Tagalog news: ‘Closed Season’ ng galunggong, muling ipatutupad sa Northern Palawan

PUERTO PRINCESA, Palawan, Nob. 16 (PIA) — Sa ikatlong pagkakataon, muling magpapatupad ng ‘closed season’ sa isdang galunggong ang Bureau of Fisheries and Aquatic Resources (BFAR) sa bahaging norte ng Palawan.

Ipinaalala ni Provincial Fishery Officer Mario Basaya ng BFAR-Palawan sa publiko ang ika-tatlong taong implementasyon ng nilalaman ng pinagsamang kautusan ng Department of Agriculture (DA) at Department of Interior and Local Government (DILG) sa pamamagitan ng ‘Kapihan sa Philippine Information Agency (PIA)’ kamakailan.

“Binibigyan natin ng pagkakataon na manganak ang mga isdang galunggong at tsansa na lumaki pa ang mga maliliit na isda kaya natin ito ipinatutupad,” ani Basaya sa ‘Kapihan sa PIA’.

Nagsimula ang closed season noong Nobyembre 1 na magtatagal hanggang 31 Enero 2018. Sa nasabing mga petsa, ipagbabawal muna ang paggamit ng lambat tulad ng likom, taksay, pangulong gayon din ang basnig na ginagamit ng mga commercial fishing vessel.

“Hindi kasama sa pagbabawalan na manghuli ng galunggong iyong maliliit na mangingisda, iyon lang pong mga commercial fishing o malalaking fishing companies lamang po ang bawal,” paglilinaw ng opisyal.

Makikita rin natin at mararamdaman ang epekto nito, kung iyong mga mahuhuli nating isda sa mga susunod na panahon eh malalaking sizes na,” dagdag pa ni Basaya.

Sa ngayon, ayon sa opisyal, posible ring mai-ugnay sa malalaking sukat ng galunggong na nahuhuli sa Mindoro Strait ang resulta ng pagpapatupad ng “closed season” sa norte ng lalawigan. (LBD/PIAMIMAROPA-Palawan)

Advertisements

Tagalog news: TESDA, DA-ATI, planong magtayo ng farm school sa El Nido

PUERTO PRINCESA, Palawan, Nob 3 (PIA) — Sinisimulan nang gawin ng Technical Education and Skills Development Authority (TESDA) – Palawan ang plano sa panukalang pagtatayo ng farm school sa Sitio Calampinay, Barangay Pasadeña, El Nido, Palawan.

Ang 11 ektaryang lupain ay pag-aari ng Agricultural Training Institute (ATI) ng Department of Agriculture (DA) na natukoy ng LGU na angkop upang pagtayuan ng pasilidad.

“Nais nating i-develop ito bilang learning site at mapagtayuan ng farm school upang makatulong tayo sa food production sa lalawigan natin,” ani Direktor Renato Pantaleon ng TESDA-Palawan sa Philippine Information Agency (PIA).

Kabilang sa mga programa ng ahensya ang pagtatayo ng farm school upang maka-agapay sa pag-pa-pa-angat ng agrikultura sa lalawigan na malaking tulong sa isinusulong na pagpapalago ng turismo sa lalawigan.

“Nakausap na natin tungkol dito si DA-ATI Director Luz Taposok, pati na rin si Mayor Rosento at naimungkahe nga na lagyan ng pasilidad ang lugar, pag nabuo na ang plano maaaring ma-pindohan na ito ng TESDA central office para maipatupad early next year”, dagdag pa ni Pantaleon.

Sa kasalukuyan, mayroong anim na mga pribadong agricultural farm school sa lalawigan na kinomisyon ng TESDA upang magturo sa mga benepisyaryo ng scholarship program ng gobyerno.

Nakikipag-pulong pa ngayon si direktor Pantaleon sa lokal na pamahalaan ng San Vicente sa posibleng lugar na mapagtatayuan ng karagdagang pasilidad. (LBD/PIAMIMAROPA-Palawan)

Tagalog news: DTI Mimaropa at SGS Philippines lumagda sa Kaagapay sa Negosyo Program

SAN JOSE, Occidental Mindoro, Nobyembre 2 (PIA)—Nilagdaan ng Department of Trade and Industry (DTI) Mimaropa at ng SGS Philippines (SGS) ang Kaagapay sa Negosyo Program sa SM Megamall, Mandaluyong kamakailan.

Ang nilagdaang kasunduan, ay nagbibigay pahintulot sa SGS, isang pribadong international company, na magbigay serbisyo sa ilang piling Micro, Small and Medium Enterprises (MSMEs) ng rehiyon. Ang mga serbisyong ito ay ang implementasyon ng Philippine Traceability System (PTRACE) at ang Food Safety Implementation Workshop.

Nakasaad sa kasunduan na ang implementasyon ng PTrace system ay magdudulot ng kaayusan sa mga proseso na meron ang isang negosyo. Ayon kay Mark Dennis Cortez ng DTI Mimaropa, sa pamamagitan ng PTrace, ay matuturuan ang mga MSME’s na gumawa ng mga records at dokumento hinggil sa produksyon, pagpoproseso at distribusyon ng kanikanilang produkto. Bilang paglilinaw sa kahalagahan ng PTrace ay nagbigay ng halimbawa si Cortez. Aniya, sakaling magkaproblema sa sangkap na raw material ng isang produkto, sa pamamagitan ng PTrace, ay madaling malalaman kung sino ang supplier nito.

Sinabi naman ni Rodolfo Mariposque, DTI Mimaropa Assistant Regional Director, na nakomisyon ang SGS upang suriing mabuti ang mga food products sa Mimaropa. “Halimbawa ang mani, kung hindi mababantayan, maari itong pagmulan ng aflatoxin na masama ang dulot sa katawan ng tao. Ipinapa-test natin (sa SGS) upang maseguro na ligtas ang mga produkto sa Mimaropa”, paliwanag ni Mariposque.

Sa talaan ng 30 MSME’s na benepisyaryo ng programa, anim dito ay mula sa lalawigan. Ang mga ito ay ang Richblitz Sweets, San Isidro Advent Farmers Association, JALD Industries, Pagasa Multi-Purpose Cooperative, Triple P’s Food Products at Calumpit Multi-Purpose Cooperative.

Ang Kaagapay sa Negosyo Program ay may isang taong termino upang maipatupad ang mga nakasaad sa kasunduan. Pasisimulan ito sa darating na unang araw ng Nobyembre 2017 hanggang ika-31 ng Oktubre 2018. (VND/PIA MIMAROPA/Occ Min)

Tagalog news: BJMP, PDEA, PNP, nagsagawa ng Greyhound Operation sa Odiongan District Jail

ODIONGAN, Romblon, Nobyembre 2 (PIA) — Ang pinagsanib na tauhan ng Bureau of Jail Management and Penology, Philippine Drug Enforcement Agency – Mimaropa at Special Weapons and Tactics (SWAT) ng Romblon Police Provincial Office ay nagsagawa ng sorpresang greyhound operation sa Odiongan District Jail kahapon.

Sa ginawang paghalughog ng mga awtoridad ay wala namang iligal na drogang nahanap ngunit may ilang mga nakumpiskang bagay na ipinagababawal sa piitan gaya ng mga hanger, blade, sintoron, at iba pa. Nakakuha rin ng dalawang basyo ng bala at isang pinaghihinalaang improvised na patalim.

Paliwanag ng mga preso, ang mga nakuhang blade ay ginagamit lamang nila pang ahit ng sa kanilang mga balbas habang ang dalawang basyong kapsula ng bala ay ginagawa umanong agimat.

Ang pagsasagawa ng Oplan Linis Ligtas o ang mas pinaigting na Oplan Greyhound ay programa ng BJMP para maalis ang presensya ng iligal na droga sa loob ng bilangguan.

“Ang ginawa po natin in coordination with PDEA Mimaropa at PNP SWAT na Oplan Linis Piitan/Greyhound Operation ay para ma-eradicate ang mga ipinagbabawal na gamot at iba pang uri ng kontarabando sa loob ng ating jail facility,” pahayag ni Jail Senior Inspector Irene Gaspar, Warden ng Odingan District Jail,
Paalala naman ni J/SInsp Gaspar sa mga bibisita, huwag magdadala ng kung ano mang bawal na gamit bago pumasok ng piitan.

“Sa mga bisita natin, bago pumasok meron po tayong mga guidelines diyan na bawal po silang magdala ng mga matutulis na bagay, lalo na yung mga illegal drugs bago pa man sila pumasok sa gate, sini-search na po natin yan at yung tamang kasuotan.” Huling pahayag ni Gaspar.

Pinasalamatan din nito ang mga tauhan ng PDEA Mimaropa at SWAT team sa pagtulong sa kanila upang maisagawa ng matiwasay ang nasabing greyhound operation.(PJF/DM/PIA-MIMAROPA/Romblon)

Tagalog news: MOA para pangalagaan ang Northeastern Palawan Marine Protected Area Network nilagdaan

PUERTO PRINCESA, Palawan, Nobyembre 2 (PIA) — Lumagda ang mga alkalde ng anim na munisipyo sa isang Memorandum of Agreement (MOA) o kasunduan upang masiguro ang epektibong pagpapatupad ng pangangalaga sa mga kritikal na dalampasigan at marine habitats na sakop ng itinatag na Northeastern Palawan Marine Protected Area (MPA) Network.

Ang nasabing kasunduan ay nilagdaan ng mga mayor mula sa mga bayan ng El Nido, San Vicente, Araceli, Dumaran, Taytay at Roxas. Ito ay ginanap sa Governor’s Conference Room ng gusaling kapitolyo kamakailan.

Kasama ring lumagda sa kasunduan ang Pamahalaang Panlalawigan ng Palawan sa pamamagitan ng Office of the Provincial Agriculturist (OPA) at Palawan Council for Sustainable Development Staff (PCSDS) na magsisilbing oversight agencies at magbibigay ng tulong teknikal kung kinakailangan.

Nakapaloob sa naturang kasunduan ang pagpapataas ng aquatic biodiversity sa nasasakupan ng MPA at paglikha ng mga pang-ekonomiyang oportunidad alinsunod sa panuntunan ng pagpapanatili ng pag-unlad na makapagbibigay ng karagdagang kita sa mga mangingisda.

Kasabay ng paglagda ng kasunduan ang pagbuo ng MPA Network Management Board na kinabibilangan ng mga mayor ng anim na munisipyo upang matiyak na maisakatuparan ang layunin ng MOA. Bubuo rin ng management committee na ang pangunahing tungkulin ay subaybayan ang implementasyon ng Northeastern Palawan Marine Protected Area Network Management Plan at mga polisiya nito. Nakatakda ring magbigay ng pondo ang bawat munisipyo kada taon bilang suporta sa implementasyon ng naturang management plan.

Naisakatuparan ang pagtatag ng Northeast Palawan MPA Network sa pangunguna ng World Wide Fund for Nature (WWF) Philippines sa tulong at pakikiisa na rin ng pamahalaang panlalawigan at ng mga munisipyong nasasakupan nito. (OCJ/PIA-MIMAROPA, Palawan)

Tagalog news: Palawan ginawaran ng ‘Top Seller Pavillion Award’

PUERTO PRINCESA, Palawan, Okt 27 (PIA) — Ginawaran ng ‘Top Seller Pavillion Award’ ang Palawan sa katatapos na Mimaropa Naturally Agri-Trade and Tourism Fair 2017 na ginanap sa Megatrade Hall, SM Megamall, lungsod ng Mandaluyong.

Ito ang ikatlong pagkakataon na naisagawa ang naturang gawain mula nang una itong inilunsad noong 2015 na naglalayong maipakilala ang mga lokal na produktong gawa ng mga maliliit na nagnenegosyo, mga serbisyo at destinasyon mula sa rehiyon ng Mimaropa na binubuo ng Occidental at Oriental Mindoro, Marinduque, Romblon at Palawan.

Sa talaan ng Department of Trade and Industry (DTI), humigit-kumulang P42 milyon ang kinita ng buong rehiyon sa limang araw na exhibit.

Maliban sa ‘Top Seller Pavilion Award,’ nakamit din ng Palawan sa pamamagitan ng Asiano Arts and Crafts ang ‘Best Dressed Booth’ at ang ‘Best Innovative Product’ ng Ayahay Palaweño Brewery.

Nang dahil sa exhibit na ito ay unti-unti ring nakilala ang handicrafts na gawa ng mga benepisyaryo ng Repormang Agraryo ng Department of Agrarian Reform (DAR)-Palawan sa Calamianes area.

Ang exhibit ay nilahukan ng mahigit sa 150 micro at small enterprises mula sa mga lalawigan ng Mimaropa.

Ang aktibidad ay pinangungunahan ng DTI-Mimaropa katuwang ang iba pang pang-rehiyong ahensiya ng Department of Agriculture, Department of Agrarian Reform, Department of the Interior and Local Government, Department of Tourism at ng mga lokal na pamahalaan na bumubuo sa rehiyon. (OCJ/PIA-MIMAROPA, Palawan)

Tagalog news: San Jose humakot ng parangal sa CMCI Regional Awards

SAN JOSE, Occidental Mindoro, Okt 27 (PIA)—Humakot ng parangal ang pamahalaang lokal ng San Jose sa Cities and Municipalities Competitiveness Index (CMCI) para sa rehiyon ng Mimaropa, na isinagawa kamakailan sa SM Megamall, Mandaluyong.

Ayon sa Department of Trade and Industry (DTI), layunin ng aktibidad na maipakita ang kakayahan ng mga siyudad at munisipyo sa buong bansa sa ilalim ng four pillars. Ang mga ito ay ang Economic Dynamism, Government Efficiency, Infrastructure at Resiliency.

Nauna ng ginanap ang national level CMCI o ang CMCI 2017 noong Agosto, sa pangunguna ng DTI katuwang ang National Competitiveness Council (NCC) na ginanap sa Philippine International Convention Center (PICC), Pasay City.

Sa ilalim ng Economic Dynamism ay nakuha ng pamahalaang lokal (LGU) ng Sta Cruz ang ikatlong pwesto at pumangalawa ang LGU Boac. Ang dalawang pamahalaang lokal ay mula sa lalawigan ng Marinduque. Nakuha naman ng LGU San Jose, Occidental Mindoro (SJOM) ang unang pwesto.

Sa Government Efficiency ay pumangatlo ang LGU Torrijos, Marinduque, pumangalawa ang LGU Brooke’s Point, Palawan at muling nanguna ang LGU SJOM.

Isa pang bahagi ng four pillars ang Infrastructure. Dito ay nakuha naman ng LGU Narra, Palawan ang ikatlong pwesto, pumangalawa ang LGU Odiongan, Romblon at nanguna ang LGU SJOM.

Ang ikaapat na bahagi ng four pillars ay ang Resiliency kung saan naiuwi ng LGU Naujan, Oriental Mindoro ang ikatlong pwesto. Pumangalawa ang LGU Gasan, Marindugue at muling nanguna ang LGU San Jose.

Nakamit din ng San Jose, ang unang pwesto sa overall ranking ng mga munisipyo sa rehiyon. Isang karapatdapat na parangal dahil kinilala rin ang nasabing bayan na pang- 13 sa most competitive municipality sa buong bansa.
Ayon sa DTI Mimaropa magpapatuloy ang kanilang pagsubaybay sa CMCI ranking sa rehiyon bilang pagtupad sa adbokasiya ng ahensya na isulong ang competitiveness sa bansa. (VND/PIA MIMAROPA/Occ Min)