Author Archives: PIA-MIMAROPA

About PIA-MIMAROPA

The Philippine Information Agency is one of the bureau/agencies under the Presidential Communications Operations Office.

Tagalog news: PDRRMO Romblon, bumili ng speed boat bilang paghahanda sa kalamidad

ROMBLON, Romblon, Enero 23 (PIA) — Ang Provincial Disaster Risk Reduction and Management Office (PDRRMO) – Romblon ay bumili ng speed boat upang magamit sa pag-rescue sa panahon ng kalamidad o anumang sakuna sa dagat.

Sinabi ni Engr. Antonio Sarzona, PDRRM Officer, ang rescue boat na kanilang binili ay nagkakahalaga ng P3.5 milyon na may sukat na walong talampakan ang haba, 7 ft. 06 inches ang lapad, mayroong 150 horse power na Yamaha engine, may bilis na hanggang 32 knots at kayang maglulan ng sampu katao.

Ani Sarzona, ang pagbili sa naturang gamit ay bilang kahandaan ng PDRRMO sa kalamidad at malaki aniya ang maitutulong nito sa panahon ng emerhensya, partikular sa pagsagip ng buhay lalo pa’t napapalibutan ng dagat ang buong lalawigan.

Halos kada taon aniya ay may naitatalang paglubog ng bangka o iba pang sakuna sa karagatang sakop ng Romblon kung kaya kanilang sinikap na maglaan ng pondo para sa pagbili ng naturang speed boat.

Nitong mga nagdaang taon aniya ay hirap ang mga awtoridad sa pagresponde dahil sa walang mabilis na sasakyang pandagat na maaaring magamit kaya asahan na aniya na kung sakaling magkaroon ulit ng sakuna sa dagat ay makakapag-rescue na agad ang mga tauhan ng PDRRMO.(DMM/PIA-MIMAROPA/Romblon)

Advertisements

Tagalog news: Marble Festival muling ginanap sa bayan ng Romblon

ROMBLON, Romblon, Enero 22 (PIA) — Muling binuksan noong ikalawang linggo ng Enero ang taunang kompetisyon sa paggawa at paglilok ng iba’t ibang obra-maestra mula sa marmol sa bayan ng Romblon.

Ang Marble Festival ay bahagi ng taunang pagdiriwang ng Biniray Festival sa kabisera ng Romblon na ginaganap sa Romblon Shopping Center kung saan pinangunahan nina Governor Eduardo Firmalo at Romblon Mayor Mariano Mateo ang pagbubukas ng nasabing kompetisyon.

Sinabi ni Myrna B. Silverio, Provincial Tourism Officer na umabot sa 56 katao ang lumahok sa kompetisyon ngayong taon sa paglilok o pagdisenyo ng mga novelty items at artworks na yari sa batong marmol.

Sa maikling programa na ginanap kamakailan ay opisyal na ring inanunsiyo ni DTI Acting Provincial Officer Orville Mallorca (na tumayong hepe ng mga hurado), ang mga nananalo sa isinagawang kompetisyon na may apat na kategorya.

Sa Sculpture category, ang unang gantimpala ay napanalunan ni Ferdinand Madeja, pumangalawa si Wilky Galasao at pumangatlo si Cristina Salvador.

Sa kategoryang Creative Design, nanguna si Jasmine Jalos, pumangalawa si Judith Cabalag at pumangatlo si Joel Marzonia.

Sa Jewelries and Accessories naman ay nakamit ang unang pwesto ni Roberto Mellendrez, pumangalawa si Edita Santiago at pumangatlo si Orlyn Menciano.

Sa kategoryang Marble with other medium ay nanalo sa unang pwesto si Veronica Moral, pumangalawa si Arnold Madeja at pumangatlo si Alfredo Menciano.

Tumanggap din ng consolation prize na nagkakahalaga ng tig-P1,000 ang 47 sumali na di pinalad na manalo. (DMM/PIA-MIMAROPA/Romblon)

Tagalog news: ‘Oplan Toksu’ inilunsad sa Puerto Princesa

PUERTO PRINCESA, Palawan, Enero 22 (PIA) — Naglunsad kamakailan ng ‘Oplan Tok-Tok, Suko’ (Oplan Toksu) ang Puerto Princesa City Police Office (PPCPO).

Kasunod ito ng pagtaas ng bilang ng hindi naisisilbing warrant of arrest sa mga indibiduwal na pinaghahanap ng batas.

Nakasaad sa konsepto ng operasyon ang pagkatok sa bahay ng mga wanted person, kakausapin ang pamilya o ang mismong indibiduwal na aarestuhin na sumuko na lamang sa mga awtoridad.

Layon ng stratehiyang ito ng lokal na pulisya na mapadali ang paghuli sa mga may nakabinbing warrant of arrest sa pamamagitan ng pakikipag-ugnayan sa komunidad, barangay at sa pamilya ng mga nagtatagong nasangkot sa krimen upang mapadali ang pagtukoy sa kinaroroonan ng mga ito.

Tutulong na rin sa operasyon maging ang iba pang tauhan ng PPCPO na hindi pa nabibigyan ng area of assignment.

“Kung dati ay iyong warrant officer lang natin ang nanghuhuli ng mga wanted o nagsi-serve ng warrant of arrest, ngayon, may binuo na tayong team, na kabilang ang mga tauhan natin mula sa iba’t ibang unit makikipag-usap sa komunidad,” tinuran ni Police Superintendent Ronnie Bacuel, deputy director for operations ng PPCPO at tumatayong commander ng Oplan Toksu.

“Pati iyong ating mga available personnel, pina-pa-utilize na ng ating direktor para puntahan iyong bahay ng mga may warrant, kasi baka iyong iba, magpa-piyansa na o nakapag-piyansa na,” ani pa ng opisyal.

Sa kasalukuyan, umaabot sa 301 ang bilang ng mga wanted person na naninirahan sa mga nasasakupang barangay ng lungsod na pasok sa jurisdiction ng Police Station 1 (Mendoza PNP), habang 181 naman sa Police Station 2 (dating Irawan PNP). (LBD/PIAMIMAROPA-Palawan)

Tagalog news: DOST-Pagasa at NDRRMC, hinikayat ang publiko na abangan ang mga flood advisory o babala sa baha

LUNGSOD QUEZON, Enero 22 (PIA) — Paalala ng DOST-Pagasa sa mga kababayan, laging magmatyag at makipag-ugnayan sa barangay at sa disaster risk reduction and management office (DRRMO) sa tuwing umuulan.

Mula pa nitong Sabado ng gabi, nagpapalabas ng “General Flood Advisories” o abiso ukol sa pagbabaha ang Pagasa na siyang ipinakakalat naman ng National Disaster Risk Reduction and Management Council (NDRRMC) sa iba’t ibang ahensiya at kinauukulang sangay ng Office of Civil Defense (OCD).

Ayon sa DOST-Pagasa, nakakaapekto pa rin sa dulong hilangang Luzon ang hangin amihan bagamat inaasahan nilang hihina ito sa pagtatapos ng linggo.

Ang Easterlies naman ang makakaapekto sa nalalabing bahagi ng bansa; may dalang mainit na hangin ang Easterlies mula sa Silangan na siyang magiging sanhi ng pagkamaulap ng isang lugar.

Pag-maulap, may posibilidad na umulan.

Kapag tuloy-tuloy ang pag-ulan sa loob ng ilang araw, sa bundok man o kapatagan, ay napupuno ang mga ilog at mga sangay nito hanggang sa umapaw.

Ang Palawan ay makararanas ng mahina hanggang katamtamang pag-ulan at pagkulog-pagkidlat.

Kaya kung magtuloy-tuloy ang pag-ulan, ang mga ilog at sangay na maaring maapektuhan ng ilog-baha sa Palawan ay ang Abongan, Lian, Barabakan, Rizal, Caramay , Lagogona, Babuyan, Bacungan, Iwahig Penal, Inagauan, Aborlan, Malasgao, Apurauan, Banton-Banton, Aramayawan, Ihawig, Panitian, Pulot, Lamakan, Kinlugan, Eraan, Tiga Plan, Malabangan, Ilog, Bansang, Conduaga, Culasian, Ihawig (Brookes), Okayan, Canipan, at Busuanga, Coron.

Sa kabikulan, mahinang hanging ang iiral at makakaranas ng pulu-pulong pagkulog-pagkidlat.

Ang mga maaring maapektuhang ilog at sangay sa Kabikulan ay ang Cabuyan, Bato at Pajo (Catanduanes), Labo at Daet Basud (Camarines Norte); Lower Kibay, Catabangan, Ragay,Tinalmud, Tambang at Lagunoy (Camarines Sur); Guinale at Upper Donsol (Albay); Lanang, Mapayawan, Mandaong, Asid, Malbag, Guiom, Nainday, Daraga, Nauco o Aguada at Beleno; Lower Donsol, Ogod, Putiao, Cadacan, Banuang-duan, Fabrica (Tugbugan) at Matnog.

Ang Kanlurang Kabisayaan ay makararanas ng mahina hanggang manaka-nakang katamtamang pag-uulan at pagkulog-pagkidlat.

Ang mga maaring maapektuhang ilog at sangay sa rito ay ang Pinantan, Barotac, Aklaygan, Jalaud, Jalano, Jagdong, Jalaur, Lamunan, Jaro-Agaman, Sibalom at Guimbal (Iloilo); at Malogo, Sicaba, Grande, Himocaan, Danao, Upper Tyabanan, Sipalay at Lower Ilog (Negros Occidental).

Para naman sa Silangang Kabisayaan, kung saan mahina hanggang manaka-nakang katamtaman ang pag-uulan ang mararanasan, ang mga maapektuhang ilog at sangay ay ang Basey, Silanga, Calbiga at Jibatan (Samar); Sangputan, Palo, Salano (Quilot), Daguitan, Marabang, Cadacan, Bongquirogan, Salug, Pagnabagaran, Pagsangahan at Binahaan (Leyte); Bisay, Himbangan at Pandan (Southern Leyte); Oras, Dolores, Ulot, Taft, Borongan, Suribao, Llorento, Balangia at Sulat (Easter Samar).

Mahina hanggang katamtamang pag-ulan ang mararanasan sa rehiyon ng Caraga at ang mga ilog at sangay nito na maapektuhan ay ang Cantilan, Toracan, Tandag, Tago, Hubo-Oteiza, Hinatuan at Bislig (Surigao del Sur); Surigao at Magallanes (Surigao Del Norte); Lake Mainit-Tubay, Asiga, Agusan, Linugos at Cabadbaran (Agusan Del Norte).

Paanyaya ng DOST-Pagasa at NDRRMC, palagiang alamin ang mga ipinalalabas na flood advisories para makaiwas sa pinsala ng baha.

Pinaaalalahanan ang mga kababayang naninirahan sa mga dalisdis at mga lugar malapit sa mga nasabing ilog at sangay na maghanda at mag-ingat. (LP/PIA-Mimaropa)

DOLE Mimaropa awards 2.5-M capital assistance to sectoral groups of Calapan City

CALAPAN CITY, Oriental Mindoro, Jan 19 (PIA) – The Department of Labor and Employment (DOLE) Mimaropa region awarded recently P2.5 million as seed capital assistance to identified sectoral groups of the city.

The amount was personally given by DOLE Mimaropa Regional Director Atty. Alvin Villamor through Calapan City Mayor Arnan C. Panaligan, who handed over the financial assistance in a form of check which is intended for the beneficiary organizations.

The city government of Calapan has already identified sectoral groups that are qualified to avail for their livelihood and micro-enterprise projects.

Among the beneficiaries of the financial assistance are the Persons with Disabilities (PWDs)-Calapan City Federation for the establishment of a mini-grocery and school supplies store amounting to P497,200; Calapan City Federation of Rural Improvement Clubs for their food business, P496,250; Bgy. Panggalaan Farmers Association for the establishment of an agricultural farm inputs trading, P498,250; Hanay ng Yumayabong at Umuunlad na Mangingisda (HAYUMA) for the establishment of a Bigasang Bayan, P498,700; Parent Leaders Association for the establishment of a community store amounting to P498,500; among others.

According to Panaligan, the awarded groups are all duly registered and accredited and their project proposals underwent a rigid evaluation for them to qualify in the assistance extended by DOLE. (LTC/PIA-Mimaropa/Calapan)

Tagalog news: BFAR Fisheries Scholarship Program bukas pa rin sa mga aplikante

ODIONGAN, Romblon, Enero 19 (PIA) — Nananawagan ang tanggapan ng Bureau of Fisheries and Aquatic Resources (BFAR) – Romblon sa mga magtatapos o nagtapos na sa high school, partikular na sa mga nagnanais na kumuha ng kursong BS Fisheries, na bukas na ang kanilang tanggapan sa pagtanggap ng mga aplikante para sa BFAR Fisheries Scholarship Program.

Ang Fisheries Scholarship Program o FSP ay bukas sa mga kabataan 20 taong gulang pababa, nakapagtapos o magtatapos ng high school ngayong taon, kasama sa top 10 ng graduating class at interesadong kumuha ng kursong Bachelor of Science in Fisheries o Marine Biology simula sa school year 2018-2019.

Ayon kay Luisito Manes, Acting Provincial Fishery Officer ng BFAR Romblon, ang naturang scholarship program ay naglalayong makapaghanap ng ahensiya ng mga kabataang may potensyal na mamumuno sa pagpapalago ng fisheries and aquatic resources ng bansa.

Nilinaw din nito na dapat anak sila ng mga small-scale o small-time na mangingisda o yaong kumikita ng hindi lalampas ng P25,000 bawat taon. Kailangan ding miyembro ng asosasyon ng mga mangingisda ang kanilang mga magulang ng hindi bababa ng apat na taon. Patutunayan ito sa pamamagitan ng sertipikasyon mula sa pinuno ng organisasyon.

Kabilang sa mga matatanggap ng bawat scholar ng BFAR ang libreng matrikula at iba pang bayarin sa paaralan, buwanang allowance at iba pang suporta.

Ang mga interesado ay maaring magsumite ng filled-out FSP scholarship form sa BFAR Romblon Provincial Office na matatagpuan sa Bgy. Tabing Dagat, Odiongan, Romblon o maaaring magtungo sa mga Office of the Municipal Agriculturist sa kanilang bayan.

Balak ng BFAR na bigyan ng trabaho sa kanilang tanggapan ang mga scholar kapag natapos na nila ang pag-aaral.(DMM/PIA-MIMAROPA/Romblon)

Tagalog news: Mga SUC sa Mimaropa, sinanay sa pamamahala ng teknolohiya at commercialization

PUERTO PRINCESA, Palawan, Enero 18 (PIA) — Sumailalim sa tatlong-araw na pagsasanay sa teknolohiya at commercialization ang mga kinatawan mula anim na unibersidad at kolehiyo ng Mindoro, Marinduque, Romblon at Palawan (Mimaropa) kamakailan na isinagawa sa lungsod ng Puerto Princesa.

Ito ay sa bunsod ng pakikipagkasundo ng Department of Science and Technology (DOST) – Mimaropa sa Hanyang University ng Seoul, South Korea.

“Ang bottom line nito, matuto tayo na mag-commercialize ng ating mga outputs, para makatulong sa socio economic development, sa pamamagitan ng mga bagong hanapbuhay, bagong business, na mapapakinabangan din sa mga opisina at iba pang organisasyon”, ani Dr. Ma. Josefina Abilay, regional director ng DOST-Mimaropa sa Philippine Information Agency (PIA).

Anim na mga eksperto mula sa Hanyang University ang nagsilbing mga tagapagturo sa mga partisipante na kinatawan ng Mindoro State College, Marinduque State College , Romblon State University, Occidental Mindoro State University, Palawan State University at Western Philippines University.

“Ibinabahagi nila (resource persons) ang kanilang kaalaman, kung paano nila ginagawa ang kanilang mga teknolohiya at commercialization”, dagdag pa ni Direktor Abilay.

Hangad din ng DOST na mapaangat ng husto ang kaalaman ng mga mananaliksik sa rehiyon upang magamit ng gobyerno at mapakinabangan ng lipunan ang mabubuong resulta ng mga ito.

Samantala, ani Abilay, ikalawang beses nang nangasiwa ang DOST ng parehong pagsasanay, kung saan sa naunang pagkakataon ay naging kabahagi ng kagawaran ang mga lokal na tagapagturo.

Bukod sa training workshop, nakapaloob din sa pakikipag-kasundo ng DOST ang pakikipag-palitan ng mga estudyante, guro at maaari ring bumuo ng kurikulum base sa pamamahala ng teknolohiya. (LBD/PIAMIMAROPA-Palawan)