Category Archives: Award

Tagalog news: OrMin tumanggap ng parangal mula sa OCD

LUNGSOD NG CALAPAN, Oriental Mindoro, Dis. 19 (PIA) – Pormal na tinanggap ni Oriental Mindoro Provincial Disaster Risk Reduction Management Officer Vinscent Gahol kasama si Gob. Alfonso V. Umali, Jr. ang plake ng pagkilala bilang 1st Place Best Local DRRM Council sa isinagawang 2017 Mimaropa Region Gawad Kalasag na ginanap kamakailan sa Lungsod ng Quezon.

Ang parangal ng pagkilala ay iginawad ni Dir. Eugene Cabrera ng Office of Civil Defense (OCD) Mimaropa sa mga natatanging local government unit na nagpapamalas ng dedikasyon hindi lamang sa panahon ng kalamidad kundi maging sa kahandaan nito at kakayahang makabangon sa bawat kalamidad.  Kinilala rin sa Gawad Kalasag ang mga bayan ng Gloria, Naujan, Lungsod ng Calapan at ilang mga ahensya at indibidwal na tumutulong upang maging epektibo ang pagpapatupad ng kanilang mga programa. (LTC/CPRSD/PIA-Mimaropa/Calapan)

Advertisements

Tagalog news: Mga Atletang Mindoreño, kinilala ng Sangguniang Panlalawigan ng OrMin

LUNGSOD NG CALAPAN, Oriental Mindoro, Dis. 6 (PIA) – Binigyan ng natatanging pagkilala ng Sangguniang Panlalawigan (SP) ang mga atletang Mindoreño sa pagbibigay nila ng karangalan sa bansa  sa pagiging bahagi ng Philippine Team at sa pagkakamit ng medalya sa katatapos na 29th SEA Games sa Kuala Lumpur, Malaysia.

 

 

Ang mga kinalalang atleta ay sina Mervin Guarte mula sa bayan ng Bongabong  na nag-uwi ng bronze medal sa 1,500 meter  athletics at Marco Vilog, tubong Mansalay na silver medalist naman sa 800 meter  track event.

 

 

Nakasaad sa kapasiyahan ang mainit na pagbati at mataas na pagkilala ng mga kasapi ng Sangguniang Panlalawigan, sa pamumuno ni Bise-Gobernador Humerlito A. Dolor sa mga atleta.  Personal ding dumalo sa pagpaparangal si Gob. Alfonso V. Umali, Jr., na nagkaloob ng karagdagang gantimpala bilang insentibo para sa mga atleta.

 

 

Naging emosyonal naman si Vilog habang ikinukuwento niya ang hirap na kanyang pinagdaanan bago niya nakamit ang tagumpay.

 

 

“Dahil hindi po kayang tustusan ng aking magulang ang aking pag-aaral sa college, ginawa ko pong hanapbuhay ang pagtakbo. Kapag po may exam, kapag po may babayaran, diyan ko po  kinukuha ang lahat ng gastusin ko sa school. Kaya nga po nung nakaraang taon, nag-ensayo po ako nang mabuti dahil po sa kagustuhan kong makapaglaro sa SEA Games.  Ngayon nga pong taong ito, nakasama po ako sa Kuala Lumpur at nakuha ko rin po itong silver medal.” pahayag ni Vilog. (CPRSD/LTC/PIA-Mimaropa/Calapan)

Tagalog news: San Agustin, Alcantara Red Orchid Hall of Fame awardee

SAN AGUSTIN, Romblon, Nob. 29 (PIA) — Sa ikatlong pagkakataon ay muling nasungkit ng mga bayan ng San Agustin at Alcantara ang National Red Orchid Awards 2017 mula sa Department of Health (DOH) dahil sa pagiging Smoke-free Municipality ng mga ito.

 

Ang karangalang natanggap ng naturang mga bayan ay gantimpala sa kanilang maigting na kampanya laban sa paninigarilyo upang pangalagaan ang kalusugan ng mga mamamayan.

 

Ang prestihiyosong parangal ng DOH na National Red Orchid Awards ay aktibong sinalihan ng iba’t-ibang ahensiya, mga ospital at mga lokal na pamahalaan na nagpapatupad ng batas laban sa paninigarilyo.

 

Ang mga nabanggit na bayan ay muling nabigyan ng pagkilala dahil sa malawakan at masigasig na kampanya nito laban sa paninigarilyo lalo na sa mga pampublikong lugar bilang pagsunod sa Republic Act 9211 (Tobacco Regulation Act of 2003) at maigting na pagpapatupad ng ordinansa na may kaugnayan sa paninigarilyo upang maging Smoke-Free Municipality.

 

Ang maigting na pagpapatupad ng batas laban sa paninigarilyo sa dalawang nabanggit na bayan ay naglalayong maprotektahan ang mga mamamayan laban sa mga sakit na dulot ng usok ng sigarilyo na siyang nagiging sanhi ng pagkakaroon ng hika, cancer sa baga at iba pang nakamamatay na sakit.

 

Personal na dumalo sa awarding ceremony sina Dr. Deogracias S. Muleta ng RHU San Agustin at Dr. Jobin Maestro ng RHU Alcantara na ginanap sa Fort Ilocandia Resort and Casino, Lungsod ng Laoag noong ika-9 ng Nobyembre upang tanggapin ang naturang pagkilala mula sa DOH.

 

Iniaalay naman ng dalawang Municipal Health Officer ang karangalang natamo sa kanilang mga kababayan, mga ahensiya at mga taong naging katuwang nila sa kanilang adbokasiya laban sa paninigarilyo.(DM/PIA-MIMAROPA/Romblon)

Tagalog news: Palawan ginawaran ng ‘Top Seller Pavillion Award’

PUERTO PRINCESA, Palawan, Okt 27 (PIA) — Ginawaran ng ‘Top Seller Pavillion Award’ ang Palawan sa katatapos na Mimaropa Naturally Agri-Trade and Tourism Fair 2017 na ginanap sa Megatrade Hall, SM Megamall, lungsod ng Mandaluyong.

Ito ang ikatlong pagkakataon na naisagawa ang naturang gawain mula nang una itong inilunsad noong 2015 na naglalayong maipakilala ang mga lokal na produktong gawa ng mga maliliit na nagnenegosyo, mga serbisyo at destinasyon mula sa rehiyon ng Mimaropa na binubuo ng Occidental at Oriental Mindoro, Marinduque, Romblon at Palawan.

Sa talaan ng Department of Trade and Industry (DTI), humigit-kumulang P42 milyon ang kinita ng buong rehiyon sa limang araw na exhibit.

Maliban sa ‘Top Seller Pavilion Award,’ nakamit din ng Palawan sa pamamagitan ng Asiano Arts and Crafts ang ‘Best Dressed Booth’ at ang ‘Best Innovative Product’ ng Ayahay Palaweño Brewery.

Nang dahil sa exhibit na ito ay unti-unti ring nakilala ang handicrafts na gawa ng mga benepisyaryo ng Repormang Agraryo ng Department of Agrarian Reform (DAR)-Palawan sa Calamianes area.

Ang exhibit ay nilahukan ng mahigit sa 150 micro at small enterprises mula sa mga lalawigan ng Mimaropa.

Ang aktibidad ay pinangungunahan ng DTI-Mimaropa katuwang ang iba pang pang-rehiyong ahensiya ng Department of Agriculture, Department of Agrarian Reform, Department of the Interior and Local Government, Department of Tourism at ng mga lokal na pamahalaan na bumubuo sa rehiyon. (OCJ/PIA-MIMAROPA, Palawan)

Tagalog news: San Jose humakot ng parangal sa CMCI Regional Awards

SAN JOSE, Occidental Mindoro, Okt 27 (PIA)—Humakot ng parangal ang pamahalaang lokal ng San Jose sa Cities and Municipalities Competitiveness Index (CMCI) para sa rehiyon ng Mimaropa, na isinagawa kamakailan sa SM Megamall, Mandaluyong.

Ayon sa Department of Trade and Industry (DTI), layunin ng aktibidad na maipakita ang kakayahan ng mga siyudad at munisipyo sa buong bansa sa ilalim ng four pillars. Ang mga ito ay ang Economic Dynamism, Government Efficiency, Infrastructure at Resiliency.

Nauna ng ginanap ang national level CMCI o ang CMCI 2017 noong Agosto, sa pangunguna ng DTI katuwang ang National Competitiveness Council (NCC) na ginanap sa Philippine International Convention Center (PICC), Pasay City.

Sa ilalim ng Economic Dynamism ay nakuha ng pamahalaang lokal (LGU) ng Sta Cruz ang ikatlong pwesto at pumangalawa ang LGU Boac. Ang dalawang pamahalaang lokal ay mula sa lalawigan ng Marinduque. Nakuha naman ng LGU San Jose, Occidental Mindoro (SJOM) ang unang pwesto.

Sa Government Efficiency ay pumangatlo ang LGU Torrijos, Marinduque, pumangalawa ang LGU Brooke’s Point, Palawan at muling nanguna ang LGU SJOM.

Isa pang bahagi ng four pillars ang Infrastructure. Dito ay nakuha naman ng LGU Narra, Palawan ang ikatlong pwesto, pumangalawa ang LGU Odiongan, Romblon at nanguna ang LGU SJOM.

Ang ikaapat na bahagi ng four pillars ay ang Resiliency kung saan naiuwi ng LGU Naujan, Oriental Mindoro ang ikatlong pwesto. Pumangalawa ang LGU Gasan, Marindugue at muling nanguna ang LGU San Jose.

Nakamit din ng San Jose, ang unang pwesto sa overall ranking ng mga munisipyo sa rehiyon. Isang karapatdapat na parangal dahil kinilala rin ang nasabing bayan na pang- 13 sa most competitive municipality sa buong bansa.
Ayon sa DTI Mimaropa magpapatuloy ang kanilang pagsubaybay sa CMCI ranking sa rehiyon bilang pagtupad sa adbokasiya ng ahensya na isulong ang competitiveness sa bansa. (VND/PIA MIMAROPA/Occ Min)

Tagalog news: OrMin, nagkamit ng ilang parangal mula TESDA

LUNGSOD NG CALAPAN, Oriental Mindoro, Okt 13 (PIA) – Iba’t ibang parangal ang natamo ng lalawigan ng Oriental Mindoro sa katatapos na 23rd Technical Education and Skills Development Authority (TESDA) National Institutional Award na ginanap sa TESDA Auditorium, Taguig City.
Nakuha ng Oriental Mindoro ang National Kabalikat Award, Tagasanay Award, TESDA Idol Self-employed Category, TESDA Idol-waged Employed Category at Batang TESDA .

Sa mga pagpupunyaging pangkaunlaran, sa mga pag-alalay sa mga programang pang-edukasyon at pangkabataan, at pagsuporta sa galing ng mga Mindoreño ay ilan lamang sa mga dahilan ng pagkilala sa kakayahan ng mga mamamayan ng lalawigan.

Ipinagkaloob kay Gob. Alfonso V. Umali, Jr. ang National Kabalikat Award sa pagiging katuwang nito ng TESDA sa pamamagitan ng paglulunsad ng iba’t ibang programang sumusuporta sa technical vocational courses.

Ito ay sa pamamagitan ng mga inilunsad na Project Access to Countryside Courses for Employable/Entrepreneurial Skills (ACCESS); pag-upgrade ng mga pasilidad ng Language Skills Institute, Project Iskolar at iba pa. Kinilala rin ang natatanging pamamalakad sa lalawigan na nagdulot ng maraming pagbabago sa at mataas na antas ng serbisyo sa mamamayan.

Mula naman sa pagiging Top 8 Tagasanay Award Finalists sa buong bansa, nahirang bilang 2nd runner up sa naturang parangal si Ednalyn E. Salcedo ng Simeon Suan Vocational and Technical College ng bayan ng Bansud. Si Salcedo ay isang aktibong trainer, expert at assessor ng mga kwalipikasyon sa loob ng 20 taon hinggil sa upgrading at entrepreneurship.

Mula naman sa pitong finalists ng Self-Employed Category, nahirang bilang National Awardee si Hernan Erorita, isang aktibong propesor at pangulo ng Paradigm Colleges of Science and Technology mula sa bayan ng Roxas. Aktibo rin siya sa pakikipag-ugnayan sa iba’t ibang kumpanya upang isigurong magkakaroon agad ng trabaho ang kanilang mga estudyante pagkatapos ng mga ito sap ag-aaral.

Mula pa rin sa Oriental Mindoro, nahirang naman si Max Closa mula sa mahigit 10 finalists sa TESDA IDOL bilang National Winner sa naturang kategorya. Si Closa rin na may maayos na kakayahan sa pagho-host at naging estudyante ng TESDA sa Events Management Services NC II ang nahirang bilang Batang TESDA.

Samantala, nilalayon ng gawaing ito ng TESDA ang pagkilala sa kakayahan ng mga awardee at ang maipadama ang kahalagahan ng technical at vocational courses na siyang higit na nakapagpapabago ng buhay ng mga pumapasok sa mga vocational school sa mas madali at praktikal na paraan at nakapagbibigay ng trabahong mas malaki ang kita.

Naging panauhin sa naturang okasyon sina TESDA Director General Sec. Guiling Mamondiong, TESDA Asst. Sec. Jonas Soriano, Dir. Elmer Talavera ng National Institute for TESDA at TESDA Cabinet Sec. Leoncio Evasco. (CPRSD/LTC/PIA-Mimaropa/Calapan)

Tagalog news: Mga himpilan ng pulisya sa Puerto Princesa, pinarangalan

LUNGSOD NG PUERTO PRINCESA, Palawan, Oktubre 6 (PIA) — Tumanggap ng pagkilala kamakailan mula sa City Police Office (CPO) ang mga himpilan ng pulisya sa lungsod ng Puerto Princesa na may natatanging pagganap sa kanilang mga tungkulin.

Ang pag-gawad ng parangal ay kasabay ng selebrasyon ng ika-116 na anibersaryo ng serbisyo ng pulisya.

Ginawaran bilang best police unit sa larangan ng police operations ang Mendoza Police Station (MPS), habang ang Irawan Police Station (IPS) naman ang kinilala sa larangan ng police community relations.

Pagdating naman sa masigasig na pagpapatupad ng kampanya ng gobyerno kontra-ilegal na droga, kinilala ng City Police Office (CPO) ang Drug Enforcement Unit (DEU) nito.

Kinilala rin ang City Public Safety Company (CPSC) sa suporta nito sa iba’t ibang police operations at programa para sa community relations ng CPO.
“Kahit ano ang pagpupunyagi ng PNP para sa pagpapanatili ng katahimikan at kaayusan ng isang lugar, wala itong saysay kung walang kooperasyon ng komunidad”, bahagi ng pananalita ni Police Senior Superintendent Ronnie Francis Cariaga, direktor ng PPCPO sa seremonya.

Samantala, ang nabanggit na pagdiriwang ay may temang: “Buhay ng Pulis, Handang Ibuwis para sa Katahimikan at Kaayusan ng Bayan”.

Naging panauhing pandangal sa nasabing aktibidad si Direktor Rey Maranan ng Department of Interior and Local Government (DILG) sa lungsod. (LBD/PIAMIMAROPA-Palawan)