Category Archives: Agriciulture

Tagalog news: Pasilidad sa pagpo-proseso ng mangga, ilalagay sa Puerto Princesa, Palawan

PUERTO PRINCESA, Palawan, Agosto 7 (PIA) — Nakipagkasundo ang pamahalaang lungsod ng Puerto Princesa sa Department of Agriculture (DA) at Department of Agrarian Reform (DAR) kaugnay sa planong pagtatayo ng pasilidad para sa pag-po-proseso at marketing ng produktong mangga.

Ang proyekto ay nagkakahalaga ng mahigit Php15.4 milyon na itatayo sa Sitio Tagumpay, Barangay Inagawan Sub, sa bahaging sur ng siyudad na inaasahang magsisimula ang operasyon sa Enero 2018.

Layon nito na mapalakas ang suporta sa sektor ng agrikultura partikular na ang samahan ng mga magsasaka ng mangga sa lungsod.

Ani City Agriculturist Melissa Macasaet, malaking tulong din ito upang mapaunlad ang pagsasaka ng mangga sa kabila nang kinakaharap na hamon ng lungsod at lalawigan sa pesteng mango pulp weevil.

“Hanggang sa kasalukuyan ay apektado parin tayo ng sakit sa mangga dahil sa mango pulp weevil, sa pamamagitan ng paggamit ng ganitong mga teknolohiya, malalagpasan ng mga mango growers natin ang problema”, ani Macasaet.

Dagdag pa ni Macasaet, layon din ng proyekto na mapaangat ang halaga ng mangga sa pamamagitan ng pagbi-benta ng nai-proseso nang produkto.

Samantala, magkakatuwang ang DA, DAR at LGU sa pagpapanatili ng proyekto, marketing at pagtukoy sa pagkukunan ng ipo-prosesong mangga. (LBD/PIAMIMAROPA-Palawan)

DA Sec. Manny Piñol, pinangunahan ang pamamahagi ng kagamitan sa pagsasaka

ODIONGAN, Romblon, Hulyo 31 (PIA) —- Pinangunahan ni Sec. Emmanuel Piñol ng Department of Agriculture ang pamamahagi ng mga makabagong kagamitan sa pagtatanim at pagproseso ng mga root crops sa kanyang pagbisita sa lalawigan ng Romblon kamakailan.

Sa ginanap na turn-over ceremony sa bayan ng Odiongan, tinanggap ng mga magsasaka ang aabot sa P12 milyon kabuoang halaga ng mga kagamitan sa pagsasaka at mga bangkang de motor para sa mga mangingisda.

Isa sa mga nabigyan ng makabagong kagamitan ay ang Tabobo-an Farmers Association ng Odiongan, Romblon na kung saan nakatanggap sila ng modernong rice planting machine. Isa itong makinarya na awtomatikong makakapagtanim ng palay o crops sa mga sakahan.

Maliban sa P12 milyon halaga ng mga kagamitan, nagbigay rin ng P50 milyon cash grant ang Deparment of Agriculture sa lalawigan ng Romblon para may magamit na kapital ang mga magsasaka at mangingisda sa probinsiya.

Sa mensahe ng Piñol sa mga mangingisda, sinabi nitong ang mga isda at yamang dagat ang mga resources na hindi mawawala sa Romblon.

Nakipagtalakayan rin siya sa mga magsasaka para alamin kung ano ang mga problema na kanilang kinakaharap dito sa Romblon.

Ilan sa mga magsasaka ay inilapit sa kalihim na sana ay maipagawa ang farm-to-market road sa kanilang barangay, idinulog rin nila ang kakulangan ng irrigation system at maging problema ng bayan ng Sta. Fe sa seaweeds production.

Nagbigay katiyakan naman si Sec. Piñol na kanilang titingnan ang mga nasabing problema at agad na bibigyang solusyon ng kanyang kagawaran na pinamumunuan.(PJF/DM/PIA-MIMAROPA/Romblon)

Tagalog news: Produksyon ng bigas sa Pilipinas, tumaas ayon kay DA Secretary Piñol

ODIONGAN, Romblon, Hulyo 31 (PIA) — Sa pagbisita kahapon ng kalihim ng Department of Agriculture (DA) na si Sec. Emmanuel Piñol sa bayan ng Odiongan, Romblon, sinabi nito na tumaas ang produksiyon ng bigas sa bansa ngayong 2017 at nananatiling normal aniya ang presyo ng mga bigas sa merkado.

“From the average of 3.9 metric tons per harvest we are now up to 4.23 metric tons per harvest (mula sa 3.9 metrikong tonelada bawat ani, tumaas ito sa 4.23 metrikong tonelada). With the harvested area of 4B hectare nag increase ng mga 5million metric tons per hectare per harvest,” pahayag ni Piñol.

Pagsapit aniya ng taong 2020, maaring masustentuhan na ng bansa ang pangangailangan natin sa bigas.

Dagdag pa ni Sec. Piñol, normal naman ang presyo ng bigas pero mas bababa aniya ito kung maipatutupad ang hangarin ng Department of Agriculture na payagan ang mga farmers na magbenta ng kanilang produkto sa merkado.

“Nationwide, the rice actually is just ok but it could be cheaper if we could implement our vision of really allowing the farmer to directly market its product (Sa buong bansa, sapat lamang ang presyo ng bigas, ngunit mas magiging mura sana ito kung maisasatupad natin ang ating planong payagan ang mga magsasaka na direktang maibenta ang kanilang produkto sa merkado),” ayon kay Piñol.

“What’s happening right now is actually, ang daming traders and that’s the reason why mataas masyado yung presyo sa merkado at mababa ang bilihan sa produkto ng farmers,” giit pa ng kalihim.

Napansin din ni Sec. Piñol, ang kakulangan ng suplay ng bigas sa lalawigan ng Romblon kung saan kinakailangan pang mag-angkat ng bigas sa Mindoro at iba pang karatig probinsiya para may maibenta sa pamilihan.

“We are actually squandering the potentials of Romblon to produce more rice for its people, so if we are able to improve the farming system I believed that the rice area of Romblon will be able to feed at least 1/2 of the requirements (nilulubos namin ang potensiyal ng Romblon na makatustos ng produksyon ng bigas para sa mga probinsya, kaya naman kung mapapaganda natin ang pagsasaka dito, naniniwala ako na kakayanin nitong matugunan ang kalahati ng kinakailangang suplay dito) at ang iba diyan ay mapupunta sa Metro Manila,” pagtatapos na pahayag ni Piñol.(PJF/DM/PIA-MIMAROPA/Romblon)

Tagalog news: 48 tobacco farmers ng San Jose, tumanggap ng ayuda

SAN JOSE, Occidental Mindoro, Hulyo 14 (PIA) — Tumanggap ng ayuda mula National Tobacco Administration (NTA) ang 48 magtatanim ng tabako sa bayan ng San Jose kamakailan.

Ito ay sa ilalim ng Integrated Farming and other Income Generating Activity Project ng NTA.

Ayon kay Violeta Gayona, Tobacco Production Regulation Officer ng NTA, layunin ng proyekto na matulungan ang mga magtatanim ng tabako na magkaroon ng karagdagang pinagkakakitaan. Ang mga magsasakang nakinabang sa ayudang ito ay mula sa barangay Murtha, La Curva, Camburay, Bayotbot at San Isidro.

“Pinapautang ang mga deserving tobacco farmers ng certified seeds at mga fertilizers”, saad naman ni Yolanda Espeleta, kawani ng NTA. Ipinaliwanag nito na pumipili kada taon ang ahensya ng mga magtatanim ng tabako na may magandang record sa pagbabayad.

Ang mga fertilizers na tatanggapin ng mga benipisyaryong magsasaka ay apat na bags ng 16-20-0, apat na bags ng organic fertilizer, dalawang bags ng 0-0-50 at tatlong bags ng 21-0-0. Nagkakahalaga ang 13 bags ng pataba ng P11,010. May kalakip ding cash na P7,600 na tatanggapin ang mga benepisyaryong magsasaka bilang pambili ng certified seeds at renta sa gagamiting makinarya sa kanilang pagsasaka. Babayaran ang kabuuan ng nahiram na halaga (P18,610) sa kanilang pag ani sa buwan ng Disyembre ngayong taon.

Dagdag naman ni Gayona, mapapansin na kahit palay ang itatanim ng mga magtatabako ay hindi gumagamit ang mga ito ng urea. “May sariling teknolohiya sa pagamit ng pataba ang NTA”, paglalahad ni Gayona. Kumpara sa karaniwang magsasaka, hindi gumagamit ng urea ang mga magtatabako upang hindi mabago ang kalidad ng lupa na nakalaan talaga sa pagtatanim ng tabako.

Samantala, pansamantalang ititigil ang pagtatanim ng tabako sa lalawigan ngayong taon dahil sa pagsasara ng tanggapan ng Philip Morris sa Occidental Mindoro sa di pa malinaw na dahilan. Ayon sa NTA, isinasagawa ng ahensya ang mga kaukulang pakikipagusap sa mga posibleng kumpanya na magpapatanim at mamimili ng tabako sa lalawigan.

Ang industriya ng pagtatanim ng tabako ay hindi lamang malaking tulong sa mga magsasaka kundi gayundin sa buong lalawigan dahil sa tinatanggap na tobacco excise tax mula sa pamahalaan. (VND/PIA MIMAROPA/Occ Min)

Tagalog news: 2 asosasyon, tumanggap ng financial assistance mula pamahalaang panlalawigan ng Romblon

ODIONGAN, Romblon, Hulyo 13 (PIA) — Tumanggap kamailan ng tig-P50,000 ang dalawang asosasyon ng magsasaka sa bayan ng Odiongan mula sa pamahalaang panlalawigan ng Romblon.

Pormal na iniabot nina Governor Eduardo C. Firmalo at Mayor Trina Firmalo-Fabic sa Progreso Este Women’s Association at Magkapatid Association (Tabobo-an) ang tseke sa dalawang grupo.

“Magtatanim sa tig-tatlong ektarya lupain ang bawat asosasyon ng iba’t ibang produktong pang-agrikultura katulad ng saging, kamoteng kahoy, gulay, at iba pang uri ng pananim ang kaakibat na kondisyon sa nasabing financial assistance,” pahayag ng gobernador.

Aniya, walang hinihinging kapalit ang pamahalaan kundi ang kailangan lamang paunlarin ng dalawang asosasyon ang puhunang ipinagkaloob sa kanila upang may mapagkukunan sila ng ikabubuhay sa araw-araw.

Our municipal community organizer Elena Casidsid helped form the associations and access funding and other resources.  (DM/PIA-MIMAROPA/Romblon)

Tagalog news: Magsasaka sa San Jose, nagsasanay sa Farm Business School ng DA

SAN JOSE, Occidental Mindoro, Hulyo 12 (PIA)— Dalawapu’t walong mga magsasaka ng barangay Central at San Agustin, bayan ng San Jose, ang patuloy na dumadalo at nakikinabang sa Season-Long Training on Farm Business School Program ng Department of Agriculture (DA).

Layunin ng naturang pagsasanay na mabigyan ng kaalaman ang mga partisipante hinggil sa pagnenegosyo ng kanilang produkto. Kabilang sa mga pinagaaralan ay ang marketing o paghahanap ng tamang merkado, bookkeeping at recording o pagtatala ng kanilang mga naani (harvested) gayundin ng mga naiibenta ng produkto.

“Itinuro din sa kanila (magsasaka) ang paggawa ng farm plan”, ayon kay Rosalina Austral ng San Jose Municipal Agriculturists Office (MAO). Sa pamamagitan ng farm plan, ay napagaaralan at naihahanda ng isang magsasaka ang mga gagawin sa kanyang sasakahing lupa at nagagamit ang mga tamang pamamaraan upang higit na kumita. “Natutukoy din ng magsasaka ang maari niyang itanim na naayon sa panahon”, dagdag paliwanag ni Austral.

Sa Farm Business School Program ay agarang nagagamit o naia-apply ng mga partisipante ang kanilang mga natututunan sa kanilang sakahan. Nagsimula ang programa noong Hunyo at inaasahang matatapos sa Disyembre ngayong taon.

Maaring makipagugnayan ang mga magsasakang nais mapabilang sa nasabing programa sa mga nakatalagang agricultural technicians sa kanilang mga lugar o kaya ay magsadya sa MAO San Jose. (VND/PIA MIMAROPA/Occ Min)

 

Tagalog news: 50 magpapalay sa Romblon, pinagkalooban ng libreng binhi at abono

ROMBLON, Romblon, Hulyo 12 (PIA) — Limampung magsasaka mula sa iba’t ibang barangay sa bayan ng Romblon ang nakatanggap ng libreng binhi ng alay at abonong urea mula sa Department of Agriculture (DA) sa ilalim ng Rehabilitation Intervention Program.

Ang Office of the Municipal Agriculturist – Romblon ang nanguna sa pamamahagi nito sa magpapalay sa mga barangay na kinabibilangan ng Lonos, Agnay, Mapula, Ginablan, Agnipa, Ilauran, Tambac, Macalas Lamao, Calabogo at Li-o.

Bago ang pamamahagi ng ayuda para sa mga magsasaka, nagkaroon muna ng maikling pagpupulong kung saan sinabi ni OMAg Officer-In-Charge Raymund Juvian Moratin na walang kaakibat na kabayaran o kondisyon sa kanilang ipinamahaging binhi at abono.

“Kailangan lamang nilang itanim ito at palaguin ng maayos upang magkaroon sila ng kabuhayan o pagkain”, ayon pa kay Moratin. (DM/PIA-MIMAROPA/Romblon)