Category Archives: Agriciulture

Tagalog news: 30 magsasaka sa Romblon, sumailalim sa Cacao Farm Management Training

ROMBLON, Romblon, Dis. 11 (PIA) — Tatlumpong magsasaka sa bayan ng Romblon ang nagsipagtapos sa tatlong araw na Cacao Farm Management Training sa ilalim ng pangangasiwa ng Negosyo Center ng Department of Trade and Industry (DTI)-Romblon at pakikipagtulungan ng Office of the Municipal Agriculturist.

Ayon kay Freda Famero, Provincial Negosyo Center Coordinator, na layunin ng tatlong araw na pagsasanay ang maturuan ang mga magsasaka ng wastong pagtatanim at pangangalaga ng cacao upang mapataas ang ani ng mga ito.

Sina Nicanor Madrilejos, isang graduate sa Cacao Doctors’ Training sa Davao, Florgie Madrilejos at Harry Fesalboni, Agriculturist II ng Office of the Provincial Agriculturist ang nagsilbing mga lecturer sa nasabing pagsasanay kung saan kanilang tinuruan ang mga kalahok kung paano ang wastong pagpapalago ng cacao.

Ani Madrilejos, ang cacao ay isang uri ng puno na angkop sa iba’t ibang sistema ng produksyon sa pagsasaka na pangunahing ginagamit ang buto para sa paggawa ng tsokolate, tablea, candies, sabon, shampoo, cosmetics at karaniwang sangkap sa mga pagkain.

Angkop aniya ang ganitong uri ng pananim sa Romblon dahil mataba ang lupa dito at napakalawak pa ang nakatiwangwang na lupa na maaaring pagtaniman.

Ang mga kalahok sa pagsasanay ay sumailalim sa dalawang araw na lecture at isang araw na practicum upang ipakita ang kanilang mga natutunan sa wastong pagtatanim at pangangalaga ng cacao.

Inorganisa rin ang mga ito bilang Romblon Cacao Farmers Association upang mas maibuklod ng husto ang kanilang samahan, mapagkaisa ang mga kasapi nito sa pagbuo ng mgagandang programa na mapapakinabangan ng asosasyon at magiging katuwang din ng pamahalaan sa pagpapatupad ng proyekto para makatulong sa mga magsasaka ng cacao.

Nagbigay garantiya ang DTI-Romblon na magiging katuwang sila ng cacao growers / farmers sa pag-market ng mga magiging produkto ng kanilang pananim.(DMM/PIA-MIMAROPA/Romblon)

Advertisements

Tagalog news: Greenhouse at vermicomposting facilities itinayo ng Municipal Agriculture Office ng Buenavista

BUENAVISTA, Marinduque, Dis. 6 (PIA)—Nagtayo ng isang greenhouse facility ang Municipal Agriculture Office (MAO) sa lupang pagmamay-ari ng lokal na pamahalaan ng Buenavista sa barangay Malbog na kung saan ang mga itinanim dito ay ang mga organikong gulay.

 

Ilan sa mga halaman na pinapangalagaan ng MAO ay lettuce, bell pepper, talong, cassava, sitaw, okra at papaya na nagmula sa kanilang vermicomposting facility na nakatayo rin sa nasabing lugar. Bukod pa rito ay balak pa rin daw nila na magtanim pa ng broccoli at iba pang madahong gulay sa kanilang itinuturing na community garden.

 

Ang paraan ng kanilang pagtatanim ng mga halaman ay dumaraan sa tinatawag na vermicomposting na kung saan ay gumagamit sila ng uod tulad ng African night crawler para makagawa ng organikong pataba.

 

Ayon kay Municipal Agriculture Officer Felimon Castro, isa rin sa kanilang mga napipintong plano ay ibenta ang kanilang mga itinatanim na mga gulay sa mga turista na dumadayo sa kalapit na Malbog Hot Spring. Aniya, nais daw ng kanilang tanggapan na gayahin ang pamamaraan ng pagtitinda ng strawberries sa Benguet na kung saan ay malayang makapipitas ng produkto ang mga mamimili na may malaking tulong din sa sektor ng turismo.

 

Upang mapanatili naman ang kaayusan ng greenhouse at vermicomposting facilities ay may itinalaga namang isang farm technician ang MAO na laging nakabantay sa lugar.

 

Nagmula naman ang budget na kanilang ginamit sa pagpapatayo nito sa Integrated Community Food Production (ICFP) na nasasailalim sa Bottom-up Budgeting ng kanilang munisipyo. (ADSD/PIA-MIMAROPA/Marinduque)

Tagalog news: Closed season sa pangingisda, ipinaiiral ng pamahalaang bayan ng Romblon

ROMBLON, Romblon, Dis. 1 (PIA) — Pansamantalang ipinasara ng Office of the Municipal Agriculturist -Romblon ang panghuhuli ng isda sa silangang bahagi ng karagatang sakop ng bayan ng Romblon simula ngayong Nobyembre hanggang sa ika-31 ng Hulyo 2018.

 

Sinabi ni Edgardo M. Molina, fishery technologist, ang hakbang na ito ng munisipyo ay taunan nilang ipinatutupad upang makapangitlog muna ang mga isda at maiwasang mahuli ang mga maliliit pa.

 

Ang closed fishing season na ipinaiiral ng LGU Romblon ay alinsunod sa Chapter 4 Section 20 of the Comprehensive Municipal Fishery Ordinance kung saan ang punong bayan ang siyang tutukoy ng lugar na ipasasara sa loob ng siyam na buwan at pagbabawal sa paghuli ng anumang uri ng isda sa ipinasarang pangisdaan partikular sa mga mangingisdang gumagamit ng ring net.

 

Ayon pa kay Molina tinatayang nasa 120 ektarya ang municipal water na pansamantalang ipinasara ng kanilang tanggapan upang dumami ang populasyon ng isdang galunggong, matang-baka, tulingan, pulang buntot, bantalaan at iba pa.

 

Ang mga pangulong (small-scale commercial fishing) na lalabag sa naturang ordinansa ay kukumpiskahin ang mga huli at kagamitan, at pagmumultahin ng P2,500 bawat tripulante.

 

Ang ipinasarang karagatan sa panghuhuli ng isda ay muling bubuksan sa unang araw Agosto ng susunod na taon.(DM/PIA-MIMAROPA/Romblon)

Tagalog news: Grand Pasalubong Center sa OrMin, bukas na

LUNGSOD NG CALAPAN, Oriental Mindoro, Nob. 29 (PIA) – Binuksan kamakailan ang kauna-unahang Grand Pasalubong Center sa lalawigan na makatutulong na mas makilala pa ang mga produktong gawa mula sa iba’t ibang bayan ng Oriental Mindoro.

 

Ang Grand Pasalubong Center ay matatagpuan sa unang palapag ng Xentro Mall, Lungsod ng Calapan. Nabuo ang konsepto ng Pasalubong Center sa pamamagitan ng Golden Mindoro Island Natural and Agricultural Products Marketing Inc. sa pangunguna ni Golden Mindoro Inc. (GMI) President Luciano D. Sevegan, sa pakikipagtuwang sa iba’t ibang ahensya ng Pamahalaang Panlalawigan.

 

Sa oportunidad na ibinibigay nito sa mga producer at magsasaka, inaasahang higit pang makatutulong ang pasalubong center upang mahikayat ang mga itong itaas ang kanilang produksyon at maipakita ang mga produktong gawang Mindoro.

 

Ayon kay GMI President Sevegan, kulang ang lalawigan sa mga pamilihang pagdadalhan ng mga produktong gawa ng mga Mindoreño kung kaya’t napagdesisyunan ng kanilang grupo na magtayo ng isang pasalubong center na makatutulong upang maipakilala ang mga iba’t ibang produktong gawang Mindoro.

 

Dagdag pa niya, hindi lamang magsisilbing pamilihan, kundi isa rin itong market matching opportunity kung saan maikokonekta ng mga ito ang mga producers sa mga buyers. Nagsisilbi rin itong showroom upang mas ma-enganyo ang mga mamamayan na bumili ng mga nasabing produkto. Sinabi rin niyang hindi gaano nagdadagdag ng tubo ang Pasalubong Center sapagkat naniniwala sila na  social responsibility ng kanilang kumpanya na mas maipakilala pa ang mga produktong ito nang sa ganun ay dumami pa ang bilang ng mga producer sa lalawigan.

 

Ayon kay Gob. Alfonso V. Umali, Jr., sa tuwing may darating na bisita sa lalawigan ay nagiging problema kung anong pasalubong ang maipapadala sa kanila, kaya dapat na pasalamatan ang pagkakaroon ng ganitong pasalubong center sa lalawigan.

 

Samu’t-saring produkto naman ang laman ng Pasalubong Center kasama na ang produktong gawa ng mga katutubo hanggang sa mga produktong pangkalusugan.  (LTC/CPRSD/PIA-Mimaropa/Calapan)

Tagalog news: TESDA, DA-ATI, planong magtayo ng farm school sa El Nido

PUERTO PRINCESA, Palawan, Nob 3 (PIA) — Sinisimulan nang gawin ng Technical Education and Skills Development Authority (TESDA) – Palawan ang plano sa panukalang pagtatayo ng farm school sa Sitio Calampinay, Barangay Pasadeña, El Nido, Palawan.

Ang 11 ektaryang lupain ay pag-aari ng Agricultural Training Institute (ATI) ng Department of Agriculture (DA) na natukoy ng LGU na angkop upang pagtayuan ng pasilidad.

“Nais nating i-develop ito bilang learning site at mapagtayuan ng farm school upang makatulong tayo sa food production sa lalawigan natin,” ani Direktor Renato Pantaleon ng TESDA-Palawan sa Philippine Information Agency (PIA).

Kabilang sa mga programa ng ahensya ang pagtatayo ng farm school upang maka-agapay sa pag-pa-pa-angat ng agrikultura sa lalawigan na malaking tulong sa isinusulong na pagpapalago ng turismo sa lalawigan.

“Nakausap na natin tungkol dito si DA-ATI Director Luz Taposok, pati na rin si Mayor Rosento at naimungkahe nga na lagyan ng pasilidad ang lugar, pag nabuo na ang plano maaaring ma-pindohan na ito ng TESDA central office para maipatupad early next year”, dagdag pa ni Pantaleon.

Sa kasalukuyan, mayroong anim na mga pribadong agricultural farm school sa lalawigan na kinomisyon ng TESDA upang magturo sa mga benepisyaryo ng scholarship program ng gobyerno.

Nakikipag-pulong pa ngayon si direktor Pantaleon sa lokal na pamahalaan ng San Vicente sa posibleng lugar na mapagtatayuan ng karagdagang pasilidad. (LBD/PIAMIMAROPA-Palawan)

Tagalog news: Mga kagamitang pangsaka, ipinamahagi sa Puerto Princesa

LUNGSOD NG PUERTO PRINCESA, Palawan, Oktubre 6 (PIA) — Pormal na tinanggap kamakailan ng 12 samahan ng mga magsasaka sa iba’t ibang barangay ng Puerto Princesa ang mga kagamitang pangsaka na ipinagkaloob ng Department of Agriculture (DA).

Apat na asosasyon mula sa mga barangay ng Inagawan Sub, Kamuning, Manalo at Babuyan ang benepisyaryo ng tig-i-isang unit ng traktora.
Limang grupo ng mga magsasaka naman mula sa mga barangay ng Maruyugon, Luzviminda, Irawan, Sta. Cruz at Sicsican ang nabiyayaan ng tig-isang unit ng cultivator power tiller.

Tatlong unit ng trencher ang naipamahagi sa mga magsasaka ng Tagabinet, Inagawan-Kamuning Farmer’s Association at United Farmer’s Association ng Inagawan Sub.

Ang mga kagamitang pangsaka ay nagkakahalaga ng mahigit P4.7 milyon na pinondohan sa ilalim ng ‘bottom-up budgeting (BUB)’ ng Department of Agriculture (DA) katuwang ang lokal na pamahalaan.

Samantala, ang halagang ibinili ng naipagkaloob na mga kagamitang pansaka ay ikalawang bahagi na ng pondo para sa programa sa kasalukuyang taon. (LBD/PIAMIMAROPA-Palawan)

Tagalog news: Cocolisap, umatake sa mga niyugan sa bayan ng Calatrava at San Agustin

CALATRAVA, Romblon, Oktubre 4 (PIA) — – Kinumpirma ng Philippine Coconut Authority (PCA) Romblon na nakapasok na sa probinsiya ng Romblon ang coconut scale insect o mas kilala bilang cocolisap.

Ayon kay Protacio Rubia, Agriculturist II ng PCA – Romblon, humigit kumulang 1,000 – 1,500 na puno ng niyog ang sinalanta ng Cocolisap sa Barangay Pangulo sa bayan ng Calatrava at sa Barangay Carmen sa bayan ng San Agustin.

Aniya, ang mga cocolisap ay isang ‘destructive insect’ na umaatake ng mga puno ng niyog sa pamamagitan sa pagkain sa kanilang mga dahon, bunga at bulaklak kung saan tanging trunk nalang ng puno ang matitira.

Dagdag pa ni Rubia, ito ang dahilan ng pagbaba ng produksyon ng niyog sa lalawigan at posibleng mayroon pang ibang puno ng niyog sa mga karatig lugar na may cocolisap na rin. Ayon sa talaan ng Philippine Coconut Authority – Romblon, halos 85 porsiyento ng mga magsasaka sa Romblon ay mayroong mga tanim na niyog dahil ito ang pangunahing produkto ng probinsya lalo sa isla ng Tablas.

Ang unang hakbang na ginawa ng PCA Romblon ay inutusan ang mga may-ari ng niyog na magsagawa ng leaf pruning para maiwasan ang pagkalat ng mga cocolisap. Sunod namang plano ng PCA ay maglalaan ng pondo para mas makontrol ang pagkalat ng naturang
peste.

Sinabi ng mga magniniyog sa lugar na bukod sa lumiliit ang kanilang ani, hindi na rin masyadong lumalaki ang bunga ng niyog dahil sa mapaminsalang cocolisap.

Nangangamba naman ang mga may-ari ng niyogan gaya ni Arnold Marin dahil kung noon aniya ay kumikita siya ng P12,000 sa copra ay baka hindi na niya ito kitain sa ngayon. Tiniyak ng PCA na mino-monitor nila ang mga lugar sa lalawigan sa posible pang tamaan
cocolisap. (PJF/DM/PIA-MIMAROPA/Romblon)