Category Archives: Marinduque

Tagalog news: Bagong gensets, pinakikinabangan na ng Marinduque

BOAC, Marinduque, Oktubre 4 (PIA) — Nag-umpisa nang pakinabangan ng may 52,000 kabahayan ang 5×1 MW modular unit na maghahatid ng suplay ng kuryente sa lalawigan ng Marinduque.

Ang ceremonial turnover na ito ay pinangunahan ni Energy Secretary Alfonso Cusi kasama sina Congressman Lord Allan Velasco at Gob. Carmencita O. Reyes.

Ayon kay Cusi, ang paghahatid nila ng serbisyo sa probinsya ay isang ‘welcome development’ na kung saan ay padodoblehin pa nila ang suplay ng megawatt ng kuryente kumpara sa 9MW na power demand nito sa ngayon.

Dagdag naman ng pangulo at CEO ng National Power Corporation (NAPOCOR) na si Pio Benavidez, makatutulong daw ang karagdagang 5MW generating sets para sa 24 oras na serbisyo nito sa buong isla at matugunan ang pagtaas ng demand sa Boac Diesel Power Plant (DPP). Malaki rin aw ang maiaambag nito para sa ibang pasilidad ng Napocor kagaya ng Torrijos DPP at Power Barge 120.

Inihayag din ni Benavidez na mayroon pang 4MW na nakasalang ‘for bidding’ sa susunod na taon at inaasahang mapapakinabangan ng Marinduque sa 2019. (PIA-MIMAROPA/ Marinduque)

Advertisements

Tagalog News: ASEAN Info Kiosk inilunsad sa Boac, Marinduque

BOAC, Marinduque, Oktubre 4 (PIA)–Pormal nang inilunsad kamakailan ng Philippine Information Agency (PIA)-Mimaropa ang ASEAN kiosk sa Casa Real, Boac, Marinduque.

Ang paglulunsad ay binuksan sa pamamagitan ng ribbon-cutting nila Boac Mayor Roberto Madla at PIA Mimaropa Officer-In-Charge Victoria Asuncion S. Mendoza. Ito ay sinaksihan ng mga kasapi ng Sangguniang Pambayan ng Boac maging ng mga estudyante at guro mula sa Alternative Learning School(ALS).

Layunin ng Presidential Communications Operations Office (PCOO) sa tulong ng PIA na ipaalam sa mga ordinaryong mamamayan kung ano ang kahalagahan ng ASEAN Integration at paghahanda ng Pilipinas sa kaganapang ito.
Kaya naman isa sa mga naging hakbang ng ahensya ay ang maglagay ng mga leaflet, brochure at iba pang Information, Education and Communication (IEC) materials tungkol sa kasaysayan ng ASEAN at iba pang mahahalagang kaalaman sa naturang kiosk.

Maliban dito ay may mga inilagay rin na mga babasahin ang PIA tungkol sa mga programa at proyekto ng iba’t ibang ahensya ng pamahalaan na gaya ng Technical Education and Skills Development Authority (TESDA), Department of Agriculture (DA), Department of Science and Technology (DOST), Provincial Veterinary Office, Overseas Workers Welfare Administration (OWWA), Bureau of Internal Revenue (BIR) at Department of Tourism (DOT).
Makikita ang kiosk na ito sa ibaba ng Casa Real bago pumasok sa municipal library.

Ang paglalagay ng info kiosks ay bahagi ng ‘ASEAN Advocacy Series in Mimaropa’ na susunod namang isasagawa sa Mamburao, Occidental Mindoro sa Setyembre 18-19. (PIA-MIMAROPA/Marinduque)

Tagalog news: ASEAN Youth Forum ginanap sa Marinduque State College

BOAC, Marinduque, Oktubre 3 (PIA) — Isinagawa kamakailan sa Marinduque State College ang ASEAN Youth Forum sa pangunguna ng Philippine Information Agency-Mimaropa.

Tatlong daang estudyante mula sa nasabing paaralan ang dumalo sa forum at karamihan sa mga ito ay mga mag-aaral na kumukuha ng mga kursong education, engineering, information technology, information system, business administration at social work.

Sa unang bahagi ng programa ay ipinaliwanag ni PIA-Mimaropa Officer-In-Charge Victoria A.S. Mendoza ang kahulugan at kahalagahan ng ASEAN integration at ang tatlong haligi nito na socio-cultural community, political-security community at economic community.

Nagkaroon din ng trivia game tungkol dito na aktibong sinalihan ng mga estudyante.

Tinalakay naman ni Ethel M. Malinao ng Technical Education and Skills Development Authority (TESDA) ang mga scholarship and student assistance program tulad ng Private Education Student Financial Assistance (PESFA), Training for Work Scholarship (TWSP), Special Training for Employment Program (STEP) at Bottom-up Budgeting (BuB).

Matapos nito ay nagkaroon ng pagkakataon na makapagtanong ang mga mag-aaral kay Malinao sa isinagawang open forum. (ASD/PIA-MIMAROPA/Marinduque)

Tagalog news: LGU Marinduque, PSWDO namahagi ng insentibo sa mga sentinaryo

BOAC, Marinduque, Agosto 28 (PIA)– Iniabot ni Gob. Carmencita O. Reyes kasama si Julpha M. Arevalo, Provincial Social Welfare and Development Office Manager, ang cash incentives ng mga sentinaryo sa lalawigan ng Marinduque.

Nakatanggap ng P80,000 si Ines Cloma ng Poblacion, Torrijos bilang unang bigay sa kanya ng pamahalaang panlalawigan. Unang beses na nakatanngap si Cloma ng insentibo dahil sa ngayon taon siya tumuntong sa edad na 100.

Sampunglibong piso naman ang natanggap nina Florentina Pedival ng barangay Baliis, Sta. Cruz, Felicidad Pedrialva ng barangay Bagong Silang, Sta. Cruz at Rufina Mandalihan mula sa barangay Mataas na Bayan, Mogpog. Ang tatlong lola na nabanggit ay tumanggap na rin ng P80,000 noong nakaraang taon.

Ang pagbibigay ng karagdagang cash incentive ay base sa ordinansa ng lalawigan na halaw naman sa Republic Act No. 10868 o mas kilala sa tawag na Centenarians Act of 2016, na naglalayong mabigyan ng ayudang pinansyal at karagdagang tulong ang mga lolo at lola na umabot na sa edad na 100 na kung saan maliban sa P100,000 na insentibo na magmumula sa pamahalaang nasyonal ay makatatanggap rin ang mga centenarians ng karagdagang insentibo na magmumula naman sa pamahalaang panlalawigan. (PIA-MIMAROPA/Marinduque)

Tagalog news: Municipal Drum and Lyre Competition, bukas para sa mga eskwelahan sa Torrijos

TORRIJOS, Marinduque, Agosto 28 (PIA)– Kasalukuyan nang tumatanggap ng kalahok ang pamahalaang lokal ng Torrijos para sa mga eskwelahan na nagnanais sumali sa 2017 Municipal Drum and Lyre Competition.

Bukas ang patimpalak na ito para sa mga paaralang elementarya at sekondarya na nasa distrito lamang ng Torrijos na kailangang binubuo ng 45-90 miyembro.

Paglalabanan ng mga mag-aaral ang piyesang “Ang Labanan sa Pulang Lupa”. Maaari lamang magtagal ang pagtatanghal sa loob ng 12-15 minuto para sa elementarya at 15-20 minuto para naman sa high school. Isang puntos naman ang ibabawas sa kanila sa bawat isang minuto na sosobra sa nakalaang oras para sa grupo.

Ang pagkakasunod-sunod ng mga magtatanghal ay malalaman sa pamamagitan ng bunutan na gagawin sa mismong araw ng kompetisyon, Setyembre 12, bago isagawa ang parada na magmumula sa Torrijos Covered Court hanggang Torrijos Central School.

Maaaring magpasa ng entry form at waiver kasama ang pahintulot ng punong-guro ng paaralan hanggang sa ika-10 ng Setyembre.

Binubuo ang pamantayan ng pagdedesisyon ng mga sumusunod: tone quality- 20 porsiyento, execution/formation/interpretation- 30 porsiyento, ensemble- 15 porsiyento, musicianship- 25 porsiyento at costume- 10 porsiyento na may kabuohang 100 porsiyento.

Ang tatanghaling kampyon sa elementarya ay tatanggap ng P15,000, tropeyo at sertipiko ng pagkilala; P13,000, tropeyo at sertipiko ng pagkilala naman ang tatanggapin ng magkakamit ng ikalawang pwesto at; P10,000, tropeyo at sertipiko ng pagkilala ang iuuwi ng tatanghalin sa ika-tatlong pwesto. Makatatanggap din naman ng P5,000 at sertipiko ng pagkilala bilang consolation prize ang ilang sasali sa patimpalak.

Para naman sa mga magwawagi na nasa sekondarya, P18,000, tropeyo at sertipiko ng pagkilala ang pwede nilang maiuwi; P 15,000, tropeyo at sertipiko ng pagkilala para sa ikalawang pwesto at; P2,000, tropeyo at sertipiko ng pagkilala sa magkakamit ng ikatatlong pwesto. Tatanggap din naman ng P7,000 at sertipiko ng pagkilala bilang consolation prize ang ilang sasali sa patimpalak.

Magkakaroon din ng pagkakataon na tumugtog muli ang mga tatanghaling kampyon sa Pulang Lupa Day Celebration sa Brgy. Bolo, Torrijos.

Para sa karagdagang impormasyon, maaaring makipag-ugnayan ang mga nagnanais sumali kina Hon. Primo C. Pamintuan, Sangguniang Bayan Chairperson, Committee on Tourism sa kaniyang numero na 0948-033-0283 o 0916-436-6391 at Gee-Ann Magdalita, Municipal Tourism Officer, sa kanyang numero na 0917-826-4326 o (042) 753-0038. (PIA-MIMAROPA/Marinduque)

Tagalog News: History quiz bee isasabay sa pagdiriwang ng Labanan sa Pulang Lupa

TORRIJOS, Marinduque, Agosto 28 (PIA)– Sa papalapit na pagdiriwang ng ika-117 na Labanan sa Pulang Lupa, nais magsagawa ng pamahalaan ng bayan ng Torrijos ng isang quiz bee tungkol sa nasyonal at lokal na kasaysayan ng Pilipinas.

Ang patimpalak na ito ay bukas para sa mga mag-aaral na nasa elementarya na nasasakupan ng distrito ng Torrijos. Para naman sa mga estudyante na nasa sekondarya, bawat eskwelahan sa buong probinsya ay pwedeng magpasa ng kanilang panlaban na binubuo ng dalawang mag-aaral.

Pitongpung porsyento ang nakalaan para sa kasaysayan at kalayaan ng Pilipinas at 30 porsiyento para sa kultura at sining.

Sa unang yugto ng patimpalak ay magkakaroon ng elimination round na binubuo ng 15 katanungan na katumbas ay isang puntos sa bawat tamang sagot. Ang mga magkakalaban na makakukuha ng walong puntos pataas ang siyang magpapatuloy sa final round.

Para naman sa final round, 15 katanungan pa rin ang nakahanda para sa mga kasali kung saan ang bawat tanong ay may katumbas na dalawang puntos.

Ang tatanghaling kampyon sa elementarya ay tatanggap ng P3,000, medalya at sertipiko ng pagkilala; P2,000, medalya at sertipiko ng pagkilala naman ang tatanggapin ng magkakamit ng ikalawang pwesto at; P1,000, medalya at srtipiko ng pagkilala ang iuuwi ng tatanghalin sa ikatatlong pwesto. Makatatanggap din naman ng P500 at sertipiko ng pagkilala bilang consolation prize ang magkakamit ng ikaapat at ikalimang pwesto.

Para naman sa mga magwawagi na nasa sekondarya, P5,000, medalya at sertipiko ng pagkilala ang pwede nilang maiuwi; P 3,000, medalya at sertipiko ng pagkilala para sa ikalawang pwesto at; P2,000, medalya at sertipiko ng pagkilala sa magkakamit ng ikatatlong pwesto. Tatanggap din naman ng P1,000 at sertipiko ng pagkilala ang kikilalaning 4th at 5th placer bilang consolation prize.

Gaganapin ang tagisan ng talino sa Setyembre 11 sa ganap na ika-8 ng umaga. Sa Torrijos Covered Court isasagawa ang patimpalak para sa elementary at sa MDRRMC Conference naman ang sa sekondarya. (PIA-MIMAROPA/Marinduque)

 

Tagalog news: Boac Fire Station, kinilala bilang Best Municipal Fire Station of the Year

BOAC, Marinduque, Agosto 17 (PIA)– Ginawaran ng parangal ni Pangulong Rodrigo Duterte ang Boac Fire Station bilang Best Municipal Fire Station of the Year sa katatapos lamang na ika-26 na Anibersaryo ng Bureau of Fire Protection (BFP) na ginanap sa AFP Theatre, Camp Aguinaldo, lungsod ng Quezon.

Ilan sa mga naging katuparan ng Boac BFP ay ang aktibong pakikibahagi sa mga aktibidad ng iba’t ibang ahensya ng gobyerno, mahigpit na koordinasyon sa mga lokal na pamahalaan, maayos na pamamahala sa mga panahon ng rescue operations tuwing may kalamidad, pagbibigay ng mga seminar at drills tungkol sa kahandaan at pag-iingat sa sunog.

Sa pakikipagpanayam ni SF04 Felix Echavaria, Jr. sa Marinduque News, nais nya na nawa ay maging ehemplo at inspirasyon ang kanilang natanggap na karangalan upang mas lalo pa silang ganahan sa pagbibigay ng serbisyo-publiko sa bayan.

Bukod pa sa plake ay tumanggap din ang BFP-Boac ng perang nagkakahala na P10,000.00 bilang insentibo. (PIA-MIMAROPA/Marinduque)