Category Archives: Celebration

Tagalog news: ‘International Day of Persons with Disability’ ipinagdiwang sa Romblon

ROMBLON, Romblon, Dis. 19 (PIA) —- Ang Provincial Social Welfare and Development Office (PCDO), katuwang ang lahat ng Municipal Social Welfare and Development Office (MSWDO) ay nakiisa sa pagdiriwang ng International Day of Persons with Disability taglay ang temang “Transpormation Towards Sustainable and Resilient Society for All.”

Ang ang provincial convention ng mga PWDs sa buong lalawigan ay ginanap kahapon sa covered court ng Romblon public plaza kung saan pinasimulan ito sa pamamagitan ng parada paikot sa kabayanan ng Romblon.

Ayon sa pamunuan ng PSWDO na layunin ng selebrasyon na maipaunawa ang mga usapin hinggil sa mga may kapansanan gayundin ay makakuha ng suporta mula sa iba pang mga grupo upang maitaas ang dignidad at pamumuhay ng mga kapwa mamamayan.

Hangad din nito na maitaas ang kaisipan ng tao patungkol sa partisipasyon ng mga may kapansanan sa anumang aspeto sa lipunan mapa-politika, sosyal, economic at cultural life.

Bilang pagbibigay halaga sa mga PWDs, ang PSWDO ay nagkaloob ng libreng gupit, manicure, pedicure at pagkakaloob ng regalo sa mga ito.

Namahagi rin ng libreng wheelchair at saklay sa PWDs ang Romblon Provincial Goverment sa pangunguna ni Gov. Eduardo Firmalo.

Nanawagan si Atty. Ronald Geronimo, chief of staff ni Vice Governor Jose Riano sa mga taga-Romblon na huwag maliitin o alipustaihn ang mga kabilang sa sektor ng PWDs dahil may mahalagang papel din silang ginagampanan sa lipunan at may angking galing ang mga ito na kapaki-pakinabang.

Ayon naman kay Governor Eduardo Firmalo, hindi dapat na ikahiya ng mga may kapansanan ang kanilang kalagayan bagkus sila ay lumabas, makisama, makiisa sa lipunang ginagalawan at makilahok sa mga programang inilalaan sa kanila ng pamahalaan.

Bilang pasasalamat sa organizer ng aktibidad, nagpakita ng iba’t ibang talento ang mga may kapansanan na dumalo sa naturang pagtitipon at umaasa ang bawat miyembro na magtuloy-tuloy pa ang biyayang ipinagkakaloob sa kanila.(DMM/PIA-MIMAROPA/Romblon)

Advertisements

Tagalog news: Ika-10 anibersaryo ng OrMin Provincial Blood Council, ipinagdiwang

LUNGSOD NG CALAPAN, Oriental Mindoro, Dis 7 (PIA) – Ginanap kamakailan ang ika-10 Anibersaryo ng Oriental Mindoro Blood Council (OMBC) na may temang “Give blood, Give now, Give often” sa Oriental Mindoro Provincial Hospital kaalinsabay ang pagkilala sa mga taong nagkaroon ng  malaking ambag sa organisasyon.

 

Dinaluhan ang naturang okasyon ng ilan sa mga prominenteng tao sa lalawigan gaya nina Gob. Alfonso V. Umali, Jr. na siya ring chairperson ng organisasyon at si OIC-Provincial Administrator Dr. Romeo G. Infantado na isa sa mga nagtaguyod ng Blood Council.

 

 

Kabilang din sa dumalo si Chief of Hospital Dr. Marpheo Marasigan na isa sa mga nangasiwa ng naturang okasyon at ang ilan sa mga Mayor at Vice Mayors mula sa iba’t ibang bayan.

 

 

Ayon sa gobernador, sa nakalipas na 10 taon pagkatapos maitatag ang OMBC, hindi maipagkakaila na lumaki at dumami ang bilang ng mga myembro at mga nais tumulong sa organisasyon sa pangunguna noon ni Dr. Infantado.

 

Dagdag pa ng gobernador, problema ng mga nakaraang taon ang pagbibigay ng dugo sa mga pasyenteng nangangailangan nito kung kaya’t ganoon kalaki ang tulong ng organisasyon sa pagbibigay ng sapat na suplay ng dugo sa lalawigan. Dagdag pa niya, ginagawa nang modelo ng iba pang mga ospital sa bansa ang mga best practice sa lalawigan kung kaya’t napakalaking tagumpay ito para sa lalawigan ng Oriental Mindoro.

 

 

Nagbigay naman ng ilang mahahalagang updates si Dr. Marasigan hinggil sa estado sa kasalukuyang organisasyon. Binigyan din niya ng pansin ang ilan sa mga naging gawain ng grupo hinggil sa pagsusulong ng kalusugan sa lalawigan.

 

 

Pasasalamat naman ang hatid ni OMBC Head Dr. Jose Leviste sa mga naging kabahagi ng organisasyon sa nakalipas na 10 taon nang paglilingkod nito sa mga Mindoreño.

 

 

Binigyan naman ng mga parangal ang ibat’ ibang munisipyo na naging kabahagi ng Oriental Mindoro Blood Council sa pangangalap ng dugo mula sa kani-kanilang mga bayan. (CPRSD/LTC/PIA-Mimaropa/Calapan)

‘Battle of the Sibuyan Sea’ gugunitain sa bayan ng Alcantara, Cajidiocan

ALCANTARA, Romblon, Okt 25 (PIA) — Puspusan na ang ginagawang paghahanda ng bayan ng Alcantara at Cajidiocan para sa nakatakdang 12th Commemoration of “Battle of Sibuyan Sea” na gaganapin sa ika-24 ng Oktubre.

Ang “Battle of Sibuyan Sea” ay taunang ginugunita sa naturang mga bayan bilang pag-alala sa kabayanihan ng mga beteranong sundalo noong Ikalawang Digmaang Pandaigdig kung saan nagpamalas ng kagitingan noong 1944 ang mga sundalong Amerikano at Pilipino laban sa mga Hapon na nagkaroon ng matinding sagupaan sa Sibuyan Sea na nasa pagitan ng Alcantara at Cajidiocan.

Magugunita na noong Oktubre 24, 1944 ang Battle of Sibuyan Sea ang naging simula ng Battle of Leyte Gulf kung saan napalubog ng mga Submarine at Aircraft Carrier ng Amerika ang napakalaking barkong pandigma ng Japan na “Musashi.”

Ayon kay Sangguniang Bayan Member Jose Luis Morales, Chairman ng Committee of Tourism, ang nasabing aktibidad ay hindi lamang tutukoy sa pagkapanalo ng Allied Forces sa pangunguna ng Estados Unidos at ng Pilipinas laban sa mga Hapon bagkus ay aalahanin rin ang kabayanihang ipinamalas ng mga sundalong namatay at nakaligtas sa pakikipaglaban noong digmaan.

Ayon pa kay Morales, pinaghahanda niya ang bawat barangay upang lumahok sa samu’t saring pa-contest at entertainment activity tulad ng Singing and Dance Contest at Contest on Broadcasting, Sports and Talent Competition na gaganapin sa Alcantara Public Plaza sa mga susunod na araw.

Aniya, sa mismong araw ng 12th Commemoration of Battle of Sibuyan Sea ay magkakaroon ng civic parade paikot sa bayan ng Alcantara at magkakaroon rin ng maikling programa at pag-aalala sa mga nasawi sa digmaan na gaganapin sa Historical Landmark ng Battle of the Sibuyan Sea (BOSS) na nakatayo sa baybaying ng Alcantara.( PJF/DM/PIA-MIMAROPA/Romblon)

Tagalog news: Gen. Dela Rosa, panauhing pandangal sa 116th Police Service Anniversary

LUNGSOD NG CALAPAN, Oriental Mindoro, Okt. 23 (PIA) – Muling dinaluhan ni Police Director General Ronald “Bato” dela Rosa ang pagdiriwang ng ika-116 na anibersaryo ng Police Regional Office Mimaropa kamakailan.

Sa ikalawang pagkakataon, nagsilbing tagapagsalita at panauhing pandangal si Dela Rosa sa pagdiriwang na may temang, “Buhay ng Pulis, Handang Ibuwis para sa Katahimikan at Kaayusan ng Bayan.”

Malugod siyang tinanggap ng kapulisan ng PRO Mimaropa, sa pangunguna ni Regional Director Police Chief Superintendent Wilben M. Mayor kasama sina Gob. Alfonso V. Umali, Jr., Bise-Gob. Humerlito A. Dolor at iba pang mga personalidad at opisyales ng rehiyon.

Sa kanyang talumpati ipinahayag ni Dela Rosa ang kanyang paghanga sa PRO Mimaropa dahil sa pagiging masigasig ng mga pinuno at mga tauhan nito ganundin ang pagpapanatili ng rehiyon bilang ikalawa sa may pinakamababang crime incident sa buong bansa.

Bahagi ng nasabing pagdiriwang ang pagkilala sa mga tauhan at tanggapan na nagpamalas ng hindi matatawarang pagganap sa kanilang mga tungkulin at maayos na pagseserbisyo para sa mga mamamayan. Binasbasan din at pinasinayaan ang bagong gusali na magsisilbing tanggapan ng PRO-Mimaropa.

Sa huli, pinaalalahanan ni Dela Rosa ang kapulisan na palaging isaalang-alang ang mga umiiral na batas sa pagtupad ng kanilang tungkulin upang mapanatili ang tiwala at respeto ng mga mamamayan sa mga alagad ng batas. Ayon sa heneral, nakahanda ring linisin nito ang hanay ng mga police scalawags sakaling mapatunayang umabuso ang mga ito. (CPRSD/LTC/PIA-Mimaropa/Calapan)

Tagalog news: Elderly Filipino Week celebration, Senior Citizens Provincial Congress, idinaos sa Odiongan

ODIONGAN, Romblon, Okt 18 (PIA) — Matagumpay na idinaos kamakailan sa bayan ng Odiongan ang selebrasyon ng Linggo ng Nakatatandang Pilipino (Elderly Filipino Week) at Senior Citizens Provincial Congress.

Mahigit 1,000 senior citizens mula sa 17 bayan ng lalawigan ng Romblon ang dumalo sa pagdiriwang kung saan sila ay binigyang pugay ng pamahalaang bayan ng Odiongan.

Ang taunang selebrasyon ay alinsunod sa Presidential Proclamation No. 470 kung saan inaatas na tuwing unang linggo ng Oktubre ay gunitain ang Linggo ng Nakatatandang Pilipino bilang pagkilala at pagpapahalaga sa mga naiambag ng mga senior citizen sa paghubog na ating bansa.

Panauhing pandangal si G. Oscar Ricaflanca, Secretary General ng National Federation of Senior Citizens of the Philippines (NFSCAP) na nagbigay ng inspirasyo at encouragement sa mga senior citizen na dumalo sa okasyon.

Binigyang parangal sa nasabing pagdiriwang ang ilang centenarian na dumalo gayundin ang bayan ng Odiongan bilang Most Friendly Senior Citizen Municipality ngayong taong.

Naging tampok din sa selebrasyon ang pagbibigay ng libreng medical at dental check-up sa mga nakatatanda sa pangunguna ng Department of Health (DOH)-Mimaropa katuwang ang mga kawani ng DOH Romblon Provincial Office, Provincial Health Office at Rural Health Unit ng Odiongan.

Nabiyayaan din ng libreng salamin sa mata, blood pressure check-up at libreng pustiso ang ilang senior citizen na nangangailangan nito.

Ang tema ng pagdiriwang ngayong taon ay: ”Pagkilala sa Kakayahan , Ambag at Paglahok ng mga Nakakatanda sa Lipunan.”(PJF/DM/PIA-MIMAROPA/Romblon)

Tagalog news: Pagdiriwang ng Buwan ng Tamaraw , nagsimula na

SAN JOSE, Occidental Mindoro, Okt 12 (PIA)—Inumpisahan na kamakailan sa mga lalawigan ng Occidental at Oriental Mindoro ang pagdiriwang ng Buwan ng Tamaraw, alinsunod sa Presidential Proclamation 273, na idineklara noong 2002.

Nakasaad sa batas na ito na ang buwan ng Oktubre kada taon ay buwan para sa pangangalaga at proteksyon ng Tamaraw. Kabilang sa itinatadhana ng batas ang pagsasagawa ng mga aktibidad ng dalawang lalawigan sa Mindoro, para sa promosyon ng kahalagahan ng Tamaraw sa buong bansa.
Matapos ang motorcade sa mga bayan ng Mamburao, Sablayan, Calintaan, Rizal at San Jose ng lalawigang ito, ay pinasimulan rin ang information caravan.

Layunin ng information caravan na higit pang mapalalim ang kaalaman ng mga taga- Kanlurang Mindoro sa Tamaraw. Nakatakda ring ganapin ang school camp, kung saan sampung araw na bibigyan ng pagkakataon ang iba’t ibang paaralan sa high school na bumisita sa Tamaraw Gene Pool Farm at makita ang nagiisang Tamaraw sa nasabing lugar na si Kalibasib. Kasunod naman nito ang Biodiversity Conservation Camp na dadaluhan ng mga piling kawani ng lokal na pamahalaan at technical staff ng Department of Environment and Natural Resources (DENR). “Meron din tayong Biodiversity Quiz Bee”, saad pa ni David. Ang mananalo sa nasabing paligsahan ay ipapadala sa national level .

“Ang tamaraw ay maipagmamalaki na dito lamang sa Pilipinas matatagpuan, partikular sa Mindoro”, paliwanag ni Ma. Teresita David, bagong talagang Tamaraw Conservation Project Coordinator ng tanggapan ng Tamaraw Conservation Program (TCP). Ang TCP ay nasa ilalim ng ahensya ng DENR.

Idinitalye pa ni David ang ilang pagkakaiba ng tamaraw sa kalabaw. Aniya, hugis letter v ang sungay nito kumpara sa kalabaw na moon shape. Mas maliit ang katawan, maikli ang buntot at mas maitim ang kulay. Gayundin, dahil mailap at mabangis ang tamaraw, hindi ito maaring alagagaan kumpara sa kalabaw na nasasakyan ng tao at maaring makatulong sa ilang gawain sa bukid. Ang pagiging mailap at mabangis ng tamaraw ay kabilang sa mga dahilan kung bakit mahirap makakuha ng eksaktong dami ng mga ito sa tuwing magsasagawa ng pagbibilang ng tamaraw.

Base sa pinakahuling Tamaraw Count ay bahagyang bumaba ang bilang ng tamaraw. Mula 413 ng nakaraang taon, bumaba ito sa 401 lamang. Ayon kay David, ang bahagyang pagbaba sa bilang ng tamaraw ay hindi dapat ikabahala.

Kung pagbabatayan ang bilang nito sampung taon na ang nakakalipas, dumarami pa rin ang mga tamaraw sa kanilang natural habitat. Subalit sa kasalukuyang populasyon, itinuturing pa rin na critically endangered species ang conservation status ng mga ito kung kaya’t dapat mapangalagaan.

Nais naman ng tagapamuno ng TCP na makatuwang ang mga kabataan sa pagpapakalat ng impormasyon ng kahalagahan ng tamaraw lalo na sa pamamagitan ng social media. Ayon pa kay David, bukas ang kanilang tanggapan para sa mga nais magtanong o magsagawa ng pananaliksik. (VND/ PIA MIMAROPA/Occ Min)

Tagalog news: 2017 Regional Science and Technology Week celebration, idinaos sa Odiongan

ODIONGAN, Romblon, Agosto 28 (PIA) — Panauhing pandangal si Department of Science and Technology (DOST) Secretary Fortunato Dela Peña sa selebrasyon ng 2017 Regional Science and Technology Week na idinaos noong Agosto 14-17 sa Virginia Centurione Bracelli School, Odiongan, Romblon.

Sa unang araw ng kanyang pagbisita sa lalawigan ng Romblon ay agad na makipagpulong si Sec. Dela Peña sa mga may-ari ng community‐based enterprises’ (CBEs) o micro, small, and medium enterprises (MSMEs).

Ibinida ng mga MSME ang kanilang succesfull story ng kanilang maliit na negosyo na natulungan ng Department of Science and Technology (DOST) upang mapalago ito.

Sa ikalawang araw ng kalihim sa Romblon ay kanyang pinangunahan ang pagbubukas sa publiko ng Regional Invention Contest and Exhibits o RICE na ginanap sa loob ng tatlong araw. Tampok sa exhibit ang iba’t ibang produkto at natatanging imbensyon na likha ng mga estudyante mula sa iba’t ibang paaralan sa buong rehiyon ng Mimaropa.

Bumisita rin si Sec. De la Peña sa mga MSMEs na natulungan ng DOST sa bayan ng Romblon kung saan ito ay nag-ikot sa Romblon Shopping Center, nagtungo sa mga planta ng marmol at nakipagkita rin sa mga manlililok ng marmol.

Kasama rin ng kalihim sa kanyang pagbisita sa lalawigan sina DOST Undersecretary for Disaster Risk Reduction and Climate Change Dr. Renato Solidum Jr., DOST Mimaropa Regional Director Ma. Josefina Abilay at iba pang opisyal ng DOST Central Office. Ikinalugod naman nina Governor Eduardo C. Firmalo at Mayor Trina Firmalo-Fabic ang pagdalo ni Sec. Sec. De la Peña sa bayan ng Odiongan at pareho nilang pinasalamatan ang DOST sa pagpili nito sa lalawigan ng Romblon na gawing venue ng RSTW ngayong taon.

Nagpapasalamat din si DOST Provincial Director Marcelina V. Servañez sa matataas na opisyal ng DOST na dumalo at maging sa daan-daan kataong nakilahok sa matagumpay na pagdiriwang ng 2017 Regional Science and Technology Week ay may temang “Changing Lives through Science.”(DM/PIA-MIMAROPA/Romblon)