Category Archives: MIMAROPA

Tagalog news: DOST-Pagasa at NDRRMC, hinikayat ang publiko na abangan ang mga flood advisory o babala sa baha

LUNGSOD QUEZON, Enero 22 (PIA) — Paalala ng DOST-Pagasa sa mga kababayan, laging magmatyag at makipag-ugnayan sa barangay at sa disaster risk reduction and management office (DRRMO) sa tuwing umuulan.

Mula pa nitong Sabado ng gabi, nagpapalabas ng “General Flood Advisories” o abiso ukol sa pagbabaha ang Pagasa na siyang ipinakakalat naman ng National Disaster Risk Reduction and Management Council (NDRRMC) sa iba’t ibang ahensiya at kinauukulang sangay ng Office of Civil Defense (OCD).

Ayon sa DOST-Pagasa, nakakaapekto pa rin sa dulong hilangang Luzon ang hangin amihan bagamat inaasahan nilang hihina ito sa pagtatapos ng linggo.

Ang Easterlies naman ang makakaapekto sa nalalabing bahagi ng bansa; may dalang mainit na hangin ang Easterlies mula sa Silangan na siyang magiging sanhi ng pagkamaulap ng isang lugar.

Pag-maulap, may posibilidad na umulan.

Kapag tuloy-tuloy ang pag-ulan sa loob ng ilang araw, sa bundok man o kapatagan, ay napupuno ang mga ilog at mga sangay nito hanggang sa umapaw.

Ang Palawan ay makararanas ng mahina hanggang katamtamang pag-ulan at pagkulog-pagkidlat.

Kaya kung magtuloy-tuloy ang pag-ulan, ang mga ilog at sangay na maaring maapektuhan ng ilog-baha sa Palawan ay ang Abongan, Lian, Barabakan, Rizal, Caramay , Lagogona, Babuyan, Bacungan, Iwahig Penal, Inagauan, Aborlan, Malasgao, Apurauan, Banton-Banton, Aramayawan, Ihawig, Panitian, Pulot, Lamakan, Kinlugan, Eraan, Tiga Plan, Malabangan, Ilog, Bansang, Conduaga, Culasian, Ihawig (Brookes), Okayan, Canipan, at Busuanga, Coron.

Sa kabikulan, mahinang hanging ang iiral at makakaranas ng pulu-pulong pagkulog-pagkidlat.

Ang mga maaring maapektuhang ilog at sangay sa Kabikulan ay ang Cabuyan, Bato at Pajo (Catanduanes), Labo at Daet Basud (Camarines Norte); Lower Kibay, Catabangan, Ragay,Tinalmud, Tambang at Lagunoy (Camarines Sur); Guinale at Upper Donsol (Albay); Lanang, Mapayawan, Mandaong, Asid, Malbag, Guiom, Nainday, Daraga, Nauco o Aguada at Beleno; Lower Donsol, Ogod, Putiao, Cadacan, Banuang-duan, Fabrica (Tugbugan) at Matnog.

Ang Kanlurang Kabisayaan ay makararanas ng mahina hanggang manaka-nakang katamtamang pag-uulan at pagkulog-pagkidlat.

Ang mga maaring maapektuhang ilog at sangay sa rito ay ang Pinantan, Barotac, Aklaygan, Jalaud, Jalano, Jagdong, Jalaur, Lamunan, Jaro-Agaman, Sibalom at Guimbal (Iloilo); at Malogo, Sicaba, Grande, Himocaan, Danao, Upper Tyabanan, Sipalay at Lower Ilog (Negros Occidental).

Para naman sa Silangang Kabisayaan, kung saan mahina hanggang manaka-nakang katamtaman ang pag-uulan ang mararanasan, ang mga maapektuhang ilog at sangay ay ang Basey, Silanga, Calbiga at Jibatan (Samar); Sangputan, Palo, Salano (Quilot), Daguitan, Marabang, Cadacan, Bongquirogan, Salug, Pagnabagaran, Pagsangahan at Binahaan (Leyte); Bisay, Himbangan at Pandan (Southern Leyte); Oras, Dolores, Ulot, Taft, Borongan, Suribao, Llorento, Balangia at Sulat (Easter Samar).

Mahina hanggang katamtamang pag-ulan ang mararanasan sa rehiyon ng Caraga at ang mga ilog at sangay nito na maapektuhan ay ang Cantilan, Toracan, Tandag, Tago, Hubo-Oteiza, Hinatuan at Bislig (Surigao del Sur); Surigao at Magallanes (Surigao Del Norte); Lake Mainit-Tubay, Asiga, Agusan, Linugos at Cabadbaran (Agusan Del Norte).

Paanyaya ng DOST-Pagasa at NDRRMC, palagiang alamin ang mga ipinalalabas na flood advisories para makaiwas sa pinsala ng baha.

Pinaaalalahanan ang mga kababayang naninirahan sa mga dalisdis at mga lugar malapit sa mga nasabing ilog at sangay na maghanda at mag-ingat. (LP/PIA-Mimaropa)

Advertisements

Tagalog news: Clearing operation sa mga kalsadang napinsala ng Bagyong Agaton, nagpapatuloy

LUNGSOD QUEZON, Enero 3 (PIA) — May ilang mga road section sa kabikulan, Region VI at Region VII ang nililinis ngayon dahil sa landslide at iba pang mga pinsalang naiudulot ng pagdaan ng Bagyong Agaton.

Sa Calbayog City, Samar, may clearing operation na ipinatutupad sa Daang Maharlika- Calbayog-Allen Road (0705+500-K0705+520) Brgy. Malayog dahil sa mga nagkalat na bato.

Tuloy din ang clearing operation sa Kananga-Tungonan-Hot Spring Road, Leyte na isinarado dahil sa soil erosion.

Ang alternatibong ruta para dito ay ang Junction National-Brgy. Montebello-Aguiting-Lim-ao Road.

Binaha naman ang bahagi ng Jaro-Dagami-Burauen-Lapaz Road (K0951+500) naglagay na ang 2nd District Engineering Office ng mga warning signs at patuloy ang monitoring sa lugar.

Pinapayuhan ang mga motorista na iwasan muna ang Jaro-Dagami-Burauen-Lapaz Road at sa halip dumaan muna sa Tingib-Pastrana Provincial Road.

Naputol naman ang bahagi ng Junction Spur 16- Calantrava Road (K0079+750-K0079+808.50) sa Negros Occidental kaya isinara sa trapiko.

Nilagyan na rin ng mga babala ang nasabing lugar.

Sa Capiz, tatlong bahagi ng Iloilo Capiz Road (K093+000, K096+000 at K099+000) ang binaha dahil sa pagtaas ng mga ilog ng Mambusao at Panay.

Para hindi maabala, pinapayuhan ng DPWH ang mga motorista na gamitin ang Aklan-Capiz Road.

Tuloy-tuloy din ang clearing operation sa Catanduanes Circumferential Road (K0036+300-K0036+320, Brgy. Summit, Viga) at Baras-Gigmoto-Viga Road (K0043+300, Brgy. Dororian at K0047+000 – K0048+000 Brgy. Biong, Gigmoto) sa Catanduanes.

Sa Gubat, Sorsogon naman, nagsasagawa din ng clearing operation sa Ariman-Casiguran Road dahil nagka-landslide din sa dako ng Brgy. Bentuco (K0608+100-K0608+150). (LP/PIA-Mimaropa)

DOST-PAGASA: Bagyong Agaton, tatama anumang oras sa Dinagat Islands

LUNGSOD QUEZON, Enero 2 (PIA) — Inaasahan ng DOST-Pagasa na hahampas sa kalupaan ng Dinagat Islands ang Tropical Depression Agaton sa pagitan ng hatinggabi at mamayang ika-2 ng madaling araw.

May mga lalawigan sa ilalim ng Tropical Cyclone Warning Signal (TCWS) Number No. 1 ang nakararanas ng malalakas na pag-ihip ng hangin at pag-ulan sa kanilang mga lugar

Ang mga nasa ilalim ng TCWS No. 1 ay ang Palawan, Southern Leyte, Bohol, Southern Cebu, Siquijor, Southern Negros Oriental, Southern Negros Occidental, Surigao del Norte kabilang ang Siargao Island, Surigao del Sur, Dinagat Island, Agusan del Norte, Agusan del Sur, Davao del Norte, Compostela Valley, Misamis Oriental, Misamis Occidental, Lanao del Norte, Lanao del Sur, Camiguin, Bukidnon at Zamboanga del Norte.

Kaninang ika-10 ng gabi, namataan ang sentro ng Bagyong Agaton sa layong 80 kilometro silangan ng Surigao City, Surigao Del Norte.

Taglay ng bagyo ang lakas ng hangin na aabot sa 45 kilometro bawat oras malapit sa gitna at pagbugso na hanggang 60 kilometro bawat oras.

Kumikilos nang pa-kanluran hilagang kanlurang direksyon ang Bagyong Agaton sa bilis na 22 kilometro bawat oras.

Ang mga lalawigan na may babala ng bagyo ay makararanas ng kalat-kalat hanggang sa malawak na katamtaman hanggang sa napakalakas nap ag-ulan.

Pinag-iingat ng DOST-Pagasa ang mga kababayan sa mga nasabing lugar sa biglaang pagbaha at sa pagguho ng lupa at palagiang makipag-ugnayan sa kanilang mga lokal na pamahalaan. (LP/PIA-Mimaropa)

Tagalog news: NDRRMC, inatasan ang mga LGU na mag-pre-emptive evacuation dahil sa posibilidad ng pagbaha at landside

LUNGSOD QUEZON, Enero 2 (PIA) — Inatasan ng National Disaster Risk Reduction and Management Council (NDRRMC) ang mga regional disaster risk reduction and management councils at mga ahensiyang miyembro ng Council na magpatupad ng pre-emptive evacuation o kaya forced evacuation sa mga lugar na mataas ang posibilidad na bahain o pag-guhuan ng lupa (Lanslide) bunga ng pagdaan ng Bagyong Agaton.

Ayon kay NDRRMC Executive Director Ricardo Jalad, may mga lokal na pamahalaan ang nakapaglikas na ng mga kababayan bago pa man makaraan ang bagyo.

Sa isang panayam sa radyo, tiniyak din ni Undersecretary Jalad na tuloy-tuloy ang kanilang ugnayan sa iba’t ibang rehiyon para mabatid ang kanilang mga pangangailangan.

Sinabi ni Usec Jalad na unang aasikaso ang mga lokal na pamahalaan sa mga kababayang maaapektuhan at may mga nakaposisyon ng relief goods ang mga tanggapan ng Department of Social Welfare and Development sa mga rehiyon kabilang na ang Mimaropa.

Samantala, tumatawid ang Bagyong Agaton sa Bohol Sea ngayon.

Huling namataan ang sentro ng bagyo sa layong 95 kilometro silangan ng Tagbilaran City, Bohol taglay ng lakas ng hangin na 55 kilometro malapit sa gitna at pagbugso nang hanggang 90 kilometro bawat oras.

Nakataas ang Tropical Cyclone Warning Signal No. 1 sa Palawan,Southern Leyte, Bohol, Cebu, Siquijor, Guimaras, Negros Oriental, Negros Occidental, Surigao del Norte kasama ang Siargao Island, Agusan del Norte, Dinagat Island, Northern Misamis Oriental, Camiguin at Zamboanga del Norte. (LP/PIA-Mimaropa)

Tagalog news: DOST Pagasa: LPA maaring maging TD bago mag-landfall sa Caraga

LUNGSOD QUEZON, Enero 1 (PIA) — Maaring maging tropical depression o lumakas at maging ganap na bagyo muna ang Low Pressure Area na papalapit sa Eastern Visayas at kamindanawan bago mag-landfall sa Caraga, ayon sa DOST-Pagasa.

Ang unang landfall, ayon kay Weather Specialist Aldczar Aurelio, ay maaring mangyayari sa Caraga mamayang gabi o bukas ng umaga.

Huling namataan ang sentro ng LPA sa layong 385 kilometro silangan timog-silangan ng Surigao City.

Sa ngayon inaasahang ng DOST-Pagasa na makakaranas ng katamtaman hanggang napakalakas na pag-ulan ang mga kababayan sa Kabikulan, Eastern Visayas, Caraga at Northern Mindanao.

Ang mga malalakas na pag-ulan ay maaring magdulot ng pagbaha at pagguho kaya pinapayuhan ng DOST-Pagasa ang mga kababayan na dagdagan ang pag-iingat at paghahanda.

Dahil sa papalapit na LPA at sa posibleng paglakas pa nito, maaring magtaas ng tropical cyclone warning signal ang DOST-Pagasa sa Leyte provinces, Surigao, Davao Oriental, Dinagat islands at Siargao anumang oras.

Ibig sabihin, sa sandaling magkaroon ng TCWS sa mga nasabing lugar, masususpinde ang lahat ng pagpalaot o biyaheng pandagat sa mga baybaying nasasaklaw ng mga lalawigang may babala ng bagyo. (LP/PIA Mimaropa)

DOST Pagasa: LPA may strengthen into TD before landfall in Caraga

QUEZON CITY, Jan 1 (PIA) — Local governments in areas that may be affected by the low pressure area (LPA) nearing Caraga are encouraged by DOST-Pagasa and the National Disaster Risk Reduction and Management Council to make the necessary precautionary measures.

DOST-Pagasa reported today that the LPA may hit ground in Caraga tonight or early morning tomorrow.

But before it makes its first landfall, weather specialist Aldczar Aurelio warned that the LPA may develop into a tropical depression (TD).

Aurelio said the Bicol Region, Eastern Visayas, Caraga and Northern Mindanao may experience moderate to heavy rainfall and thunderstorm which may trigger landslides and flooding.

Some parts of Bicol today are experiencing bad weather causing several flights to be cancelled.

Maritime operations along the eastern seaboards of Leyte provinces and Mindanao particularly Surigao, Davao Oriental, Dinagat islands and Siargao may be affected as DOST-Pagasa may raise tropical cyclone warning signal (TCWS) over these areas anytime due to the strengthening of LPA.

TCWS No. 1 over an area would mean suspension of sea travel. (LP/PIA-Mimaropa)

DOST-Pagasa sa mga biyahero: alamin kung saan-saan lugar na may gale warning

LUNGSOD QUEZON, Enero 1 (PIA) — Pinapayuhan ng DOST-Pagasa ang mga kababayang nais pumalaot ngayon hanggang bukas na alamin muna kung saang lugar may nakataas na gale warning para sa kanilang kaligtasan.

Ang gale warning, mula sa DOST-Pagasa para sa mga byahero, ay isang babala hinggil sa maalon hanggang napaka-alon ng karagatan sa isa o higit pang lalawigan.

Ayon kay Samuel Duran ng DOST Pagasa, bunga ito ng malakas na hangin dala ng Amihan.

Sinabi ni Duran na ang mga lalawigan ng Ilocos, Cagayan, Batanes, Babuyan Islands, Isabela, Quezon kasama ang Polilio Island, Albay, Sorsogon, Occidental Mindoro, Antique, Northern Samar at Easter Samar.

Kung pinaiiral ang gale warning sa isang lugar, hindi papayagan ang maliliit na bangka na pumalaot dahil sa mga malalakas na hangin na lumilikha ng mga dambuhalang alon.

Sa mga nagbabalak tumawid ng dagat papuntang Leyte provinces, Surigao, Davao Oriental, Dinagat islands at Siargao, alamin din kung ano ang taya ng panahon sa mga nasabing lugar bago iwanan ang tahanan.

Anumang oras ngayon, ayon sa DOST-Pagasa, ay maaaring itaas ang Tropical Cyclone Warning Signal (TCWS) sa mga nasabing lugar dahil sa posibleng paglakas ng low pressure area at maging isang tropical depression.

Kapag tumaas ang TCWS No. 1 sa mga nasabing lugar ay isususpindi ang mga byaheng pangdagat. (LP/PIA-Mimaropa)