ng gawain kasama na ang   operasyon ng “number games”,  bahagi rin nito ang layunin ng kanyang pamunuan na matigil ang diumano’y paggamit sa mga legal na laro bilang “front” ng mga  iligal na nag-ooperasyon ng number games sa lalawigan.

Nakatakda ring hilingin ng ehekutibo sa lehislatibong sangay ng Pamahalaang Panlalawigan ang agarang pagpapasa nito ng resolusyon na sumusuporta sa naging posisyon ngayon ng ehekutibo sa  papalalang sitwasyon ng operasyon ng  number games.

Sa naging posisyong ito ni Gob. Umali, na suportado rin ng League of Mayors of the Philippines, Oriental Mindoro Chapter, hinihikayat ng kanyang pamunuan ang mamamayang Mindoreño na matutong maging masinop sa pananalapi partikular ang mga magulang at maging mabuting ehemplo ang mga ito sa kanilang mga anak, at maging sa mga kabataan,  ang maitaas at palakasin ang kahalagahan ng pagsisikap na maingat ang sarili sa pamamagitan ng pagtityaga sa pagtatrabaho at matutong pagyamanin ang kung anong mayroon lamang ang kanilang pamilya kung saan nakalaang tumulong naman ang Pamahalaang Panlalawigan sa pamamagitan ng iba’t ibang programa nitong kontra kahirapan para  sa mga may ganitong tamang gawi sa buhay.  (CPRSD/LTC/PIA-Mimaropa/Calapan)

Tagalog news: Mga minero ng Puerto Galera, bingyan ng alternatibong kabuhayan

PUERTO GALERA, Oriental Mindoro, Agosto 8 (PIA) – Pinagkalooban ng pamahalaang panlalawigan ng alternatibong kabuhayan ang mga minero sa halip na ipagpatuloy ang pagmimina sa kanilang lugar na lubhang mapanganib para sa kalikasan.

Ang programang Strategic Intervention Community-focused Action Towards Development (SICAD) ay nagkaloob ng sustainable livelihood projects para sa mga minero ng Puerto Galera.

Matatandaan na kamakailan lamang ay magkakatuwang na pinasimulan ng SICAD, Canada Fund for Local Inititives at pamahalaang lokal ng Puerto Galera ang 371 meters Mangrove Walkways na ngayo’y nagsisilbing atraksyon sa mga  turistang  dumarayo sa nasabing bayan.  Ang  mga  kasapi ng Samahang Pangkabuhayan ng Taga-Dulangan (SPTD) at Tabinay Puerto Galera Sagip Kalikasan at Kabuhayan (TPGSKK) ay  kumikita na ngayon  sa pagbabantay sa naturang walkway sa halip na mag-mina.

Nagbigay rin dito ng malaking tulong ang Malampaya Foundation Inc.(MFI) at Conservation International (CI) para sa katuparan ng proyekto.

Dahil sa hirap ng buhay ng mga minero at anila’y walang basta mapagkakitaan, pagmimina ang halos kinagisnan ng ikinabubuhay ng mga tao partikular ang mga taga-Brgy. Tabinay at Brgy. Dulangan, dalawa  sa 13 barangay na sakop ng bayan ng Puerto Galera.

Hindi nila alintana ang masamang dulot sa kalikasan ng small-scale mining basta kumita lamang at maitawid  ang pang-araw  araw  na pamumuhay. Ngunit kaaakibat nito ay ang pinangangambahang masakripisyo ang magandang kalikasan ng kanilang bayan at posibilidad ng panganib sa kanilang buhay.

Upang kagyat na masolusyunan ang suliranin hinggil sa pagmimina, pinangunahan ni Gob. Alfonso V. Umali Jr., sa pamamagitan ng SICAD ang mga istratehiyang aalalay sa small-scale miners.  Kaagad na nakipag-ugnayan ang  pamahalaang panlalawigan sa international agencies at non-government organizations (NGOs) upang tumulong sa pagkakaloob ng iba pang mga alternatibong pangkabuhayan para sa mga minero.

Pangunahing naging inisyatiba ng SICAD ang maipaunawa sa mga minero ang masamang epekto sa kalikasan ng kanilang itinuturing na magandang hanapbuhay. Nagsagawa ang SICAD ng information and education campaign (IEC), seminars at livelihood trainings para sa kapakinabangan ng maraming mamamayan.  (CPRSD/LTC/PIA-Mimaropa/Calapan)

Tagalog news: Fiber Industry sa OrMin, susuportahan ng LGU para lalong palakasin

LUNGSOD NG CALAPAN, Oriental Mindoro, Agosto 7 (PIA) – Susuportahan at palalakasin ng pamahalaang lokal ang industriya ng abaca sa lalawigan ng Oriental Mindoro.

Ito ang napagkasunduan kamakailan sa pagsasama-sama ng mga kinatawan ng pamahalaang lokal, mga ahensyang namamahala sa fiber industry, mamimili at mga magsasakang nagtatanim ng abaca sa isinagawang pagpupulong sa bayan ng Baco kamakailan.

Kabilang sa mga dumalo sa pagpupulong ang mga nagtatanim ng abaca na karamihan ay nagmula sa bayan ng Baco, mga pribadong kumpanya na namimili at nagpoproseso ng abaca fiber tulad ng Agri-Tech Integrated Services Company (ATISCO) at Albay Agro-Industrial Development Corporation (ALINDECO), ahensyang mula sa Kagawaran ng Pagsasaka tulad ng Philippine Fiber Industry Development Authority (PhilFIDA) at mula sa pribadong sektor na nagsusulong na muling makilala ang fiber industry sa Pilipinas.

Sa mensahe ni Baco Mayor Reynaldo Marco, hinihikayat niya ang mga magsasaka na pagbutihin ang pagtatanim ng abaca sapagkat ito, aniya, ang magbibigay sa kanila ng magandang kabuhayan.

Ipinaabot din niya ang kanyang taus-pusong pasasalamat sa lahat ng mga bisita at ipinaalala sa kanyang mga kababayan ang commitment ng bawat isa na gampanan ng maayos ang kanilang trabaho.

Naging panauhing pandangal at pangunahing tagapagsalita sa pagpupulong si Executive Director Kennedy T. Costales ng PhilFIDA na nagbahagi ng kasalukuyang sitwasyon at magandang hinaharap ng industriya ng abaca sa buong bansa.

“Ang abaka ay regalo ng Diyos sa ating lahat.  Mahabang panahon itong napabayaan ng mga nakaraang administrasyon subalit ngayon, sisiguraduhin naming payayamanin namin kayo. Tinatayang 85 porsiyento ang market share ng Pilipinas sa fiber production sa buong  mundo”, ayon kay Costales.

Idinagdag din niya na dahilan sa pandaigdigang mga programa at proyektong tumutugon sa panawagan na palaging isaalang-alang ang kalikasan, nagiging ‘in-demand’ ang abaca fiber bilang isang napakahalagang biodegradable material na lalong nagpalakas sa potensiyal ng fiber industry sa bansa.

Kumatawan kay Gob. Alfonso V.  Umali, Jr. sa nasabing pagtitipon si Provincial Government Consultant Jaime G. Nuevas, Jr.  Ayon kay Nuevas, buo ang suporta ng pamunuan ni Gob. Umali sa PhilFIDA na siyang nagtataguyod upang ang fiber industry ay maisulong sa lalawigan ng Oriental Mindoro na magbibigay ng karagdagang kabuhayan para sa mga mamamayan. (CPRSD/LTC/PIA-Mimaropa/Calapan)

 

Tagalog news: Ika-17 Pakapya Agtike Festival, idinaos sa bayan ng Socorro, OrMin

Socorro, Oriental Mindoro, Agosto 7 (PIA) – Idinaos kamakailan ng bayan ng Socorro ang ika-17 pagdiriwang nito ng kanilang Pakapya Agtike Festival.

Ang Pakapya Agtike ay isang tadisyunal na seremonya o ritwal ng pagpapasalamat ng mga katutubong Tadyawan Mangyan para purihin ang Maykapal sa mga produktong aning ipinagkaloob sa kanila sa panahon ng anihan.

Sa isinagawang pagdiriwang, nagwagi ang delegasyon ng Matungao Elementary School sa elementary category samantalang ang Mina De Oro Catholic School naman ang nakakuha ng unang pwesto sa high school division sa ginanp na 17th Pakapya Agtike Festival na kung saan parehong nakatanggap ng tropeyo at tig-P100,000 ang dalawang delegasyon.

Magkatuwang na pinangunahan nina Mayor Ma. Fe V. Brondial at Vice-Mayor Roy de Claro, kasama ang mga myembro ng Sangguniang Bayan, mga kawani at mga kalahok sa festival ang parada na nagtapos sa Socorro Central School kung saan ginanap ang kumpetisyon.

Sa kanyang mensahe, nagpasalamat si Brondial sa suporta at pakikipagtuwang ng Department of Education (DepEd) sa nasabing festival.  Hinikayat din niya ang kanyang mga kababayan na patuloy na suportahan at saksihan ang Pakapya Agtike Festival na, aniya, ay nagsimula noong mga unang taon ng kanyang panunungkulan bilang punumbayan ng Socorro. (CPRSD/LTC/PIA-Mimaropa/Calapan)