Category Archives: Marinduque

Tagalog news: Solar Energy Systems, inilagay sa iba’t ibang bayan sa Marindque

BOAC, Marinduque, Enero 18 (PIA)–Nagtayo ng Solar Energy System (SES) sa iba’t ibang lugar sa Marinduque ang Department of Science and Technology (DOST) kaagapay ang mga lokal na pamahalaan at eskwelahan.

Sa pakikipagtulungan ng Marinduque State College (MSC) at pamahalaang bayan ng Buenavista, nakapaglagay ng SES ang DOST-Marinduque sa dalawang mababang paaralan sa nasabing bayan: Binunga Elementary School at Libas Elementary School, na siya ring nagsisilbing evacuation centers sa lugar.

Labinglimang small scale SES din naman ang itinayo sa mga tahanan na nabibilang sa Community Empowerment through Science and Technology (CEST) sa Yook, Buenavista.

Bukod pa rito ay nakapaglagay rin ng SES sa 22 barangay sa bayan ng Mogpog na nagsisilbi ring evacuation centers.

Laking pasasalamat din naman ng Department of Health-Mimaropa dahil nabigyan din ng SES ang kanilang mga Rural Health Unit (RHU) sa Brgy. Dolores, Sta. Cruz, Brgy. Bantay Boac, Brgy. Maniwaya, Sta. Cruz at Brgy. Poblacion, Buenavista.

Dahil dito, nakakapagbigay pa rin ng serbisyo ang mga RHU kahit brownout sa probinsya lalo na kapag magbibigay serbisyo sa mga manganganak ng sanggol.

Inaasahan naman na sa taong 2021 ay makapagdadagdag muli ng SES sa 15 barangay at walong eskwelahan sa lahat ng anim na bayan ng lalawigan. (PIA-MIMAROPA/Marinduque)

Advertisements

Tagalog news: ‘New-to-the-World Products’ ng Marinduque, ipinakilala na ng DOST-PSTC

MOGPOG, Marinduque, Enero 17 (PIA)— Inilunsad ng Department of Science and Tecnology-Provincial Science and Technology Center (DOST-PSTC) Marinduque ang kanilang tinatawag na ‘New to the World Products’.

Ang mga produkto na tinutukoy ng DOST-PSTC ay ang vacuum fried dilis, malunggay crackers at coconut candy.

Ayon kay Eleazar Manaog ng DOST-PSTC, bukod sa mga pamilihan sa Marinduque ay iniaangkat na rin nila ang vacuum fried dilis sa labas ng probinsya samantalang ang malunggay crackers at coconut candies naman ay pansamantalang sa Marinduque lang muna mabibili lalo na sa mga paaralan.

Upang makagawa ng mga produktong ito, iba’t ibang kooperatiba ang katuwang ngayon ng nasabing ahensya kabilang ang Department of Trade and Industry (DTI) at Department of Labor and Employment (DOLE). Sa paggagawa ng vacuum fried dilis, kaagapay nila ang Balanacan Multi-Sectoral Credit Cooperative, Batayang Pamayanang Kristiyano naman sa paggagawa ng malunggay crackers at Mogpog Vegetarian Growers naman ang gumagawa ng coconut candy. Ang kita na naiipon mula rito ay direktang napupunta sa mga kooperatiba.

Nagsimula ang proyektong ito dahil sa pilot project ng pamahalaang bayan ng Mogpog kung saan ipinamahagi rin ng DOST- Industrial Technology Development Institute (DOST-ITDI) ang vacuum frier sa LGU. Ang pondo na ginamit dito upang mabuo ang pagsasagawa ng tatlong produktong ito ay nagmula sa Bottom-up Budgeting (BUB) funds ng bayan ng Mogpog.

Mayroon ding online marketing para sa mga nagnanais na bumili ng mga produkto ng Marinduque at ng iba pang probinsya sa rehiyon ng Mimaropa. Maaari itong bisitahin sa http://www.mimaropaventures.ph. (PIA-MIMAROPA/Marinduque)

Tagalog news: Mababang bilang ng mga biktima ng paputok, napanatili ayon sa DOH-Marinduque

BOAC, Marinduque, Enero 15 (PIA)–Sa pagsalubong sa bagong taon sa Marinduque, napanatili ng Department of Health(DOH) ang mababang kaso ng biktima ng paputok sa lalawigan.

Ayon kay Delbert J. Madrigal, Development Management Officer ng DOH-Marinduque, nakapagtala lang muli ng tatlong biktima ng paputok ang kanilang ahensya kung saan ay dalawa ang lalaki at isa ang babae gaya rin ng bilang na kanilang naitala noong 2017.

Nangunguna pa rin sa listahan ng mga paputok na madalas gamitin ng mga biktima ang lucis, piccolo at baby rocket.

Sa nakitang obserbasyon ng DOH-Marinduque, naging kapansin-pansin raw sa lahat ng bayan na bumaba ang bilang ng mga gumagamit ng mga paputok para sa pagsalubong sa bagong taon.

Ang pagbaba ng bilang ng mga biktima, ayon kay Madrigal, sa taong ito ay epekto ng Executive Order No. 28 s. 2017 na ipinasa ni Pangulong Rodrigo Duterte na may kinalaman sa regulasyon at pagkontrol ng paggamit ng anumang uri ng paputok.

Naging kaagapay rin ng DOH ang lahat ng fire stations kung saan nagsagawa sila ng OPLAN Paalala kasabay ng pamimigay ng leaflets at pag-inspeksyon ng mga itinindang paputok sa merkado. (PIA-MIMAROPA/Marinduque)

Tagalog news: 21 estudyante ng Marinduque State College pumasa sa iskolarsip ng DOST

BOAC, Marinduque Enero 11 (PIA) — Inilabas na ng Department of Science and Tachnology-Provincial Science and Technology Center (DOST-PSTC) Marinduque ang mga pumasa sa 2017 Junior Level Science Scholarship (JLSS).

May bilang na 21 mag-aaral mula sa Marinduque State College (MSC) ang nabigyan ng pagkakataon na mapasama sa nasabing iskolarsip.

Ang mga mag-aaral na nabibiliang dito ay ang mga sumusunod: Baṅega, Avegail Luz; Jalos, Ellaine Martillano; Llave, Rose Ann Jandusay; Malco, Ronamel Sapalaran; Redivizo, Eugene; Roldan, Ericka Quindoza; Seṅo, Kimberly Rose Lupig; Maapoy, Kate Angela Sena; Mabansag, Elaine Marciano; Mangcoy, Rodalyn Ricohermoso; Mirones, Czarlyn Maderazo; Nolos, Ronnel Comia; Ola, Kate Shiendel Muhi; Pastrana, Ronalyn Villaruel; Pelaez, April Lalaine Ramos; Fabrigas, Rica Pacalda; Salon, Denia Barela; Medina, Khevin Lumalang; Mabunga, Michael Dane de Belen; Saguid, Jaimlevy Semilla; at, Serdeṅa, Jean Christine Sanchez

Makakakuha ang mga estudyanteng ito ng P5,000 buwanang allowance, libreng matrikula sa MSC, student insurance, book allowance na nagkakahalagan g P10,000 at graduation allowance. Bukod pa rito ay may pagkakataon din silang makapagturo o makapagtrabaho sa kahit anong pampublikong paaralan sa oras ng kanilang pagtatapos.

Ang scholarship na ito ay bukas sa mga mag-aaral na nasa ikatlong taon sa kolehiyo na kumukuha ng mga kursong nabibilang sa Science and Technology Priority Courses sa mga State Universities and Colleges (SUCs) at ilang pribadong eskwelahan na mayroong CHED compliant programs, CHED identified Centers of Excellence (COE) o Centers of Development (COD). (PIA-MIMAROPA/Marinduque)

Tagalog news: Index crime rate sa Marinduque, bumaba

BOAC, Marinduque, Enero 3 (PIA) — Ayon sa Comparative Crime Statistics na inilabas ng Philippine National Police ng Marinduque kamakailan, iniulat na bumaba ang bilang ng krimen na nangyari sa lalawigan makalipas ang isang taon.

Ayon sa Marinduque Police Provincial Office (MPPO), may 15 na bilang na pagbaba sa index crime simula sa Enero – Nobyembre 2017 kumpara sa bilang na naitala noong 2016.

Ayon sa talaan ng MPPO, ang bilang sa index crime na kanilang naitala ay binubuo ng mga sumusunod: murder-3, homicide- 2, physical injuries- 19, rape-22, robbery- 19, theft-25, cattle rustling-0, at carnapping-1 na may kabuohang bilang na 76.

Dagdag pa ng MPPO, bilang pagsuporta sa anti-illegal drugs campaign ng pamahalaan ay nagkaroon sila 10 anti-illegal drug operations na kung saan ay 20 ang naaresto at 5.66 gramo ng suspected shabu at 7.2 gramo ng marijuana ang kanilang nakumpiska.

Matatandaan na noong nakaraang taon ay mayroong bilang na 91 na kriminal ang nahuli ng MPPO.

Mas pinaigting din ng mga kapulisan ang seguridad sa lalawigan noong araw ng kapaskuhan. Ilan sa kanilang mga nagging hakbang ay ang pagtatayo ng police assistance desk (PAD) sa mga pantalan, at pagpapadala ng road safety marshalls (RMS) at public safety forces (PSF) sa mga control areas.

Nagkaroon din sila ng iba’t-ibang operation plans gaya ng OPLAN Sita, OPLAN Bakal, OPLAN Galugad, OPLAN Katok, service of warrant of arrest at service of search warrant. (ADSD/PIA-MIMAROPA/Marinduque)

Tagalog news: 2 panukalang-batas, isinusulong ni Congressman Velasco ng Marinduque

BOAC, Marinduque, Enero 3 (PIA) — Iniakda ni Congressman Allan Jay Q. Velasco, kinatawan ng Lone District of Marinduque, ang dalawang panukalang batas kamakailan.

Una na rito ang House Bill No. 6071 na pinamagatang “An Act Providing for the Establishment of TESDA Provincial Training Center, Marinduque and Appropriating Funds Therefore”.

Sa tulong ng MATA Partylist Rep. Tricia Nicole Velasco-Catera, naipasa na ng Committee on Higher and Technical Education ang H.B. Ang No. 6071 noong Disyembre 11, 2017. Sa panukalang ito, kinikilala ang mahalagang kontribusyon ng Technical Education and Skills Development Authority (TESDA) sa paghahanda ng Marinduqueños para sa mga oportunidad sa pagtatrabaho, sa lokal at sa ibang bansa. Ilan sa mga kurso ng TESDA na madalas kunin ng mga aplikante na inaalok sa Marinduque ay household service, massage tutorials, electrical installation and maintenance training at baking tutorials.

Ang pangalawang panukala naman ay ang House Bill No. 6038, na pinamagatang “An Act Declaring May 3 of Every Year a Special Nonworking Holiday in the Municipality of Sta. Cruz, Province of Marinduque, in Commemoration of its Founding Anniversary, to be known as Sta. Cruz Day. ”

Dito naman ay isinusulong na maisapabatas para sa pagdiriwang sa Sta. Cruz ang Foundation Day ng kanilang munisipalidad tuwing ika-3 ng Mayo. Aprubado na ito sa ika-tatlong pagbabasa noong Disyembre 4, 2017.

Sa matagumpay na pagpasa nito sa Kapulungan ng mga Kinatawan, umaasa si Velasco na ang “Sta. Cruz Day “ay magkakaroon din ng suporta sa Senado upang mapirmahan ni Pangulong Rodrigo Duterte sa 2018. (PIA-MIMAROPA/Marinduque)

Tagalog news: 1st school-based Bila-bila Festival Competition, isinagawa sa bayan ng Boac

BOAC, Marinduque, Dis. 20 (PIA) – Kasabay ng pagdiriwang ng 395th founding anniversary ng bayan ng Boac ay ipinamalas ang makulay na pagtatanghal ng 1st School-Based Bila-bila Festival Competition.

Sa mismong araw ng kapyestahan ng bayan ay ipinamalas ng mga mag-aaral mula sa Educational System and Technological Institute (ESTI), Ilaya National High School (INHS) at Cawit Comprehensive National High School (CCNHS) ang kanilang galing sa pagsasayaw sa kalsada habang suot ang kanilang pakpak at malaparu-parong kasuotan.

Matapos ang kanilang pagparada sa buong poblacion ay nagtungo ang mga nagtanghal na mag-aaral sa Moriones Arena kung saan ay muli nilang ipinakita ang kanilang presentasyon sa loob ng 20 minuto.

Base sa mga hurado, ang may pinakamagandang konsepto at pagtatanghal na naipakita ay ang mga mananayaw mula sa INHS na nagkamit ng isang tropeyo at P50,000.00. Naiuwi naman ng CCNHS ang ikalawang pwesto at nag-uwi ng P30,000.00 samantalang ang mga mag-aaral naman mula sa ESTI nag nakasungkit ng ikatatlong pwesto na may premyong P20,000.

Maliban sa mga estudyante na nagpamalas ng kanilang sa pagsayaw ay natanghal din ang mga representante ng Marinduque sa street dance competition na isinagawa sa Romblon sa nakalipas na Mimaropa Festival.

Ang pagdiriwang ng Bila-bila Festival ay ginagawa taon-taon sa bayan ng Boac kung saan ay isinasabay rin ito sa kapyestahan ng kanilang patron na si Imakulada Konsepsyon. (ADSD/PIA-MIMAROPA/Marinduque)