LUNGSOD QUEZON, Dis 11 (PIA) — Inilunsad sa Oriental Mindoro kamakailan ang Unified Agencies toward Sustainable Livelihood for Mindoreños o UGAT-SLM na naglalayon magpatupad ng epektibong sistema ng paghahatid ng mga batayang serbisyo kontra kahirapan.

Ang paglulunsad ng nasabing programa ay pinangunahan ng Department of Social Welfare and Development-Mimaropa, na nais pagugnayin ang mga serbisyong ibinibaba sa mga maralitang kababayan sa lalawigan.

Sa pamamagitan din ng UGAT-SLM, inaasahang magtutulong-tulong ang mga ahensiya para mabigyan ng kasanayan at pagkakataon ng magkaroon ng trabaho o kabuhayan ang mga benipisyaro.

Kabilang sa mga dumalo sa seremonya ng paglagda ng memorandum of understanding para sa UGAT-SLM ay sina DSWD-Mimaropa Regional Director Wilma D. Naviamos, Nelson B. Melgar, kinatawan ng pamahalaang panlalawigan ng Oriental Mindoro; TESDA Provincial Director Renato M. Pantaleon, Provincial Director of Technical Education and Skills Development Authority (TESDA); Provincial Science and Technology Director Jesse Pine; Engr. Juliana Ortega ang hepe ng Labor and Employment Office- Department of Labor and Employment (DOLE) at Department of Agriculture – Agricultural Training Institute (DA-ATI) Provincial Director Andrew B. Barrientos.

Kasama rin sa UGAT-SLM ang Department of Trade and Industry (DTI) at Department of Agriculture – Bureau of Fisheries and Aquatic Resources (DA-BFAR). (LP/LBR/PIA4B)